Daniel 3 - Wëël Jwøk

Luum Kït Gïr Lam Mana Cwöth Piny

¹ Nyeya ma Nabukedenecör atïïö ki gïn ma kït gïrpiny mar warkey mo bäye beeye gööye ma pïërabïciel, ni bär mar deŋŋe beeye gööye abïciel; ni cwöth gø piny yi pwöl Dura yi ŋööm jø Babiløn.

² Køøre eni na nyeya ma Nabukedenecör, ena jäägö ki dwøl ki man cooŋ kwääri, ki jø jääk, ki jø kööre, ki jø wø cïpi ka acaare, ki jø wø gwøk jap kwär, ki jø wø en løøe ceŋge, ki jø wø ŋøl luup, ki jø paac bëët moa näk ocuumö, nee öge ki man cïpge kït gïrpiny manøgø kur keere, gïna näk ee cwöth piny.

³ Kanyøgø kwääri, ki jø jääk, ki jø kööre, ki jø wø cïpi ka acaare, ki jø wø gwøk jap kwär, ki jø wø en løøe ceŋge, ki jø wø ŋøl luup, ki jø paac bëët moa näk ocuumö, rege aputge cooŋ ki man cïpge kït gïrpiny manøgø kur keere, gïna cwöth nyeya piny ma Nabukedenecör; ni cuŋge nyïm kït gïrpiny manøgø na cwöth nyeya piny ma Nabukedenecör.

⁴ Køøre nyïïatwiel marge luubö aput gøø piny ni dwøre ena maal: ni «Wui, u na wïth jiy ma teeŋi, ki u na wïth juurre, ki u na wïth dhøgi, man beeye gïna kööm uuni ki gø nou tïïyu:

⁵ Kanyo wïnynyu dwør tuuŋ ennø ki dwør opelø, ki dwør thoom, ki dwør thoom-othïënhö, ki dwør buul, ki dööt wïth jap meeŋ bëët, cøŋŋu wär putu këël piny nou wøøra kït gïnögø no otïïö ki warkey enø na cwöth nyeya piny ma Nabukedenecör.

⁶ 'Ba ŋato ba këël cøŋŋe piny ni wøør gø, eni put ka leeŋ yi maac mo orubö ni wärri.»

⁷ Kanyøgø nø, kanya ö jiyi bëët na wïnyge dwør tuuŋ, ki dwør opelø, ki dwør thoom, ki dwør thoom-othïënhö, ki dwør buul, ki dööt wïth jap meeŋ bëët, wïth jiy bëët, ki wïth juurre, ki wïth dhøgi, cøŋge aputge këël piny ni ge wøøra kït gïnögø no otïïö ki warkey enø na cwöth nyeya piny ma Nabukedenecör.

⁸ 'Ba kar kaagø, da jø Kaldia ma ö nyïm ni ge kïtha bäät jø Juuth ki luubö.

⁹ Ni köge jï nyeya ma Nabukedenecör, ni «Wui nyeya, ïïno bëëdö na bäre bäre!

¹⁰ Wui nyeya, ïïni, ïïno kän wøk ki ciik ni ŋato wïny dwør tuuŋ, ki dwør opelø, ki dwør thoom, ki dwør thoom-othïënhö, ki dwør buul, ki dööt wïth jap meeŋ bëët, eni cøŋŋe wär put këël piny ni wøøra kït gïna näk otïïö ki warkey.

¹¹ 'Ba ŋato ba këël cøŋŋe piny ni wøør gø, eni put ka leeŋ yi maac mo orubö ni wärri.

¹² 'Ba da jø Juuth mo iï røønyø na jø käär ŋööm Babiløn, ni beege Cidarak, ki Micak, ka Abedenagø. Wui, ï na nyeya, jøøi ii, luummï ba wïnyge. Geni juu moï ba tïnyge, ni kït gïna näk otïïö ki warkey na cwödhï piny ba wøørge.»

¹³ Kanyøgø Nabukedenecör dwøl aput cïp, ni eno wëër ni cwïnye okëënynyö, ki man øøm Cidarak, ki Micak, ka Abedenagø; køøre jøøgø akïth nyïme, eni na nyeya.

¹⁴ Ni kööe jïge, ni «?Ï na Cidarak, ki ï na Micak, ki ï na Abedenagø, beeye adïëri døøc nou bëëdö ni juu 'moa ba tïnynyu, ni kït gïna noo tïïö ki warkey na näk yaa cwöth piny ba wøørru?

¹⁵ Ennø, ni näk mo rou you jiiŋŋø, kanyo wïnynyu dwør tuuŋ, ki dwør opelø, ki dwør thoom, ki dwør thoom-othïënhö, ki dwør buul, ki dööt wïth jap meeŋ bëët, ni putu cøŋŋu këël piny ni wøørru kït gïna näk yaa tïïö ki warkey, wøp; 'ba ni näk mo ba wøørru, kawaane waane en u put ka leeŋ yi maac mo orubö ni wärri. ?'Ba a jwøa ŋø nø noo piem uuni cera?»

¹⁶ 'Ba adwøk Cidarak, ki Micak, ka Abedenagø ni köge jï nyeya, ni «Wui, Nabukedenecör, wa ba many gø nee dëëtwa thääkwa nyïmï ki luummögø.

¹⁷ Ni näk mo wa leeŋa yi maaøgø no orubö ni wärri enø, Jwøk marwa ni tïnywa en, løny jïre ki man piem waani yie, ni wa pieme cerï, ï na nyeya.

¹⁸ 'Ba këël ni näk mo wa ba pieme, beer ki man ŋäyï gø, ï na nyeya, ki man näk mo juu moï ba tïnywa, ni ba løny ki man wøørwa kït gïna näk otïïö ki warkey na näk iï cwöth piny.»

Luum Jøøa Na Adäk Na Leeŋ Yi Maac

¹⁹ Kanyøgø Nabukedenecör wëër aput kadhø cwïnye, ni ö täärnyïme ni put ree wiil ni cøl ki Cidarak, ki Micak, ka Abedenagø. Ni cïpe ki dwøl nee maac rup døc ni wärri, nee lïëth mare pöödhe ki kwöre abïriiø ni kaala lïëth man wø bëëde.

²⁰ Køøre eni, jiy møøk moa teek mo ena røk jø leny moe aköömme ki man twöcge Cidarak ki Micak ka Abedenagø kiper nee ge leeŋ yi maa no orubö ni wärri enø.

²¹ Kanyøgø jøøgø gena put twöc na abïïe moge ena dëëtge, këël ka abïïe moa näk ege meen wïthge, ni putge leeŋ yi maaøgø no orubö ni wärri enø.

²² 'Ba kiper mana näk dwør nyeya ee put joon døc, ni maaøgø bëëdö no oäpö ni lïëth døc, jøøa kïth Cidarak ki Micak ka Abedenagø yi maac, gena put leep maaci waaŋ.

²³ 'Ba Cidarak ki Micak ka Abedenagø, ge na adäk yøø, gena put päth yi maaøgø ni wärri enø, ni ge poot no otwöö karge.

²⁴ Kar kaagø nyeya ma Nabukedenecör yie aput thäŋŋö, ni päny maal ni yie orëëm, ni pëëny jø wø cïpi jïre ka acaare, na «?Aŋø, paa jiy adäk na bëëde na leeŋø yi maac no otwöö?» Ni løkge gø jï nyeya ni köge, ni «Wui nyeya, beeye kare.»

²⁵ Ni dwøk gø ni kööe, ni «Neennu, jiy mo neeta ii gena aŋween mo ge kär twöö mo ge cäädhö dï maac mo bäŋ gïn mo leth mo otägö dëëtge; 'ba ŋweerge nëëni ni caala jwøk.»

²⁶ Kanyøgø Nabukedenecör anyiik buut dhi kanya näk maac orubö yie ni wärri, ni put dwøre tïŋ maal døc ni cwöte, ni «Cidarak ki Micak ka Abedenagø, u ni wø tïny Jwøa Dwøŋ ni en Maal, ööu wøk ni ööu kany!» Køøre Cidarak ki Micak ka Abedenagø, gena put ö wøk ki yi maac.

²⁷ Ni ö kwääri ki jø jääk, ki jø kööre, ki jø wø cïpi ka acaare jï nyeya ni putge rege cooŋ kanya ciel lak jøøgø, ni jootge gø ni maac dëët jøøgø käre mooø ki ŋwellø, ni jïëc wïthge kär waaŋ, na abïïk dëëtge rege kärge miinynyø, ni dëëtge kär ŋwääö ki jïc maac.

²⁸ Kanyøgø Nabukedenecör aput köö, ni «Pwøc en jï Jwø Cidarak, eni ki Micak ka Abedenagø, Jwøa jääŋ nyïïatwiel maal mare na piem jiye, jøøa ŋääth eni. Geni, dwør nyeya akwierge, ni per dëëtge kär leth jïge, ni kweerge ki man tïnyge jwøk mør wala ki man wøørge gø, 'ba beeye Jwøge keere.

²⁹ Kiper manøgønø, aani, ciik man ŋøla beeye en: Noo dee jiy, ki wï jur, ki wïth dhøgi møøk mo cäänö ki luubö mo paa kare dëër Jwø Cidarak ki Micak ka Abedenagø, ge di tøyø na bulli, ni ö uudi moge ni tïï na wïthur. Kiper ki man bëëde cøøn en, bäŋ Jwøk mo jiy ee piemø ki øtjöö mo caala man nø.»

³⁰ Køøre nyeya kwär mar Cidarak ki Micak ka Abedenagø aput nyiik maal yi ŋööm jø Babiløn.