Ciik Kiper Dïlämme 7 - Wëël Jwøk

Ciik Kiper Cïp Olämme Mo Wëën Bääyö

¹ « ‹'Ba man beeye ciik kiper olämi mar wëën bääyö, ni manøgø beeye gïn mo ena kur keere mo pere leth.

² Olämi mar wëën bääyö wär tïme ni ŋaalla kany wø ŋaal olämi yie man wø waaŋ bäre, ni ö dïlämi ni køny rem gø dëët bööp gïn wø cïp olämme bääte.

³ 'Ba gïïo cïp ri läänögø no olämi beeye maaw mare bäre, ni beeye maar jïp, ki räämmö na näk gïïa en ec ee rïëbö,

⁴ ki røgi karge riet na en wïth dïbule ki maaw mana en bäätge, ki maaw mana näk cwïny okuup ree, noo käl wøk ki røgi ciel.

⁵ Køøre dïlämi gïïögø wär waaŋe bäät gïn wø cïp olämme bääte no olämi man wø waaŋ ki maac jï Wuuö Jwøk. Ni manøgø beeye olämi mar wëën bääyö.

⁶ Dïcwøø man nø røk dïlämme løny ki man cäme ri rïŋ gø; eni wär tïme ni camma yi kany mo ena kur keere; ni manøgø beeye gïn mo ena kur keere mo pere leth.

⁷ « ‹Olämi mar wëën bääyö ko olämi mar wëën raay ge röömi. Geni ciik marge aciel. Dïlämi mano tïïc ge no okïdi, tïmö na moe.

⁸ 'Ba dïlämi man wø cïp olämi man wø waaŋ bäre mar ŋati man nø, dïlämi manøgø pïën olämi cøøa jïre.

⁹ Kaawat manøgø thuwø, muuy mar møk beel man nø man wø deel ka athaa, wala gïr deel, wala täba, tïmö na mar dïlämi mana cïp gø.

¹⁰ 'Ba muuy mar møk beel man nø mo kär deelø, nee okïthö ki maaw wala otal kare, tïmö na mar wäät Aran bëët, ni ŋati man nø mare röömi ki mar coki.

Ciik Kiper Cïp Olämme Mo Wø Duunni Ki Mëër

¹¹ « ‹'Ba man beeye ciik kiper olämme mo wø cïp jï Wuuö Jwøk ni wø duunni ki mëër.

¹² « ‹Ni näk mo cïp dhaanhe no olämi mar dwøk met ec, muuce moo cïp ŋatøgø noo kuure ko olämi mar dwøk met ec manøgø beeye møø mo bäŋ thømmø dëëre mo odeelø no opamø mo okïthö ki maaw, ki møø mo bäŋ thømmø dëëre mo odeelø no opamø ni reep mo bäätge owïïrö ki maaw, ki mo opamø mo coot ka møø mana pøøth no okïthö ki maaw.

¹³ Ni eni gïno cïbe na muuy noo meet bäät olämi mare man wø duunni ki mëër mar dwøk met ec beeye møø mo otïïö na dääpe mo ocoodø ki thømmø.

¹⁴ Eni wär lwöte ri wï muuy man nø ni cïp gø na ajwäk mar Wuuö Jwøk, ni manøgø beeye kiper nee tïme na mar dïlämi mana ker rem olämi man wø duunni ki mëër.

¹⁵ 'Ba rïŋ olämi mar ŋatøgø man wø duunni ki mëër mar dwøk met ec, wär put ŋatøgø cam dïcäŋo cïp gø yie. Eni bäŋe gïn mo wiie ri gø mo këëta amöölla.

¹⁶ « ‹'Ba ni näk mo olämi mare cïbe na mar kööŋ wala cïbe na mar met ec, wär put ŋatøgø cam dïcäŋo cïp gø yie. 'Ba ni näk mo da kany moo dhäthö ree, løny ki man cami yi cäŋ maya.

¹⁷ 'Ba rïŋö mano dhäthi ro olämi manøgø noo pïï ri dää nïne, wär put waaŋ ki maac.

¹⁸ 'Ba ni näk mo rïŋ olämi man wø duunni ki mëër mar ŋatøgø di camø ri dää nïne, ŋata cïp olämi manøgø ba jïëc, ni ba løny ki man kwaani jïre kere da gïn mo ee cïbö, ni gïnögø tïmö na gïn mo Jwøk yie raac ki gø, ni ŋato cämö ri gø, bääyö mare tïmö ni ena bääte keere.

¹⁹ « ‹'Ba rïŋö mo gïn mo ba waany ee gudö, kär ni camma gø; wär waaŋ ki maac. « ‹'Ba thääŋ rïŋŋögø maya, løny ki man cami ŋat mo waany.

²⁰ 'Ba ŋat wø cam rïŋ olämi man wø duunni ki mëër ni wø cïp na mar Wuuö Jwøk, ni eni ba waany, teeŋ ŋatøgø wär tïme ni tøør yïthakic tuuŋge.

²¹ 'Ba ni näk mo da ŋat mo guta teeŋ gïn mør jaak mo ba waany, nee gïn mo ogut dhaanhe mo ba waany, wala lääy mo ba waany, wala teeŋ gïn mo ba waany mo ec raac ki gø, ni ö eni ni cam rïŋ olämi man wø duunni ki mëër man wø cïp na mar Wuuö Jwøk, teeŋ ŋatøgø wär tïme ni tøør yïthakic tuuŋge.› »

²² 'Ba Wuuö Jwøk acäänö ki Modhe ni kööe,

²³ ni «Caanï jï jø Icriel ni kööï, ni ‹Uuni kär nou cämö ki maaw mar dhieŋ, wala mar røømmø, wala mar ateea.

²⁴ 'Ba maar lääy mo othøw keere ki maar lääy mo onäk cwienynyi, løny ki man kunyge kiper tïïe møøk; 'ba ka adïëri møn, kär cammu.

²⁵ Ni näk mo da dhaanhø mo ocämö ki maar lääy man wø tïïc no olämi man wø waaŋ ki maac jï Wuuö Jwøk, teeŋ ŋata cämö enø wär tïme ni tøør yïthakic tuuŋge.

²⁶ 'Ba uuni kwöro bëëdu yïthge, käru cämö ki rem wenyø wala rem lääy.

²⁷ Ŋato cämö ki remø jaak, teeŋ ŋatøgø wär tïme ni tøør yïthakic tuuŋge.› »

²⁸ 'Ba Wuuö Jwøk acäänö ki Modhe ni kööe,

²⁹ ni «Caanï jï jø Icriel ni kööï ni Wuuö Jwøk aköö, ni ‹Ŋat wø cïp olämi mare jïra, a na Wuuö Jwøk, no olämi man wø duunni ki mëër, thääŋ gø wär cïbe no olämi jïra, a na Wuuö Jwøk.

³⁰ Eni olämi man wø waaŋ ki maac jïra, a na Wuuö Jwøk, wär cïbe ni kääre ka ceŋŋe kiree. Ni beeye maaw ki gøŋŋø noo cïbe, ni ö gøŋŋø ni tuuŋŋi yi jamø no olämi man wø tuuŋŋi yi jamø nyïma, a na Wuuö Jwøk.

³¹ Ni ö dïlämi ni waaŋ maaw bäät gïn wø cïp olämme bääte; 'ba gøŋŋø tïmö na mar Aran ki wääte.

³² 'Ba uuni, gïno cïpu jï dïlämi na ajwäk beeye ääm mar cwïïc, ni lwørru ro olämi maru man wø duunni ki mëër.

³³ Ki røk wäät Aran, ŋato cïp remø ki maaw no olämi man wø käl dëër olämi man wø duunni ki mëër, ääm mar cwïïc cøøa jïre na kure.

³⁴ Kiper a na Wuuö Jwøk, gøŋŋø man wø tuuŋŋi yi jamø no olämi, ki ääm man wø cïp na ajwäk, yaa nø lwør baŋ jø Icriel røk olämme moge mo wø duunni ki mëër, ni nø cïba ge jï dïlämi ma Aran ki wääte ni beeye kurge na bäre bäre mano jootge baŋ jø Icriel.› »

³⁵ Gïïögø beege gïïa cïp kur keerge jï Aran ki wääte dïcäŋa nyooth geni ki man tïnyge Wuuö Jwøk ni gena dïlämme, ni gïïögø lwørra røk olämme mo wø waaŋ ki maac jï Wuuö Jwøk.

³⁶ Gïïögø beege gïïa cem Wuuö Jwøki nee cïp jø Icrielli jïge dïcäŋa ö Wuuö Jwøki na wëëk wïthge thïïmmö yie ki maaw. Ni manøgø beeye kurge na bäre bäre këël ki yïth beenhnhe moge bëët.

³⁷ Moøgø nø beege ciik mar olämi man wø waaŋ bäre, ki muuce mo møk beel, ko olämi mar wëën raay, ko olämi mar wëën bääyö, ko olämi mar rööny, ko olämme mo wø duunni ki mëër;

³⁸ ni beege gïïa ö Wuuö Jwøki na kööm Modhe ki ge bäät Kïn Caynay dïcäŋa ö Wuuö Jwøki na kööm jø Icriel nee cïpge ko olämme jï Wuuö Jwøk dï paap mar Caynay.