Daniel 7 - Wëël Jwøk

Kanya Ö Danielli Na Läge Ki Cwëënyi Aŋween

¹ Yi cwiir mana dïkwøŋ mana tïm Belthacörri ni ena nyeny Babiløn, Daniel alägö ki lääk ni jïte ki gïï mo onyoodhø jïre ki yi wïïe kanya bëëde ni ena bäät pëëm niine mare. Køøre eni lääk agöör piny, ni caan gø na ennø nø.

² Eni na Daniel ena köö, ni «Kanya bëëda naa neeta gïïa nyooth jïra ki yi wïïa ki wäär, ajooda ni jam maal kwödö ni cura but piny karge ŋweeri ni ge tuuŋŋa naama dwøŋ.

³ Køøre cwëënyi aŋween mo døøŋŋø ma teeŋi aö wøk ki yi naama dwøŋ manøgø.

⁴ «Cwieny mana dïkwøŋ caala ŋuu, ni jïre da bwöm mo caala mo odhuuth. Aana bëëdö naa raŋŋa gø këël mana ö bwömmi moe ni pudhi wøk, no otïŋ maal no othïïŋö ni cuŋŋö ki tiel ariiø kaamar dhaanhø, ni cïp acaara mar dhaanhø jïre.

⁵ «Køøre riet cwieny mør ajooda mo caala dïb, 'ba eno tïŋ maal ki bwøbe ki løøk aciel, ni dhee da ŋëëdi adäk ki yïthakic lage, ni caani jïre, ni ‹Ö maal ni cämï ki rïŋö mo päl.›

⁶ «Køør manøgø kanya bëëda naa poot rääŋö, aana nëënnö ki cwieny mør mo caala kwac, mo dïŋääe da bwöm aŋween mo caala mo wenyø; cwieny manøgø thuwø jïre da wïdhi aŋween, ni eno mooø ki teek mar käär jiy.

⁷ «Køør manøgø kanya bëëda ki wäär naa poot raŋŋa gïïa nyooth jïra ki yi wïïa, aana nëënnö ki ŋweer cwëënyi mo cwïny bwøk ki gø, mo di lwäärö, mo teek døc, ni jïre da lak mo døøŋŋø ma nywïëny. Kany wø cäme, cam pete petø ni thenh thenh ni løøny geni, ni nyør moa dööŋ ki tiete. Eni ba caal cwëënyi moa dïkwøŋ bëët, ni eni jïre da tuŋi apaar.

⁸ «'Ba kanya bëëda naa caara gïr tuŋi moøgø døc, ka adïëri møn, tuuŋ mør mo thiinh acäŋ tuyö yïthakic tuŋi møga, ni ö tuŋi adäk røk tuŋi moa dïkwøŋ ni pudhi wøk ki tietge nyïm manøgø, ni tuuŋ manøgø jïre da nyeŋ mo caala nyeŋ dhaanhø, ni jïre da dhøk mo cäänö ki luup dhwöle mo døøŋŋø.

⁹ «Kanya bëëda naa rääŋö, wäle acïp piny karge, ni ö Eni Na Nut Yïth Nïr Acääŋŋe ni pï piny bäät wälu mare. Abïï mana en dëëre tar ni caala piiø, ni jïëc wïïe caala jïëc røømmø mo pøøth. Wälu mare bëëdö ni wärri ki leep maac, ni tiet wälu liel ki maac.

¹⁰ Naam ma maac bëëdö ni kwödö ni ööa wøk ki nyïme, ni kum jiy ma kume tïnynya eni, ni kum jiy apaar kwöre ma kume apaar cuŋŋö nyïme, ni ö kwääy løøk ni pï piny, ni ö weeli ni jabi.

¹¹ «Køøre aana bëëdö naa poot rääŋö kiper luup dhwöle moa car tuuŋŋi. Aana bëëdö naa poot rääŋö këël mana ö cwienynyi manøgø ni nääi, ni ö rïŋ dëëre ni leeŋi yi maac mo wärri ni raanynyi.

¹² 'Ba cwëënyi møga, teek marge akäl wøk baŋge, 'ba nïr kwøw moge ameet jïge kiper kany mo okwaanø.

¹³ «Kanya bëëda ki wäär naa poot raŋŋa gïïa nyooth jïra ki yi wïïa, aana nëënnö ki ŋat mo caala Wär Dhaanhø mo öö ki yïth pøøl mo maal, ni ö baŋe, Eni Na Nut Yïth Nïr Acääŋŋe, ni wëëgi ciin nyïme.

¹⁴ Ni cïp teek jïre ka ajiem ki nyec kiper nee wïth jiy bëët ki wïth juurre, ki wïth dhøgi bëët tïmge ni tïnynya eni. Teek mare mar käär jiy beeye teek mo bëëdö na bäre bäre, mo bäŋ cuŋŋe, ni buc nyec mare ba ränynyi.

Kanya Caan Tier Lääk Mana Nyooth Jï Daniel

¹⁵ «'Ba a na Daniel en, aana bëëdö ni jwïëy 'moa kïmmö, ni bëët gïïa nyooth jïra ki yi wïïa ni tuuŋŋa cwïnya.

¹⁶ Ni nyiiga buut dhaanhø aciel røk jiy mo cuŋŋö kaace, ni pëënynya eni ki tiet gïïögø bëët moa näk karge. Kanyøgø acaane jïra ni nyooth tier gïna cään gïïögø kiperge.

¹⁷ Ni kööe, ni ‹Cwëënyi moø ni døøŋŋø na aŋween yøø nyootha nyeye aŋween moo thïïŋ rege bäät piny.

¹⁸ 'Ba jic Jwøa Dwøŋ ni en Maal, buc nyec oci jïge, ni ö buc nyeci manøgø ni tïme na marge na bäre bäre, ki yïth beenhnhe bëët moo ööi.›

¹⁹ «Køøre aana tïmö ni cwïnya manynya gø døc ki man ŋääa adïëri kiper ŋweer cwieny mana näk ba caal cwëënyi møga bëët, na näk di lwäärö døc, na näk lage beeye nywïëny, ni kwök lweete beeye jwïël, ni kany wø cäme, cam pete petø ni thenh thenh ni løøny geni, ni nyør moa dööŋ ki tiete.

²⁰ Ni tïma thuwø ni cwïnya manynya man ŋääa gïr tuŋi moa näk apaar na en wïïe, ki gïr tuuŋ mana cäŋ tuyö, na päth tuŋi moa na adäk nyïme, na näk jïre da nyeŋ ki dhøk mo cäänö ki luup dhwöle ki gïï mo døøŋŋø, ni nëëni kere dwøŋŋa eni dï tuŋi møga.

²¹ Kanya bëëda naa poot rääŋö, tuuŋ manøgø da leny maa këële ki jø Jwøk ni bööt geni,

²² këël kanya ö Eni Na Nut Yïth Nïr Acääŋŋe, eni na Jwøa Dwøŋ ni en Maal, na ööe ni ŋun jiye, ni beeye kanya ö kanya wäŋŋi ki man cïp buc nyec jïge, ge na jiye.

²³ «Køøre acaane jïra na ennø: ‹Ŋweer cwieny tïmö na ŋweer akwöp nyec bäät piny, mo ba caal akwöp nyec møga bëët, ni cam piny bäre, ni nyøøn gø piny ni pet gø na thäŋi.

²⁴ 'Ba mar tuŋi moa näk apaar, nyeye apaar rege othïïŋge ya akwöm nyec manøgø, ni ö nyeya mør ni thïïŋ ree køørge, ni eni ba caal nyeye moa dïkwøŋ, ni ö eni ni bööt nyeye adäk.

²⁵ Ni cääne ki luup dëër Jwøa Dwøŋ ni en Maal, ni dïïm jiy moe, Eni na dwøŋ ni en maal, ni cäde ki man wiil kwöra wäŋŋi ki ciik, ni ö jic Jwøk ni cïbi cere ki cwiiri adäk ki thääŋö.

²⁶ « ‹'Ba kwääc løøk kanyo pï piny kiper ŋøl luup, teek mar nyenynyøgø di lwørø ni raanynyi na bäre bäre.

²⁷ Køøre teek mar käär jiy, ki dööŋö bäre mar akwöp nyec mo bäät piny put ka cïp ceŋ jic Jwøa Dwøŋ ni en Maal. Buc nyec mar Jwøa Dwøŋ ni en Maal beeye bura mo bëëdö na bäre bäre, ni ö jøøa en teeki ceŋge ni tïnyge eni ni wïnyge mare.›

²⁸ «Kar kaagø gïna nyooth athum. 'Ba a na Daniel en, acaara mara abëëdö ni tuuŋŋa cwïnya, ni ö täärnyïma ni needuk; 'ba luubö manøgø abëëdö ni yaa kan cwïnya.»