Daniel 6 - Wëël Jwøk

Kanya Leeŋ Daniel Yi Buur Ŋuuwe

¹ Kanyøgø anëënö ni beer jï Dariöc ki man kwänye ki jiy ma dïpa ki pïërariiø na dïbwöthe mo akwöm nyec mare kiper nee akwöm nyec mare bëëde ni ena ceŋge;

² ni wïth jøøgø da kwääri adäk, na aciel rege beeye Daniel, ni luum dïbwöthe moøgø ena ceŋge, nee jap nyeya ba rwäänyge.

³ 'Ba Daniel manøgø atägö ki man nëëne ni ena maal ki kwääri moøgø ki dïbwöthe, kiper dëëre da jwïëy mo ena kur keere, ni ö nyeya ni cïp luum gø piny ki man røøny gø bäät akwöm nyec mare bäre.

⁴ 'Ba kwääri moøgø ki dïbwöthe gena tägö ki man määnyge ki luubö mo kïthge bäät Daniel kiper bëëtö mare yi kwär mar akwöm nyec; 'ba geni bäŋ luubö mo ege joodø mo kïthge bäät gø, wala gïn mo obøth, kiper eni mare adïëri ni bäŋ tïïc mo ee taaø wala gïn mo obøth mo ojoodø baŋe.

⁵ Køøre jøøgø gena köö, ni «Ø ba doo jïtö ki luubö mo kïthø bäät Daniel manøgø ni näk mo paa gïn mo ena ri ciik Jwøk mare.»

⁶ Kanyøgø kwääri moøgø ki dïbwöthe, gena ö baŋ nyeya ni rege ege kuurö na dhøk ni köge, ni «Wui nyeya ma Dariöc, ïïno bëëdö na bäre bäre!

⁷ Kwääri bëët mo akwöm nyec man, ki jø kööre, ki dïbwöthe, ki jø ŋøl luup, ki jøøa en løøe ceŋge, dhøkge akuurge na aciel kiper nee ï na nyeya niï kännï wøk ki ciik mo di cemø mo kïtha bäät tïïc, ni manøgø beeye ni ŋato lämö ki jwøk mør yïth nïne moø ni pïëradäk ni en nyïm yøø, wala lama dhaanhø mør ni paa ïïni, ï na nyeya en, eni wär put leeŋ yi buur ŋuuwe.

⁸ Ennø, ï na nyeya en, kän wøk ki ciik mo gööra piny, ni kïthï ŋïï marï bääte kiper nee ba wiil, ni tïïyï ka køør ciik mo jø Mëdön ki mo jø Parca na ciik mo ba pät.»

⁹ Kanyøgø nyeya ma Dariöc ŋïï mare akïth bäät ciik manøgø mana göör piny.

¹⁰ 'Ba kanya ö Danielli na nø ŋäc gø ni wëël ciik ŋïï onø kïth bääte, ena put bëëtö ni dønynya yi øde mana en maal mana näk dhøk awëërnyeŋŋi moe ojabø jï løøa dïët ki Jerucalem, ni ki dïcäŋ aciel eni lämö ki kwöre adäk ni cøŋŋe ee këël piny, ni eni dwøga met ec jï Jwøk mare, kaawat man wø tïïe dïkwøŋ.

¹¹ Køøre jøøgø gena öö ni rege ege kuurö na dhøk, ni jootge Daniel ni lämö ni pëënynya Jwøe kiper køny.

¹² Køøre jøøgø gena ci nyïm nyeya ni cäänge ki gø kiper ciik moa käl nyeya wøk, ni köge, na «?Aŋø, ï kär kän wøk ki ciik na bëëde ni ŋato lämö ki jwøk mør yïth nïne moø na pïëradäk yøø, wala lama dhaanhø mør ni paa ïïni, ï na nyeya en, eni wär put leeŋ yi buur ŋuuwe?» Ni løgi ya nyeya ni kööe, ni «Yaa, manøgø beeye ciik mo ocemø ni teek, no otïïö ki køør ciik mo jø Mëdön ki mo jø Parca na ciik mo ba pät.»

¹³ Ni putge gø dwøgø nyïm nyeya ni köge, ni «Wui nyeya, Daniel na en røk jøøa mak ki tøŋ Juuda, ïïna taae, ni taak ciik moa göörï piny, ni eni poot bëëdö ni lämö ki dïcäŋ aciel kwöre adäk.»

¹⁴ 'Ba kanya ö nyeya na wïny luummögø ennø, kööre aput pädhö, ni løø wïïe baŋ acaara man piem Daniel ki gø, ni maaŋ dëëre nee jïte ki jöö man køny gø ki gø këël mana päth cäŋŋi.

¹⁵ Køøre jøøgø aci baŋ nyeya ni rege ege kuurö na dhøk ni köge, ni «Wui nyeya, beerra man ŋäyï gø ki man näk mo ï na nyeya en teeŋ ciik mana kälï wøk ki køør ciik mo jø Mëdön ki ciik mo jø Parca ba løny ki man wiili.»

¹⁶ Kanyøgø nyeya aput cïpö ki dwøl, ni ö Danielli ni øømmi ni puti leeŋ yi buur ŋuuwe. Ni kö nyeya jï Daniel, ni «Jwøk marï ni wø tïnynyï cooth, eni ki dëëre ïïno pieme.»

¹⁷ Ni ö kïdi ni puti øømmø ni dëët dhi buur ki gø, ni puti ya nyeya mwön ki ŋïï mare ki ŋïï mar jø kööre moe, nee bäŋe gïn mo wiil ree kiper Daniel.

¹⁸ Køøre nyeya adøø paan dwøŋ mare, ni thöör wäär bäre ni bäŋ gïn mo ee camø, ni bäŋ gïn mïn yie ki gø mo okäl baŋe, ni käre løny jïre ki man bute.

¹⁹ 'Ba kanya ruu øwi ennø, nyeya apäny maal ni laar ci bäät buur mar ŋuuwe.

²⁰ 'Ba kanya tïm kare ni cään ki buur mana en Danielli yie, ena cwötö døc ki dwør pänh cwïny, ni kööe jï Daniel, ni «?Daniel, ï na dhaanh Jwøa kwøw, Jwøk marï ni wø tïnynyï cooth aløny jïre ki man piem ïïni dhøk ŋuuwe?»

²¹ Ni dwøgi ya Danielli jï nyeya, ni «Wui nyeya, ïïno bëëdö na bäre bäre!

²² Jwøk mara nyïïatwiel maal mare ajääŋŋe ni mec dhøk ŋuuwe, ni kärge dëëra mooø ki ŋwellø, kiper aana joot ni bäŋ gïn mo yaa baaø nyïme, ni bäŋ gïn mo raac mo yaa tïïö dëërï thuwø, ï na nyeya.»

²³ Kanyøgø nyeya yie atïmö ni met døc, ni put cïpö ki dwøl nee Daniel käl wøk ki yi buur. Køøre Daniel aput käl wøk ki yi buur, ni bäŋ ŋwellø mo ojoodø dëëre na bäre, kiper mana bëëde ni ŋäätha Jwøk mare.

²⁴ Køøre nyeya aput cïpö ki dwøl, ni øøm jøøa kïth bäät Daniel ki luum tööt ni leeŋ geni yi buur ŋuuwe, geni ki määrge ko obwöre moge. 'Ba kanya pootge ni ge poot kär pïï tier buur piny, ŋuuwe aput päär bäätge ni put cuu moge bëët tøyø na thäŋi.

²⁵ Køøre nyeya ma Dariöc aput gööt baŋ wïth jiy ki wïth juurre, ki wïth dhøgi, jø wø bëëdö yi ŋöömö bëët, ni kööe, «Bëët-mëër opälli jïïu!

²⁶ «Ennø, aana kän wøk ki ciik: Jiy bëët moa en ya akwöm nyec mara bëëtge ni ge lwäära Jwø Daniel ni dëëtge kwanynyi nyïme.» «Kiper beeye Jwøa kwøw ni wø bëëdö na bäre bäre, ni buc nyec mare beeye man wø bëëdö ni ba ränynyi, ni teek mare bëëdö na bäre bäre.

²⁷ Eni jiy di piemø ni køny geni, ni tïïe ki nyuuthe ki gïï mo rëëma ec maal ki piny, eni na piem Daniel ceŋ ŋuuwe.»

²⁸ 'Ba Daniel, ena bëëdö ni bëëtö mare beer yïth cwiiri moa beet nyeya ma Dariöc, ki yïth cwiiri moa beet nyeya ma Kiröc nyï Parca.