Ciik Kiper Dïlämme 23 - Wëël Jwøk

¹ 'Ba Wuuö Jwøk acäŋ cäänö ki Modhe ni kööe,

² ni «Caanï jï jø Icriel ni kööï jïge ni Wuuö Jwøk aköö, ni ‹Moi beege kwör ajwöm moa näk yaa cïp piny, a na Wuuö Jwøk, ni beege kwör ajwöm moo luumge gøøu piny nee bëëtge na acooŋe mo ena kur keerge.

Luum Cäŋ Jwömö

³ « ‹Ki yïth nïne abïciel tïïe løny ki man tïï; 'ba noo tïme na bïriet nïne beeye cäŋ jwömö man wø jwöm dëël yie, ni beeye cäŋ acooŋa mo ena kur keere. Kär dee tïïe mo tïïyu tïïö, kiper beeye cäŋ jwömö jï Wuuö Jwøk ki yïth kwöro bëëdu yïthge bëët.

Luum Ajwöm Cäŋ Cäŋa Pööth Thøøe Yie Ka Ajwöma Mar Møga Näk Ree Bäŋ Thømmø

⁴ « ‹Moi beege kwör ajwöm moa näk yaa cïp piny, a na Wuuö Jwøk, ni beege moo luumge gøøu piny nee bëëtge na acooŋe mo ena kur keerge ki køør kwöra cïïmmi yïthge.

⁵ « ‹Kany wø tïm nïr dwääy mana dïkwøŋ na apaar kurŋween, kanyo päth cäŋŋi, beeye cäŋ Cäŋa Pööth Thøøe Yie man wøør aani, a na Wuuö Jwøk.

⁶ 'Ba noo tïm nïr dwäänögø na apaar kurbïïc, tïmö ni beeye cäŋ ajwöma mar Møga Näk Ree Bäŋ Thømmø man wøør aani yie, a na Wuuö Jwøk. Ki yïth nïne abïriiø wäru bëëdu nou cama møø mo ree bäŋ thømmø.

⁷ Dïcäŋ mana dïkwøŋ wär jïtu ka acooŋa mo ocïp kur keere. Uuni kär dee tïïc mo teek mo tïïyu tïïö.

⁸ 'Ba ki yïth nïne abïriiø wäru bëëdu nou cïpö ko olämme mo wø waaŋ ki maac jïra, a na Wuuö Jwøk. Køøre ri bïriet nïne wär jïtu ka acooŋa mo ocïp kur keere. Uuni kär dee tïïc mo teek mo tïïyu tïïö.› »

Luum Ajwöm Caammi Mo Wø Kwøŋ Ciek

⁹ Køøre Wuuö Jwøk acäänö ki Modhe ni kööe,

¹⁰ ni «Caanï jï jø Icriel ni kööï jïge ni Wuuö Jwøk aköö, ni ‹Kanyo dønynyu yi ŋöömmo cïba jïïu, kanyo kayu caammi moo ciek yie, wäru kännu ki ŋaaŋa røk caammi mo okwøŋ ciek ni cïpu gø jï dïlämi.

¹¹ Ni ö dïlämi ni tuuŋ ŋaaŋa manøgø yi jamø nyïma, a na Wuuö Jwøk, kiper nou jïëc ki køøre, ni kanyo tuuŋ gø yi jamø beeye yi cäŋ mana en køør cäŋ jwömö.

¹² 'Ba dïcäŋo tuuŋŋu ŋaaŋa mano tuuŋŋi yi jamø, wäru cïpu ki nyi røømmø ma nywøk mo cwiine aciel mo bäŋ gïn mo ogwäyö dëëre, ni cïbi no olämi man wø waaŋ bäre jïra, a na Wuuö Jwøk.

¹³ Muuy mar møk beel mano cïp ko olämi manøgø wär tïme na rumme ariiø ki røk rumme apaar moa en yi rumi mar iipa, ni beeye møø mo pøøth mo ojääbö ki maaw, ni cïbi no olämi man wø waaŋ ki maac ni wø ŋwääi ni met jïra, a na Wuuö Jwøk, ni kuur ki muuy mar køøŋ nyïïomøki ma thääŋ thääŋ rumi man wø cwøl ni in.

¹⁴ Uuni, käru cämö ki møø mo odeelø, ni ba nyämu ki beel mo omuuö wala twiinye, këël dïcäŋo cïpu olämi jïra, a na Jwøk maru. Manøgø beeye ciik mo bëëdö na bäre bäre këël mano këët røk beenhnhe mou moo ööi, noo gwøgu ki yïth kwöro bëëdu yïthge bëët.

Luum Ajwöma Man Wø Wøør Køør Juu Abïriiø

¹⁵ « ‹'Ba ki mano täge ki cäŋ mano täk køør cäŋ jwömö, ni beeye dïcäŋo kälu ŋaaŋa mar beel no olämi man wø tuuŋŋi yi jamø, wäru kwäänu ki nïne ma kar juu abïriiø,

¹⁶ këël mano këët ri dïcäŋ mano ööi køør bïriet juu, ni beege nïne ma pïërabïïc. Køøre nø, u cïpö ki muuce mo beel moa nyärö jïra, a na Wuuö Jwøk.

¹⁷ Ki yïth kwöro bëëdu yïthge, ŋati man nø wär känne ki dääpe ariiø no olämi man wø tuuŋŋi yi jamø, ni dääpö man nø beeye møø ma yïth rumme ariiø røk rumme apaar moa en yi rumi mar iipa. Møø manøgø wär näk mo pøøth ni bul ni ree da thømmø, ni beeye møk caammi mo wø kwøŋ ciek ni wø cïp jïra, a na Wuuö Jwøk.

¹⁸ 'Ba gïïo kuurru ki dääpe beeye nyöök rööm abïriiø mo cwiicge oceele mo bäŋ gïn mo di jøøŋŋø rege, ki rwaath, ki nyöök rööm ariiø, nee tïmge no olämi man wø waaŋ bäre jïra, a na Wuuö Jwøk, no okuurö ki muuy mar møk beel ki muuy mar køøŋø mo wø cïp no okuurö ki lääy man nø no olämi man wø waaŋ ki maac ni wø ŋwääi ni met jïra, a na Wuuö Jwøk.

¹⁹ Uuni thuwø, wäru cïpu ki nywø ateea no olämi mar wëën raay, ki nyïï nyöök rööm ariiø mo cwiicge oceele no olämi man wø duunni ki mëër.

²⁰ Dïlämi nyïï nyöök rööm moøgø na ariiø yøø wär tuuŋŋe yi jamø nyïma, a na Wuuö Jwøk, ni ee kuurö ki dääpe mo møk caammi mo wø kwøŋ ciek no olämi man wø tuuŋŋi yi jamø. Gïïögø wär bëëtge na gïï mo ena kur keerge jïra, a na Wuuö Jwøk, kiper dïlämi.

²¹ 'Ba dïcäŋögø wär tïme na cäŋ mo luumme you gøø piny man wø jïtu yie ka acooŋa mo ocïp kur keere. Kär dee tïïe mo teek mo tïïyu tïïö. Manøgø bëëdö na ciik na bäre bäre yïth kwöro bëëdu yïthge bëët këël mano këët røk beenhnhe mou moo ööi.

²² « ‹'Ba kany wäro kayu caammi mo ociek yi ŋöömö maru, kär nou kaya pwöth mou këël teegi moge, ni ba døøu køøru ki man kwanynyu moa no odööŋ piny. Wär weyu kiper jøøa can ki wëëlle moa path mo wø bëëdö dïïu. Beeye aani na Wuuö Jwøk, Jwøk maru.› »

Luum Ajwöma Man Wø Kooth Tuŋi Yie

²³ Køøre Wuuö Jwøk acäŋ cäänö ki Modhe ni kööe,

²⁴ ni «Caanï jï jø Icriel, ni ‹Kany wø tïme na bïriet dwäde, dïcäŋ mana dïkwøŋ, wär jïtu ki jwöm ni kooth tuŋi mo par wïc, ni jït jiyi ka acooŋa mo ocïp kur keere.

²⁵ Kär dee tïïe mo teek mo tïïyu tïïö. 'Ba wäru cïpu ko olämi man wø waaŋ ki maac jï Wuuö Jwøk.› »

Luum Cäŋ Man Wø Tïïc Okïdi Yie

²⁶ 'Ba Wuuö Jwøk acäänö ki Modhe ni kööe,

²⁷ ni «Noo tïm nïr dwää abïriiø manøgø na apaar, tïmö ni beeye Cäŋ Man Wø Tïïc Okïdi Yie. Wär tïme ni beeye cäŋ acooŋa mo ocïp kur keere kiperu, ni dwøgu dëëtu piny nou ba cämö, ni cïpu olämi man wø waaŋ ki maac jï Wuuö Jwøk.

²⁸ Kär dee tïïc mo tïïyu tïïö dïcäŋögø, kiper beeye dïcäŋ okïdi man tïïc okïdi yie na karu nyïm Wuuö Jwøk, Jwøk maru.

²⁹ Ni näk mo da dhaanhø mo dëëre ba dwøk piny ni ba kwier cam dïcäŋ manøgø, eni wär put tïmö ni tøør yïthakic tuuŋge.

³⁰ 'Ba ni näk mo da dhaanhø mo tïïya tïïc dïcäŋögø, ŋateca puta ka 'näk yïthakic tuuŋge.

³¹ Kär dee tïïc mo tïïyu tïïö na bäre bäre. Manøgø beeye ciik mo bëëdö na bäre bäre këël mano këët yïth beenhnhe mou moo ööi, ki kwöru bëëdu yïthge bëët.

³² Cäŋ manøgø tïmö ni beeye cäŋ jwömö mar jwöm dëël jïïu na bäre, ni dwøgu dëëtu piny nou ba cämö. Ki mano täge ni nïr dwääy abïŋween ni cäŋ pätha piny, këël mano këët cäŋ maya ni cäŋ pätha piny, wär gwøgu na cäŋ jwömö mara.»

Luum Ajwöma Man Wø Wøør Ni Jøw Bëëdö Yïth Abïle

³³ 'Ba Wuuö Jwøk acäŋ cäänö ki Modhe ni kööe,

³⁴ ni «Caanï jï jø Icriel ni Wuuö Jwøk aköö, ni ‹Noo tïm nïr dwää abïriiø manøgø na apaar kurbïïc, beeye kanyo täk Ajwöma Man Wø Wøør Ni Jøw Bëëdö Yïth Abïle ki nïne abïriiø, ni wøørra aani, a na Wuuö Jwøk.

³⁵ Cäŋ mana dïkwøŋ wär dee acooŋa mo ocïp kur keere. Kär dee teeŋ tïïc mo teek mo tïïyu tïïö.

³⁶ Ki yïth nïne abïriiø wäru bëëdu nou cïpö ko olämme mo wø waaŋ ki maac jïra, a na Wuuö Jwøk. 'Ba ri bäc nïne, wär jïtu ka acooŋa mo ocïp kur keere ni cïpu ko olämi man wø waaŋ ki maac jïra, a na Wuuö Jwøk. Manøgø beeye aŋuun acooŋa. Kär dee tïïc mo teek mo tïïyu tïïö.

³⁷ « ‹Moøgø beege kwör ajwöm moa cïba piny, a na Wuuö Jwøk, moo luumge gøøu piny nee bëëtge na kwör acooŋe mo ena kur keerge, ki man cïpu olämme mo wø waaŋ ki maac jïra, a na Wuuö Jwøk, ni beege olämme mo wø waaŋ bäre, ki muuce mo møk beel, ko olämme møga, ki muuce mo kwøŋ, ni man nø cïpa dïcäŋ mare,

³⁸ ni meedu bäät mo wø cïpu yïth nïr jwöm 'moa, a na Wuuö Jwøk, ki muuce mou mo wø cïpu, ko olämme mo wø cïpu na mo kööŋ, ko olämme mo wø cïpu na mo met ec ni wø cïpu jïra, a na Wuuö Jwøk.

³⁹ « ‹'Ba noo tïm nïr dwää abïriiø na apaar kurbïïc, kanyo nø kayu caammi moa en yi ŋöömö maru, ajwöma mar Wuuö Jwøk wär wøørru ki nïne abïriiø. Dïcäŋ mana dïkwøŋ wär jïtu ki jwöm, ni jïtu ki jwöm ri bäc nïne.

⁴⁰ 'Ba noo tïme ni dïcäŋ mana dïkwøŋ, wär lwötu ki nyïïjenni mo mïërö, ki bäät twöe, ki bäät jenni moa bøøge moge thööth, ki bäät jera no otuy waŋ naam. Køøre nø, wäru bëëdu ni yïthu met ki nïne abïriiø nyïma, a na Wuuö Jwøk, Jwøk maru.

⁴¹ Uuni ajwöma manøgø wär wøørru ki nïne abïriiø ki yi cwiir na ajwöma man wøør aani yie, a na Wuuö Jwøk. Manøgø wär tïme na ciik mo bëëdö na bäre bäre këël mano këët røk beenhnhe mou moo ööi. Ajwöma manøgø wär wøørru ki dwää abïriiø cooth.

⁴² Wäru bëëdu yïth abïle ki nïne abïriiø. Jø Icriel bëët wär bëëtge yïth abïle,

⁴³ kiper nee ŋäc beenhnhe mou moo ööi nou yaa tïïö nou bëëdu yïth abïle kanya käla u wøk ki yi ŋööm Ijep. Beeye aani na Wuuö Jwøk, Jwøk maru.› »

⁴⁴ Køøre Modhe luum kwöra no ocïp Wuuö Jwøki piny aput caan jï jø Icriel.