Dhekaraya 13 - Wëël Jwøk

¹ Wuuö Jwøk aköö, ni «Noo tïme na dïcäŋöca jøøro ojap jï dhi øt Deebit ki jø wø bëëdö Jerucalem kiper nee raay moge pïny wøk ni tïïc ge ni waany.»

Juu Mo Patha Adïëri Ki Nyïïkuk Jwøk Mo Patha Adïëri Di Raanynyø Yi Ŋööm Juuda

² Wuuö Jwøk, eni na wïth jammi bëët, aköö, ni «Dïcäŋöca, juu moa näk patha adïëri raanynya raanynyø yi ŋöömö ni tïme ni wïc ba par ki nyeŋge këët. Ge raanynya raanynyø ge bëët ki nyïïkuk Jwøk moa näk patha adïëri ki jwïëc juuga reyø na näk ba waany.

³ 'Ba noo dee dhaanhø mo poot cäänö ki luup mo patha adïëri kiper yi nyïm, wänni ki menni na nywøl gø kiree geno köö jïgø, ni ‹Ï thøw! kiper ïïna cäänö ki luup tööt ki nyeŋ Wuuö Jwøk.› 'Ba kanyo caan luummögø kiree, eni put wänni ki menni na nywøl gø cwøp ki tøŋ.

⁴ «'Ba dïcäŋöca, nyikuŋ Jwøk man nø mana näk patha adïëri wïïe olääy ki køør luup tööt moe na care, ni ba ruye ka abïïna näk cwääc ka jïër ni wø käär nyïïkuk Jwøki, kaa mana wara røc gø ni maaŋŋa wïth jiy ki gø.

⁵ 'Ba eno kööi, na ‹A patha nyikuŋ Jwøk; aana ŋat puur, a bëëdö naa bëënna puur cøøn ki mana käla thïnhö ni aano ŋeeø na laŋŋø.›

⁶ 'Ba eno pëëny dhaanhe mørri, ni ‹?Ŋwiili moi otägö dëërï nidïï?› 'Ba oløøe, ni ‹Moøgø beege ŋwiili moa pïï dëëra kanya bëëda po nyïïawääta.› »

Luum Thøø Mar Dïkwääy, Ki Keethø Mar Dïëk

⁷ Wuuö Jwøk, eni na wïth jammi bëët, aköö, «Wui, opëëllö! Ö maal ni 'nägï dïkwääy mar dïëk 'moa; 'näk eni, eni na kare cään ki aani; 'näk dïkwääy nee dïëk keethge; 'ba aani cera ocäŋa løø bäät obwöre moa therø.»

⁸ Wuuö Jwøk aköö, ni «Dïcäŋöca bäät piny bäre, ki ri jiy adäk, ariiø othøw, ni tïme ni dööŋŋa dhaanhø aciel keere ni kwøw ki ri jiy adäk.

⁹ 'Ba jiy moø noo dööŋ ki ra adäk yøø, geno kïtha yïth gïï mo leth mo caala maac, nee tïmge ni waany, kaamar man wø leeny warkey ki gwel-bïrö ki maac, ni twønna gø. Kanyøgø nyeŋŋa ocwølge, ni løøa luubö marge; aano kööi, ni ‹Beege jiy 'moa,› 'ba geno kööi, ni ‹Wuuö Jwøk beeye Jwøk marwa.› »