Ciik Kiper Dïlämme 12 - Wëël Jwøk

Ciik Kiper Man Dööŋ Dhaage Ni Waany Køør Lwaar

¹ 'Ba Wuuö Jwøk acäänö ki Modhe ni kööe,

² ni «Caanï jï jø Icriel ni kööï, ni ‹Kany wø ö dhaage wø jït yie ki dhaanhø, kany wø lwaare ki nyilaal ma dïcwøø, eni bëëdö ki nïne abïriiø ni ba waany, kaawat nïne mo wø beede ni ba waany kany wø bëëde ni dëëre da gïr mään.

³ 'Ba noo tïme na ri bäc nïne, nyilaal wär daŋ.

⁴ 'Ba dhaagø manøgø wär poode ni bëëdö ki nïne ma pïëradäk ka adäk këël kanyo dööŋe ni waany ki remø mana en dëëre, ni gïn mo ocïp kur keere na mar Jwøk ba gude, ni eni ba døny kar lam na en kur keere, këël kanyo thum nïne moo dööŋe ni waany yïthge.

⁵ 'Ba ni näk mo dhaaŋŋøgø lwaar ka nyilaal ma nyakøø, eni bëëdö ki juu ariiø ni ba waany, kaawat man wø bëëde ni dëëre da gïr mään; eni wär poode ni bëëdö ki nïne ma pïërabïciel ka abïciel këël kanyo dööŋe ni waany ki remø mana en dëëre.

⁶ « ‹'Ba kanyo thum nïne moo dööŋe ni waany yïthge, køør mana lwaare ki dïcwøø wala nyakøø, eni wär känne ki nyi røømmø ma cwiine aciel no olämi man wø waaŋ bäre, ka atuuk wala nya akuuru no olämi mar wëën raay, ni cïp ge jï dïlämi dho oduŋkaany røømmø.

⁷ Køøre cïp dïlämi cïbö nyïm Wuuö Jwøk ni eni tïïya geni no okïdi kiper dhaaŋŋøgø, nee dööŋe ni waany ki remø mana en dëëre. « ‹Manøgø tïmö na ciik kiper dhaagø man wø nyööti, nee nywøla dïcwøø wala nyakøø.

⁸ 'Ba ni näk mo dhaaŋŋøgø cere orëëm ki man cïpe ki nyi røømmø, eni wär cïpe ka atuuy ariiø wala nyïï akuyi ariiø, na aciel olämi man wø waaŋ bäre, ni maya olämi mar wëën raay, nee tïïc dïlämi no okïdi kiper dhaaŋŋøgø. Køøre nø, eni dööŋ ni waany.› »