Daniel 10 - Wëël Jwøk

Kanya Ö Danielli Na Läge Ki Dhaanhø

¹ Kanya tïme na ri dää cwiiri moa beet Kiröci ni ena nyeny Parca, da dwøl moo nyoodhø jï Daniel ni wø nyeŋŋe cwøl ni Belthacacör, ni dwørøgø beeye adïëri ni cäänö kaper leny mo dwøŋ. 'Ba tier dwørøgø akwanye, ni nyooth jïre ka yïth lääk.

² Kar kaaca, a na Daniel, aana bëëdö naa kïmmö ki juu adäk.

³ Aana bëëdö ni bäŋ cam mo met mo yaa camø, ni bäŋ rïŋö wala køøŋø mo yaa gudö ki dhaa, ni bäŋ maaw mo yaa wïïr dëëra na bäre bäre këël kanya thum juuwi moøgø na adäk yøø.

⁴ 'Ba kanya tïm nïr dwääyi mana dïkwøŋ na pïërariiø ka aŋween, kanya bëëda naa ena bäät ageel naama dwøŋ ni wø cwøl ni Thëgerø,

⁵ aani nyeŋŋa ataa maal ni räŋŋa, ni jooda dhaanhø mo oruyö ka abïï ma lïïna, mo piere ee töönynyö ki kaa warkey mana tøŋ mo käli ki yo Upath.

⁶ Eni dëëre bëëdö ni paŋŋi, ni täärnyïme nëëni kaamar agaackøth, ni nyeŋŋe caala ameethi mo liel, ni bäädi moe ko otweege, paŋŋi kaamar jwïël mo othoodhø, ni ni luube, dwøre caala dïlweel mar jiy mo thööth.

⁷ 'Ba a na Daniel, bee a keera na joot gïna nyooth, ni jiy moa nut buuta gïna nyooth kärge joodø; 'ba lwär mo dwøŋ aö bäätge, ni reŋge ni ge kana rege.

⁸ Kanyøgø aana dööŋ a keera naa raŋŋa gïna nyooth manøgø ni thääŋ ec enø. Køøre aput tïmö ni bäŋ teek mo odööŋ dëëra, ni ö täärnyïma ni wiil ree kaamar nyïm dhaanhø mo othøw, ni bëëda ni bäŋ teek dëëra.

⁹ 'Ba aani dwør dhaanhø manøgø awïnynya, 'ba kanya wïnynya dwøre ennø mana caane, aani nyeŋŋa aput gämmö døc ni täärnyïma yaa këël piny yïth ŋøøm.

¹⁰ Kanyøgø cenø aana put gut ni cïp aani bäät cøŋŋa, ni ceŋŋa yaa këël piny ni dëëra miel.

¹¹ Ni kööe jïra, ni «Wui Daniel, ï na näk dhaanhø mo owøørø døc, kwany tier luubö man døøc mano caana jïrï, ni cuŋŋï niï tiir, kiper ennø aani, a jääŋŋa baŋï.» 'Ba kanya nø caan luummögø jïra, aana put ö maal ni dëëra miel.

¹² Ni kööe jïra, ni «Daniel, kärï lwäyö, kiper ki mana täge ki dïcäŋa dïkwøŋ na këëllï cwïnyï køør man ŋäyï tier gïna nyooth, ki mana dwøgï dëërï piny nyïm Jwøk marï, luup moï awïnynyi, ni beeye ni ööa ennø kiperge.

¹³ 'Ba nyïïatwiel maal man wø koor buc nyec mar Parca, dëëre athïïŋe dëëra ki nïne ma pïërariiø ka aciel. Køøre Mikaël, eni na kwäärö aciel dï kwääc nyïïatwiet maal, aö kuna køny aani, kiper aano maa piny kaace buut nyeny Parca.

¹⁴ 'Ba ennø, a ööi kaper nee gïno tägi dëët jiyï yïth nïro en nyïm nee tiere tïme ni ŋäyï, kiper gïna nyooth cäänö kaper nïne mo poot ena nyïm.»

¹⁵ 'Ba kanya bëëde ni cäänna aani ki luupögø, wïïa aputa kuul piny ni dhaa kära jaalø.

¹⁶ Køøre ŋat mo nëëni kaamar dhaanhø dhaa agude, ni puta dhaa jap ni cäänna ni kööa jïre, eni na cuŋŋö nyïma, ni «Wui kwääya, ki køør gïna nyooth manøgø, lwär mo dwøŋ aö bääta, ni bäŋe teek mo odööŋ dëëra.

¹⁷ ?A na laŋŋï en, lønye jïra nidïï ki man cääna ki teeŋ ïïni, ï na kwääya en? Kiper aani bäŋ teek mo odööŋ dëëra ennø, ni jwïëy mara teek.»

¹⁸ Kanyøgø ŋatøgø ni caal dhaanhø enø, aana cäŋ gutö, ni mooc aani ki teek.

¹⁹ Ni kööe, ni «Wui dhaanhø, ï na näk owøørø døc, kärï lwäyö. Bëëdï ni dëërï jööt. Bëëdï niï teek, ni cwïnyï da cer.» 'Ba kanya nø cään aani ennø, aana put jïtö ki teek, ni kööa, ni «Kwääya, beerra man caanï gïna diï caanø, kiper ïïni, dëëra amooyï ki teek.»

²⁰ Kanyøgø ena köö, ni «?Gïna ööa baŋï kipere ŋäyï? 'Ba ennø, a døøa kuna këëda ki nyïïatwiel maal man wø koor Parca; 'ba kanyo cøøa, nyïïatwiel maal man wø koor po jø Gïrïïk luunynya öö.

²¹ 'Ba këël na näk enø nø, aani gïna näk ogöörö yi Wëël Adïëri caana caanø jïrï. 'Ba bäŋ ŋat mo cwak aani ki geni, ni näk mo paa Mikaël, eni na nyïïatwiel maal man wø koor jø Icriel.