Daniel 11 - Wëël Jwøk

¹ «'Ba kanya tïme na yi cwiir mana dïkwøŋ mana tïm Dariöc nyï Mëdön ni ena nyeya, aana cuŋŋö kara naa cwaga eni naa gëëŋa eni.

Luup Nyeya Mar Jï Løø Tier-Piny Ki Mar Jï Løø Wï-Piny

² «'Ba ennø, adïëri caana caanø jïrï. Ka adïëri møn, nyeye adäk møøk rege thïïŋge thïïŋö yi Parca. 'Ba ŋweerge mano caath køørge okwär døc ni kaala møga bëët. 'Ba kanyo joot teek mare ennø ki køør kwärö mare, yïth jiy di theŋø ki man këëtge ka akwöm nyec mar jø Gïrïïk.

³ Køøre nyeya mo teek, dëëre di thïïŋö ni käär piny ki teek mo dwøŋ, ni bëëde ni tïïya mano manynye jaak.

⁴ 'Ba kanyo thïïŋ dëëre ennø, akwöm nyec mare di petø ni pääŋŋi na kwöre aŋween, no odïëdö ki but piny, ni ba ci jï jø okäl dëëre, ni jø oci teeki jïge, teek marge tïmö ni ba caal teek mana en jïre dïkwøŋ. Kiper akwöm nyec mare cööda wøk ni mëëgi jø møøk ni paa jø okäl dëëre.

⁵ «'Ba nyeya mano en jï løø Tier-Piny tïmö ni teek. 'Ba dhaanhø aciel røk wïth jø leny moe, tïmö ni teek døc ni kaala eni, ni lwør akwöm nyec ni käär gø ki teek mo dwøŋ.

⁶ 'Ba noo tïme na køør cwiiri møøk, nyeya mar jï løø Tier-Piny ki nyeya mar jï løø Wï-Piny dhøkge kuurge kuurö, ki køør mano ö nyeya mar jï løø Tier-Piny noo biel nyaare jï nyeya mar jï løø Wï-Piny ni marge tudö ki luum mëër. 'Ba nyaanøgø mëër mano tuut ki køøre ba thur kare, ni cwøre ki teek mare ba ruu. 'Ba nyaanøgø di nääö, ki cwøre, ki nyilaal mare, ki ŋato caam eni yïth nïne moøke.

⁷ «'Ba dhaanhø aciel røk tuuŋ nyaanøgø dëëre di thïïŋö na nyeya mar jï løø Tier-Piny ni tuk lwaa leny mo nyeny Wï-Piny ni døny kar gwøk røk mar gø. Eni këëdö ki geni ni bööde.

⁸ Eni thuwø juu moge mo tïïc ka nywïëny na kït gïï wø lam, ki jap paac mo perge leth mo tïïc ka gwel-bïrö ki warkey twiere twierø ni kïth geni Ijep. Køøre eni bëëdö ki cwiiri ni nyeny jï løø Wï-Piny ba tuue.

⁹ Køøre cään, nyeya mar jï løø Wï-Piny cøø ni tuk po nyec mar nyeny jï løø Tier-Piny; 'ba eni di dwøgø ki teek ni døø paac mare.

¹⁰ «Køøre wääte dëëtge jiiŋge jiiŋŋø kiper leny, ni cooŋge wïth lwaa lenye mo thööth, ni ö dhaanhe acielli dïge ni baap geni kaamar jwïëö ni pöödhe ki leny këël mano pïïe kar gwøk røk mar ŋatøce.

¹¹ 'Ba nyeny jï løø Tier-Piny cwïnye jïtö ki wëër mo dwøŋ, ni cøøe ni këëde ki nyeny jï løø Wï-Piny, ŋato cooŋ lwaa leny mo dwøŋ. 'Ba lwaa leny manøgø poot cïba cer ŋata këëtge ki gø.

¹² 'Ba kanyo ö lwaa leny manøgø noo maai ki tøŋ, nyeny jï løø Tier-Piny cwïnye jïtö ka atöör mo ena maal døc, ni 'näk jiy ma kume. 'Ba eni ba böödö.

¹³ Kiper nyeny jï løø Wï-Piny cäŋa määnyö ki lwaa leny mør mo pälla eni ki mana dïkwøŋ. 'Ba kanyo tïme na køør cwiiri møøk, eni öö ki lwaa leny mo päl, mo dëëtge päŋ ki jap leny.

¹⁴ «'Ba noo tïme na kar kaace, jiy mo thööth dëëtge othïïŋge dëër nyeny jï løø Tier-Piny, ni ö jiyi moa wïnni dëët jø pou ni thïïŋge rege, ni ge wëëga lääk thur karge. 'Ba marge ba thur kare.

¹⁵ Køøre nyeny jï løø Wï-Piny öö ni thør dëër kiir ki ŋääe ni thøra gø maal, ni mak kiir mo ogeerø ni teek. 'Ba lwaa leny mar jï løø Tier-Piny ba cuŋŋi, këël lwaa leny mana no ojierø. Kiper tïmö ni bäŋ teek jïge ki man cuŋge.

¹⁶ 'Ba ŋato tuk paac tïmö ni tïïya mano met yie ki gø, ni bäŋ ŋat mo løny jïre ki man cuŋŋe ki gø. Eni tiere këëlle piny yi ŋööm wø cwøl ni Mïërö, ni cere da teek man raany paac ki gø.

¹⁷ Køøre eni nyïme løøe baŋ man ööe ki lwaa leny mar akwöm nyec mare bäre, ni kuurge dhøkge ki nyeny jï løø Tier-Piny. Ni bëët baŋ gø ki nyey, kiper nee akwöm nyec mar gø jale. 'Ba acaara mana näk ee cïp piny ba thur kare, ni eni ba kønye.

¹⁸ Køøre eni nyïme løøe baŋ jø wø bëëdö bäät näm, ni mak jiy mo thööth. 'Ba kwääc lwaa leny, apääda mar gø raanynye raanynyø, ni dwøk apääda manøgø wï gø.

¹⁹ Køør manøgø, nyïme løøe baŋ kiiri mo poge moa no ogeerø ni teek. 'Ba eni di böötö, ni ba joot këët.

²⁰ «'Ba da ŋat mo dëëre di thïïŋö kare, ni jääk wøk ki jiy baŋ ajwäk, nee kwärö mar akwöm nyec mare meede. 'Ba ki køør nïne mo nøk eni di nääö, ni paa nyïm jiy wala ri leny.

²¹ «'Ba da dhaanhø mo ojarø mo dëëre di thïïŋö kar gø, na ŋat mo eni tøør ri tuuŋ nyec. Eni öö kany mo kär caarø ni mak nyec ki dhøk mo pøøth.

²² Ni ö lwaa leny mo piny ee baabø ni gwaar ge nyïme kaamar jwïëö, ni raany geni, këël Kwääy Lam Mana Dwøŋ mar Jwøk.

²³ 'Ba kanyo nø tude ki jiy, jøøgø cøøge cøøgø, ni thïïŋ dëëre, ni jïte ki teek këël na bëëde ni jiy moa en dëëre nøk.

²⁴ Kanyo tïme ni mïëri moa no okwär ge bëëdö ka bëët-mëër, cøø ni tuk geni, ni tïïc gïn mo kär kwøŋ wëëkge tïïc wala kwäye. Ni ö jammi moa twier ki moa peec ni pääŋ ge yïthakic jiy moa en dëëre. Ni ö eni ni cïp piny ka acaara ki man raany kiiri moa no ogeerø ni teek; 'ba beeta kany mo thiinh keere.

²⁵ «'Ba eni cwïnye di mooø ki cer, ni cøm cwïnye, ni cøøe ki lwaa leny mo päl ki man këëde ki nyeny jï løø Tier-Piny. 'Ba nyeny jï løø Tier-Piny tøŋ di tïŋö ki lwaa leny mo päl mo teek døc. 'Ba eni ba løny ki man cuŋŋe, kiper acaay aranya onø cïp piny kipere.

²⁶ 'Ba jø wø cämö buute ki came na met, eno raanyge, ni ö lwaa leny mare ni riemi, ni ö mo thööth ni nääi.

²⁷ 'Ba nyeye moø na ariiø yøø, cwïnyge oløøge baŋ gïn mo raac, ni pïge piny kar acooŋa, ni ö ŋati man nø ni cään watge ki tööt. 'Ba bäŋ gïn mo thur kare. Kiper aŋuunne poot öö kanya no owäŋŋö.

²⁸ Køøre nyeny jï løø Wï-Piny duua poge ni käädö ki jap kwärö mo thööth. 'Ba cwïnye bëëdö ni ee løø kuna raany lam mar jø Jwøk. Eni tïïö ki gïrpiny dëër lamøgø, ni ö eni ni døø poge.

²⁹ «Kanyo tïme na kanya wäŋŋi, eni cäŋa cøø ni tuk paana en jï løø Tier-Piny, 'ba kar kaagø, gïno tägi, tïmö ni ba caal mana dïkwøŋ.

³⁰ Kiper baabuure mo jø Kitim këëdö ki eni, ni ö eni ni bwøk cwïnye. Køøre eni duuö ni cwïnye da wëër ki lam mar jø Jwøk, ni tïïe ki gïrpiny dëër gø, ni duue ni nyooth mëër jï jøøa wec lamøgø.

³¹ «Ni ö lwaa leny mana en dëëre ni thïïŋge dëëtge dëër kar lam na näk ogeerø ni teek, ni mänge olämme mo wø cïp cooth. Køøre geni gïna näk ec raac ki gø døc na näk gïr ränynyö, cwöthge piny.

³² 'Ba eni jiy moa kwier lam mar jø Jwøk di cøøgø ki luup mo pøøth ki man käl geni løøe. 'Ba jiy moa ŋäc Jwøge ge bëëdö karge ni ge teek, ni dhäthge jïre.

³³ «'Ba dïbwöthe moa wïthge leer, ge cïpö ki pwöc jï jiy mo thööth. 'Ba geni, ge di nääö ri leny, ni waaŋ møøk ki maac, ni mak møøk ki tøŋ, ni twier møøk ki kany mo bäär mëëth.

³⁴ 'Ba kanyo bëëtge ni ge thøwø, ge na jic Jwøk ge jïtö ki køny mo thiinh, ni ö jiyi mo thööth ni dwätge ki geni ki dhøk mo pøøth.

³⁵ 'Ba jiy møøk røk jøøa wïthge leer, ge päänhnhö møn ki thøø, kiper nee jiy døøc mo waany, ni tar, ni tøŋ, këël kanyo pïïe ya aŋuunne. Kiper aŋuunne poot öö kanya no owäŋŋö.

Luum Nyeya Mano Tïŋ Dëëre Maal

³⁶ «'Ba nyeya tïmö ni tïïya gïno met yie ki gø jaak, ni tïŋ dëëre maal ni dwøŋŋa eni bäät juu bëët, ni cääne ki luup mo thäŋa ec dëër Jwø wïth juu. Eni bëëdö ni bëëtö mare othur kare, këël kanyo ö kar wëër mar Jwøk noo pääŋe, kiper gïna no onøŋøl, tägö møn.

³⁷ Eni gïr juu mo kwäye ba kïth ïthe, wala jwøa mëër määnni ki gø, ni gïr jwøk mør jaak ba kïth ïthe. 'Ba eni dëëre døøye mo dwøŋ bäätge bëët.

³⁸ Ni ki mana dee ge wøørø, eni tïmö ni wøøra jwø wø gëëŋ kwör gwøk røk, na jwøk mo kuc kwäye noo wøøre ki warkey, ki gwel-bïrö, ki nyeŋ kïte mo perge leth, ki muuce mo perge leth.

³⁹ Ni ö eni ni tuk kwör gwøk røk moa teek ki køør køny mar jwøk mo path, ni ö eni ni wøør jø wø jïëc mare, ni tïïc geni na kwääri bäät jiy mo thööth, ni pääŋ ŋøøm jïge na gïr mïn ec.

⁴⁰ «'Ba noo tïme na aŋuun nïne, nyeny jï løø Tier-Piny cwïny nyeny jï løø Wï-Piny di cwøbø. Køøre nyeny jï løø Wï-Piny jïëth leny mo wø tut okwëënyi, ki jø wø këëdi ki bäät okwëënyi, ki baabuure mo thööth mo leny, di kälö kaamar atuunna, ni tuk mïëri, ni baap geni kaamar jwïëö.

⁴¹ Ni ö eni thuwø ni tuk ŋööm wø cwøl ni Mïërö. Ni ö mïëri mo thööth ni päthge; 'ba Ëdöm, ki Möap, ki jøøa näk wïth jø Amön, ge di piemø dhi cere.

⁴² 'Ba eni cere kïthe dëët mïëri møøk, ni ŋööm Ijep ba bøth.

⁴³ 'Ba eni jïtö ki teek bäät jap kwärö mo warkey, ki mo gwel-bïrö, ki bäät jammi moa perge leth bëët mo Ijep, ni ö jø Libya ki jø Ithiöpia ni caathge køøre.

⁴⁴ 'Ba eni cwïnye otïmö ni pärö ki waac moo wïnyi ki jï løø kur tuul-cäŋ, ki jï løø wï-piny, ni cøøe ki wëër mo dwøŋ ki man raany jiy mo thööth ni dïïra wïthge.

⁴⁵ Ni cwöth oduŋkaare mo nyec moe piny yïthakic naama dwøŋ ki Kïn Jwøk na mïërö na en kur keere. 'Ba eni poot thøw, ni bäŋ ŋat mo køny eni.