Dhekaraya 7 - Wëël Jwøk

Luum Løk Pïëc Mar Jø Icriel Mana Kwierge Cam Ni Marge Wödö

¹ 'Ba kanya tïm cwïïc Dariöc na aŋween bäät nyec, dwør Wuuö Jwøk aö bäät Dhekaraya ni nïr dwää abïŋween aŋween, ni beeye dwääy mana cwøl ni Kiclep.

² 'Ba kar kaagø jø Bëthël, jiy møøk ege nø jääŋŋö nee Wuuö Jwøk kwacge, ni beege Carëdher ki Regem-Melek ki jicge,

³ ni ge cäänö ki dïlämme mo wø tïïö Øt Wuuö Jwøk, eni na wïth jammi bëët, ki nyïïkuk Jwøk, ni köge, na «?Aŋø, wa doo bëëdö ni wa kïmmö ni wa tïïya wödö mar kwier cam ki dwää abïïc, kaawat mana bëëtwa ni wa tïïya gø ki yïth cwiiri moa thööth na pöödhö?»

⁴ Køøre dwør Wuuö Jwøk, eni na wïth jammi bëët, aö bääta ni kööe,

⁵ ni «Caanï jï jiy bëët moa en yi ŋööm paac, ki dïlämme, ni kööï, ni ‹Kanya bëëdu nou tïïya wödö mar kwier cam nou kïmmö ki dwää abïïc ki dwää abïriiø ki cwiiri moa näk pïërabïriiø na pöödhö, ?aŋø, wödö maru kar kaace mar kwier cam tïïyu kapera na bëëde cøøn enø?

⁶ ?A kanya wara bëëdu thuwø nou cämö nou mädhö, ajwöm moøgø paa kiper dëëtu keeru na bëëde?

⁷ ?Aŋø, moøgø paa luup moa car Wuuö Jwøki ki dhøk nyïïkuk Jwøk mo acääŋŋe, kanya poode ni Jerucalem ki päänye moa en deŋŋe bëëdö ni päŋ ki jiy, ni bëëtö mar jiy jööt jaak, ni mïëri moa en jï løø tier-piny ki mïëri moa en deŋ kïte jï løø kur pänh-cäŋ ge bëëdö ni päŋ ki jiy?› »

⁸ Køøre dwør Wuuö Jwøk aö bäät Dhekaraya ni kööe,

⁹ ni «Man beeye dwøl mana wara caan Wuuö Jwøki, eni na wïth jammi bëët, ena köö, ni ‹Ŋøllu luup ki jöör ŋøl mana näk kare, ni ö ŋati man nø ni nyooth mëër ki bäth ec mare jï wati maya.

¹⁰ Kär määr thuunhnhi, ki kïïe, ki juurre moa path, ki jøøa can thielu piny. Ni ö ŋati man nø ni bäŋe gïn mo raac mo maae ki cwïnye ki wati maya.›

¹¹ «'Ba jiy akweer ki man cekge ïthge; ni putge ŋäthge løk ki dïwït marge, ni dhïŋge ïthge ni ge kwiera luup.

¹² Geni, cwïnyge atïïcge ni teek kaamar kïdi, ni tïmge ni ciik ba wïnyge, ki luup Wuuö Jwøk, eni na wïth jammi bëët, ni beege luupe na jääŋŋe ki køør Jwïëye na en kur keere ki røk nyïïkuk Jwøk mo acääŋŋe. Kiper manøgønø, wëër mo dwøŋ aput öö ki baŋ Wuuö Jwøk, eni na wïth jammi bëët.

¹³ «Køøre Wuuö Jwøk, eni na wïth jammi bëët, aköö, ni ‹Kar kaagø, aput tïmö ni kany wø cwøla geni dwøra ba wïnyge; ni kany wø cwølge aani döötge ba wïnynya thuwø.

¹⁴ 'Ba aani gena puta keethø ka atuunna mo teek døc ni putge ci yïthakic wïth juurre mo kucge. Kanyøgø nø ŋöömö aput dööŋŋö ni bäŋ jiy yie, ni put tïmö ni bäŋ ŋat mo ci yie këët, kiper bee geni na tïïc ŋöömma beer nee dööŋe ni bäŋ jiy yie.› »