Dhekaraya 12 - Wëël Jwøk

Luum Pïëm Mano Piem Jø Juuda Ki Gø

¹ 'Ba man beeye luum Wuuö Jwøk na caal tëër na caane kiper jø Icriel. Wuuö Jwøk, eni na peer maal, na këël tier piny piny, na kïth jwïëy mo dhaanhø dëër gø, dwøre mana caane bee en, ena köö,

² ni «Aani, a ööa kuna tïïa Jerucalem ni caala athöödhi mo yie da køøŋø mo jiy moa en deŋŋe bëët mäthö dëër gø ni wëëk ge bøømmø. 'Ba kanyo ciel Jerucalem dïër, orwöp ki mïëc Juuda møga thuwø.

³ 'Ba dïcäŋöca, kanyo ö wïth juurre bëët mo bäät piny noo cooŋge rege ki man tukge Jerucalem, aani, Jerucalem otïïa kaamar kïdi mo peek mo ba løny ki tuk kare jï wïth juurre bëët. 'Ba jiy bëët moo pääny gø ki man tïŋge gø maal, ŋwiili mo leth døc opïï dëëtge.»

⁴ Wuuö Jwøk aköö, ni «Dïcäŋöca, aani, okwëëc leny bëët mo nyïïmän geno wëëga lwär, ni ö jiyi moa cäädhö ki bäätge ni wëëga ge bøølø. 'Ba aani, dhi øt Juuda koora koorø døc ni waŋa yaa këël ree. 'Ba okwëëc leny bëët mo wïth juurre ge tïïa tïïö na cööye.

⁵ Køøre dïbwöthe mo Juuda geno cäänö ki cwïnyge ni köge, ni ‹Jø Jerucalem gena jïtö ki teek ki køør mana tïïc Jwøki, kiper Wuuö Jwøk, eni na wïth jammi bëët, beeye Jwøk marge.›

⁶ «'Ba dïcäŋöca, aani, dïbwöthe mo Juuda ge tïïa tïïö kaamar abat mo yie da maac mo ocïp tiet moonni, ni ge caala ameeth mo liel yïthakic kude mo abäy; ni thöörge wïth juurre bëët moa en deŋge, moo en bäät cwïïc ki moo en bäät caam. 'Ba jø Jerucalem ge cäŋa bëëtö karge yi Jerucalem.»

⁷ 'Ba Wuuö Jwøk kwör bëëte mo jø Juuda kwøŋe ka piem dïkwøŋ, na ajiem mar dhi øt Deebit ka ajiem mar jø Jerucalem nee ba pöödhe ni kaala mar jø Juuda møga.

⁸ 'Ba dïcäŋöca, Wuuö Jwøk jø Jerucalem ogwøe, ni ö jøøa jägö dïge ni tïmge ni teek dïcäŋöca kaamar Deebit, ni ö jø dhi øt Deebit ni bwøthge jiy kaamar Jwøk, ni ge caala nyïïatwiel maal mar Wuuö Jwøk mo bwödhö nyïmge.

⁹ Wuuö Jwøk aköö, ni «Dïcäŋöca wïth juurre bëët moo tïïc leny bäät Jerucalem ge raanynya raanynyø.

Luum Kïmmö Kiper Ŋata Cwøp Ki Tøŋ

¹⁰ «Dïcäŋöca, aani, jwïëc met ec ki jwïëc lam kønynya bäät dhi øt Deebit ki bäät jø wø bëëdö Jerucalem. Kanyøgønø geno tïmö ni ge neeta ŋata cwøpge ki tøŋ, ni kïmge kiper gø kaawat man wø kïm dhaanhe bäät nyaare aciel keere mo othøw, ni jwöŋge kiper gø ni yïthge ege keeyø døc kaawat man wø jwöŋ dhaanhe bäät wääde ma kanynye mo othøw.

¹¹ Dïcäŋöca oduuru mano en Jerucalem otïmö ni dwøŋ døc ni caala oduuc jø Adat-Rimmön mana jwøkge pwöl paana cwøl ni Megidø.

¹² Jiy moa en ŋööm paac bäre geno kïmmi, jø dhi øtø man nø geno kïmmi keerge; jø dhi øt Deebit geno kïmmi keerge, ni ö määrge ni kïmge keerge; jø dhi øt Nathan geno kïmmi keerge, ni ö määrge ni kïmge keerge;

¹³ jø dhi øt Libay geno kïmmi keerge, ni ö määrge ni kïmge keerge; jø dhi øt Cimiy geno kïmmi keerge, ni ö määrge ni kïmge keerge;

¹⁴ jø dhøk uudi møga bëët geno kïmmi keerge, ni ö määnni moge thuwø ni kïmge keerge.»