Dhekaraya 11 - Wëël Jwøk

¹ Wui lur Libaanø, jap dhøk odhuule moï, nee jenni moï moa perge leth cam maaci!

² Wui, jenni moa beyø, gööu ko oduuru, kiper jenni moa perge leth apädhö, ni ö jenni moa mïërö ni raanynyi. Wui, jenni mo Baacan na døøŋŋø na teek, gööu ko oduuru, kiper lul mana no odhïŋ aŋøt piny.

³ Cegu ïthu ko oduuru mar dïkwääc dïëk, kiper kar kwaath mana no oløth ni pulli aränynyö! Cegu ïthu ki märö mar ŋuuwe, kiper lur Jördan mana no odhïŋ aränynyö.

Luum Teeŋ Dïkwääc Dïëk Ariiø

⁴ 'Ba Wuuö Jwøk, Jwøk mara, luumma caane jïra beeye en, ena köö, ni «Gwøk pïïth dïëk moa no omooø ki ŋïï kiper ŋaal.

⁵ 'Ba jø wø ŋeew ge wø ŋaalge ŋaalø ni putge aay ni dëëtge bäŋ ajäla. Ni ö jøøa gath ge ni köge, ‹Waana kwär! Pwøc en jï Wuuö Jwøk!› 'Ba dïkwääye moge cwïnyge ba pädhi ki gïrge.

⁶ 'Ba aani thuwø, a na Wuuö Jwøk, cwïnya ba pädhi këët ki gïr jiy moi ni bëëdö yi ŋöömö man en. 'Ba ŋati man nø ocïba cer ŋat atut mare ki nyeya marge, ni ö ŋöömö ni putge gø raanynyø. 'Ba aani ge ba piema ceŋge.»

⁷ Kiper manøgønø, pïïth dïëk moa no omooø ki ŋïï kiper ŋaal agwøa, ni beege dïëk moa näk ocännö døc. Køøre aana lwötö ka athøre ariiø, ni caa nyeŋ mana dïkwøŋ ni Mëër, ni ö nyeŋ maya ni caa gø ni Dwätö; ni puta pïïth dïëk gwøk.

⁸ 'Ba ki yi dwääy aciel, dïkwääc dïëk moa na adäk ariemma. Kiper aana kwierge, ni puta gootø ki geni thuwø;

⁹ ni kööa, na «A ba tïmö ni aana dïkwääy maru këët. Moa näk manynya thøø, thøwge, ni ö moa many ränynyö ni ränyge, 'ba moo dööŋ ni kwøw geno døø rege ni camge rïŋ dëëtge.»

¹⁰ Køøre, athøra mara mana näk nyeŋŋe cwøl ni Mëër alwøra ni toora gø; ni manøgø beeye nyuudhi ki man näk maa raanynya luumma tuuda ki wïth juurre bëët.

¹¹ Aputa raanynyø møn dïcäŋöca, ni ö dïëk moa no ocaarø na bëëdö ni ge køya aani ni putge gø ŋäc ni manøgø beeye dwør Wuuö Jwøk.

¹² Ni caana gø jïge, ni «Ni näk bee gïn mo beer ki jïïu, coollu japa; 'ba ni näk jïïu bäyö, weyu.» Kanyøgønø aana putge cunnö ki gwet-bïrö ma pïëradäk.

¹³ 'Ba Wuuö Jwøk aköö jïra, ni «Leeŋ baŋ dïcwäc dääe,» ni beege gäta mana beer na coolge jïra! Kanyøgø gwet-bïrö moøgø alwøra ni leeŋa ge baŋ dïcwäc dääe yi Øt Wuuö Jwøk.

¹⁴ Køøre riet athøra mara mana näk nyeŋŋe cwøl ni Dwätö alwøra ni toora gø; ni manøgø nyootha ränynyö mar dwätö mana en yïthakic jø Juuda ki jø Icriel.

¹⁵ Ni kö Wuuö Jwøki jïra, ni «Lwør jap tïïc mo dïkwääy dïëk mo jääk.

¹⁶ Kiper aani a tïŋŋa maal yi ŋöömö man ki dïkwääy dïëk mo ba cädö kiper dïëk moa no orwäänyö, wala ki man many moa therø, wala ki man køny moa näk rege da ŋwiili, wala ki man caam moa dëëtge jööt; 'ba eno bëëdö ni cämö ki rïŋ dïëk moa no ojierø, ni cääny okiei moge wøk.

¹⁷ «Otïmö ni leth jï dïkwääy dïëk mo bëëdö ni jääk, ni dïëk ee wiiø! Eni cer cwïïe ki waŋe mana en bäät cwïïe oŋøl ko opëëllö! Cere mana en bäät cwïïe obäp, ni ö waŋe mana en bäät cwïïe ni tïme ni ba rääŋö!»