Ciik Kiper Dïlämme 14 - Wëël Jwøk

Jöö Man Tïm Dhaanhe Ni Waany Ki Täw Buny Dëël

¹ 'Ba Wuuö Jwøk acäänö ki Modhe ni kööe,

² ni «Man beeye ciik kiper dhaanhø mo obëëdö ni dëëre da täw buny dëël. Dïcäŋo tïme ni luum waany mare di caanø, dwøl wär kïth bäŋ dïlämi,

³ ni ö dïlämi ni ci wøk baŋ ŋatøgø ŋää twïër ni raŋ dëër gø. 'Ba ni näk mo ŋatøgø ŋwellø mar täw buny dëël ocaŋŋø dëëre,

⁴ dïlämi wär cïpe ki dwøl nee kännö ki weny ariiø mo kwøw mo waany, ki jaath man wø cwøl ni dhigba, ki thøøli mo kwayø, ki jaath man wø cwøl ni icöp, kiper ŋato luum waany mare caan.

⁵ Dïlämi thuwø wär cïpe ki dwøl nee wenyø aciel ŋaal no olöö bäät dak mo yie da pïï mo käla yi naam mo kwödö.

⁶ Køøre dïlämi wenyø mana kwøw lwøre lwørø na aciel ki jaath man wø cwøl ni dhigba, ki thøøli moa kwayø, ki jaath man wø cwøl ni icöp, ni cøt geni yi rem wenyø mana ŋaal bäät pïïa käl yi naam.

⁷ Ni ö eni na dïlämi ni jut dëër ŋatøgø ki remø kwöre abïriiø, ni beeye dëër ŋato luum waany mare caan enø ki køør täw mana en dëëre. Ni ö dïlämi ni put gø caan ki man näk mo ŋatøgø waany. Køøre eni wenyø mana kwøw wär put wec nee määte jaak dï pwöla.

⁸ «'Ba ŋato luum waany mare caan, abïïe moe wär penye, ni lïël jïëye wøk bëët, ni lwøk dëëre ki pïï. Køøre eni dööŋ ni waany. Køøre nø, eni ööa yi twïër. 'Ba eni wär bëëde wøk ki nïne abïriiø ni ba døny yo oduŋkaara mare.

⁹ 'Ba noo tïme na ri bïriet nïne, ŋatøgø jïër moe bëët wär lïël wøk, ni beeye jïëc wïïe, ki jïëc tïïe, ki jïëc nyeŋŋe, ki jïër møga bëët. Ni ö eni thuwø ni peny abïïe moe, ni lwøk dëëre ki pïï. Køøre nø, eni dööŋ ni waany.

¹⁰ «'Ba noo tïme na ri bäc nïne, ŋatøgø wär känne ki nyïï nyöök rööm ariiø mo bäŋ gïn mo ogwäyö dëëtge; ki nyi røømmø ma dhaagø ma cwiine aciel mo bäŋ gïn mo ogwäyö dëëre; ki møø mo pøøth ma rumme adäk mo ojääbö ki maaw, ni lwørra røk rumme apaar mar rumi man wø cwøl ni iipa, ni beeye muuy mar møk beel; ki maaw mo ena yi rumi man wø cwøl ni lög.

¹¹ Køøre dïlämi mano caan luum waany mar ŋatøgø, ŋatøgø ko olämme moe wär käl nyïm Wuuö Jwøk dho oduŋkaany røømmø.

¹² «Køøre dïlämi nyi nywø røømmø aciel lwøre lwørø no olämi mar wëën bääyö, ni kuure ka maaw mana en yi rumi mar lög, ni cïp ge jï Wuuö Jwøk no olämi man wø tuuŋŋi yi jamø.

¹³ Køør manøgø eni nyi nywø røømmø wär ŋaale yi kanya en kur keere, kany wø ŋaal olämi yie mar wëën raay ko olämi man wø waaŋ bäre. Kiper olämi mar wëën bääyö caala olämi mar wëën raay. Ena mar dïlämi, ni beeye gïn mo ena kur keere mo pere leth.

¹⁴ Køøre dïlämi wär lwöte ri rem olämi manøgø mar wëën bääyö ni naaŋ gø ro olap ïth cwïïc mar ŋatøgø ni luum waany mare caan enø, ki bäät lween dwøŋ mar cer cwïï gø, ki bäät lween dwøŋ mar tier cwïï gø.

¹⁵ Køøre dïlämi thuwø lwötö ri maaw mana en yi rumi mar lög ni thii gø yo othäny cer caame,

¹⁶ ni cøt lween cwïïe yi maaw manøgø ni en yo othäny cer caame enø ni ker gø ki lweete kwöre abïriiø nyïm Wuuö Jwøk.

¹⁷ Køøre eni na dïlämi maaw mana dööŋ yo othäny cere, mør wär naaŋ ro olap ïth cwïï ŋatøgø ni luum waany mare caan enø, ki bäät lween dwøŋ mar cer cwïï gø, ki bäät lween dwøŋ mar tier cwïï gø, ni beeye bäät kwöra naaŋ ki rem olämi mar wëën bääyö manøgø.

¹⁸ 'Ba dïlämi maaw mano dööŋ yo othäny cere wär wïïr wï ŋatøgø ni luum waany mare caan enø, ni mare tïïc gø no okïdi nyïm Wuuö Jwøk na kar ŋatøgø.

¹⁹ «Køøre dïlämi olämi mar wëën raay manøgø wär cïbe ni tïïe no okïdi na kar ŋatøgø ni luum waany mare caan enø, ki køør mana bëëde ni ba waany. Køør manøgø dïlämi olämi man wø waaŋ bäre wär ŋaale,

²⁰ ni waaŋ olämi manøgø man wø waaŋ bäre bäät gïn wø cïp olämme bääte, ni kuure ka muuy mar møk beel. Ni manøgø tïïc dïlämi no okïdi na kar ŋatøgø. Køøre nø, eni dööŋ ni waany.

²¹ «'Ba ni näk mo ŋatøgø can ni cere orëëm ki man cïp gïïögø, eni wär cïpe ki nyi nywø røømmø aciel no olämi mar wëën bääyö man wø tuuŋŋi yi jamø, ni tïï no okïdi na kar ŋatøgø, ni kuure ka paac wï møø mana pøøth ni wø en yi rumi mar iipa, no ojääbö ki maaw, na muuy mar møk beel, ki maaw mana en yi rumi mar lög,

²² ka atuuy ariiø, wala nyïï akuyi ariiø, ni beege moa joode, na aciel olämi mar wëën raay, ni maya olämi man wø waaŋ bäre.

²³ «'Ba noo tïme na ri bäc nïne, eni gïïögø noo døøc dëëre mo waany yøø wär kïth baŋ dïlämi dho oduŋkaany røømmø nyïm Wuuö Jwøk.

²⁴ Køøre dïlämi nyi nywø røømmø mar olämi mar wëën bääyö wär lwøre ni kuure ka maaw mana en yi rumi mar lög, ni tuuŋ ge yi jamø nyïm Wuuö Jwøk no olämi man wø tuuŋŋi yi jamø.

²⁵ Køøre eni nyi nywø røømmø mar olämi mar wëën bääyö wär put ŋaal, ni lwöte ri rem gø ni naaŋ gø ro olap ïth cwïïc mar ŋatøgø ni luum waany mare caan enø, ki bäät lween dwøŋ mar cer cwïï gø, ki bäät lween dwøŋ mar tier cwïï gø.

²⁶ Ni ö dïlämi ni thii maaw yo othäny cer caame.

²⁷ Køøre dïlämi maaw mana en yo othäny cer caame wär kere ki lween cwïïe kwöre abïriiø nyïm Wuuö Jwøk.

²⁸ Køøre dïlämi maaw mana en yo othäny cer caame, mør wär naaŋ ro olap ïth cwïï ŋatøgø ni luum waany mare caan enø, ki bäät lween dwøŋ mar cer cwïï gø, ki bäät lween dwøŋ mar tier cwïï gø, ni beeye bäät kwöra naaŋ ki rem olämi mar wëën bääyö manøgø.

²⁹ Ni ö maawi mano dööŋ yo othäny cere ni wïïr gø wï ŋatøgø ni luum waany mare caan enø, ni mare tïïc gø no okïdi nyïm Wuuö Jwøk na kar ŋatøgø.

³⁰ Køøre dïlämi atuuy wala nyïï akuyi moa joot ŋatøgø wär put cïp no olämi,

³¹ na aciel cïbe no olämi mar wëën raay, ni maya olämi man wø waaŋ bäre, ni kuure ka muuy mar møk beel. Ni manøgø tïïc dïlämi no okïdi nyïm Wuuö Jwøk na kar ŋatøgø ni luum waany mare caan enø.

³² «Manøgø beeye ciik kiper ŋat mo dëëre da ŋwellø mar täw buny dëël mo cere orëëm ki mana dee cïbö ki man døøc eni mo waany.»

Ciik Kiper Puunnö Mo Ena Dëër Øtø

³³ 'Ba Wuuö Jwøk acäänö ki Modhe ka Aran ni kööe,

³⁴ ni «Kanyo dønynyu yi ŋööm Keenan noo cïba jïïu na thööŋŋu, noo dee øtø mo tïïa nee yie puunne yi ŋöömmögø noo lwørru na thööŋŋu enø,

³⁵ ŋata ci øtø manøgø jïre wär ööe ni caan gø jï dïlämi, ni kööe, ni ‹Yi øtø mara da gïn mo ree ee nyoodhø na gïr puunnö.›

³⁶ 'Ba dïlämi wär put cïpö ki dwøl nee jammi jwïër wøk yi øtø kanyo poode ni eni poot kär døny yi øtø kuna raŋ puunnö manøgø, kiper nee jammi moa en yi øtø ba caan ni ba waany. 'Ba køøre nø, dïlämi wär luuny døny kuna raŋ yi øtø.

³⁷ Køøre dïlämi dëër øtø wär raaŋe. 'Ba ni näk mo puunnö mana en dëër øtø otïmö ni kwaar wala marr ni øtø ee løødø, ni nëëni ni ree ee luut piny ni dëër øtø ee wii maal,

³⁸ dïlämi wär duny wøk ni dëët dhi øtø ki nïne abïriiø.

³⁹ 'Ba noo tïme na ri bïriet nïne, dïlämi wär døø kuna raŋ øtø. 'Ba ka adïëri møn, ni näk mo puunnö manøgø onyaay dëër øtø,

⁴⁰ dïlämi wär cïpe ki dwøl nee kïte moa en puunnö rege käl wøk ni wet geni wøk ŋää pääny kany mo ba waany.

⁴¹ Eni wär tïïe nee odhöönh mana puuc yi dëër øtø ki gø gööp wøk. Ni ö odhöönhnhi manøgø ni weti wøk ŋää pääny kany mo ba waany.

⁴² Køøre jiy wär lwötge ki kïte møøk ni laage ge kar kïte moøgø, ni öömge ko odhöönh mo nyään ni puucge øtø ki gø.

⁴³ «'Ba ni näk mo puunnö ocäŋ tägö yi dëër øtø, køør mana ö dïlämi na nø tïïc gø nee kïte käl wøk, ni gøøp dëër øtø, ni nø cäŋi puuyö,

⁴⁴ dïlämi wär cøøe ni raŋ gø. 'Ba ni näk mo puunnö manøgø onyaay dëër øtø, ena puunnö mo raac mo øtø ee tïïö ni ba waany.

⁴⁵ Kiper manøgønø, ødøgø wär put nyaa piny, ni beeye kïte moe ki cuge moe, ko odhöönh mana puuc dëëre ki gø; ni put gïïögø lwør ni weti wøk ŋää pääny kany mo ba waany.

⁴⁶ «'Ba ni näk mo da dhaanhø mo odøny yi ødøgø kany wø bëëde no odëëdö, ŋatøgø tïmö ni ba waany këël kanyo päth cäŋŋi.

⁴⁷ Nee da dhaanhø thuwø mo obuut yi ødøgø, wala mare cam yie, eni abïïe moe wär penye.

⁴⁸ «'Ba kanyo ö dïlämi noo raŋ puunnö manøgø, ni näk mo kär nyaay dëër øtø køør mana nø cäŋ øtø puuyö, wär put dïlämi caan ki man näk mo øtø manøgø waany, kiper mana ö puunnö manøgø ni aae.

⁴⁹ 'Ba kiper nee øtø tïme ni waany, dïlämi wär lwöte ki weny ariiø, ki jaath man wø cwøl ni dhigba, ki thøøli moa kwayø, ki jaath man wø cwøl ni icöp,

⁵⁰ ni ŋaal wenyø aciel no olöö bäät dak mo yie da pï jøøro.

⁵¹ Køøre eni jaath mana näk dhigba, ki icöp, ki thøøli moa kwayø, wär lwøre na aciel ki wenyø mana kwøw, ni cøt geni yi rem wenyø mana ŋaal yïth pï jøøro, ni jør øtø kwöre abïriiø,

⁵² ni eni tïïya øtø ni waany ki rem wenynyøgø, ki pï jøøro moøgø, ki wenyø mana kwøw manøgø, ki dhigba manøgø, ki icöp manøgø, ki thøøli moa kwayø moøgø.

⁵³ Køøre eni wenyø mana kwøw wär put wec nee määt wøk dï pwöla ŋää pääny. Ni manøgø bäre tïïe no okïdi kiper øtø; køøre nø, øtø dööŋ ni waany.»

⁵⁴ Moøgø beege ciik kiper teeŋ ŋwellø mar buny dëël, ki täw mo jelli,

⁵⁵ ki puunnö mo ena ra abïï dëël, wala dëër øtø,

⁵⁶ ki gïn mo opäny wøk, ki nyoonynyø, wala gïn mo obuth ni tar,

⁵⁷ ni beeye ki man ŋääi ki man näk mo gïna en dëër gø waany wala ba waany. Moøgø beege ciik kiper ŋwellø mo ena ri buny dëël, ki gïn mo opuunnö.