Bwøth Wøk 28 - Wëël Jwøk

Jöör Tïïc Mar Abïïe Kiper Dïlämme

¹ «'Ba ïïni na Modhe en, cöögu ma Aran ki wääte wär nyïï buutï, ni lwørï ge dï jø Icriel, naa tïnyge ni gena dïlämme. Ni beeye Aran ki wääte na näk Nadap ka Abiyu ki Eliedhar ki Itamer.

² Ni tïïï ka abïïe mo ena kur keerge nee tïmge na jap ajiem ni jap mïërö jï cöögu ma Aran.

³ Wär caanï jï jiy bëët moa näk nyeŋge reegø ki tïïc, na näk yaa mooø ki leec wïc, na abïïe mo Aran tïïcge, kiper na Aran tïme na dhaanhø mo ena kur keere, naa tïnynye ni ena Kwääy Lam Mana Dwøŋ.

⁴ 'Ba abïïe moo tïïc jøøgø jï Aran ki wääte beege abïï käw, ka abïï mana cwøl ni ëëput, ki jalabiiya mo ciek, ki jalabiiya mør mo okwøø ni bäär no ocwääö ni waŋe orïëm, ka abïï man wø meen wïc, ka abïï mo ocwääö na kaw. Ni ö abïïe moøgø ni tïïcge ge ni ena kur keerge kiper cöögu ma Aran ki wääte, naa tïnyge ni gena dïlämme.

⁵ Jøøgø ni nyeŋge reegø ki tïïc yøø wär lwötge ki warkey, ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, na abïïe moøgø bëët tïïcge ki ge.

Jöör Tïïc Mar Abïïna Cwøl Ni Ëëput

⁶ «'Ba abïï mana cwøl ni ëëput wär tïïcge ki warkey, ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, ni cwääya dhaanhe mo waŋe riek ki tïïc manøgø.

⁷ Abïï mana cwøl ni ëëput, røk gööge karge riet wär tïïc ni da gïï ma ariiø mo gääba gø ki kwöra näk da gööge.

⁸ 'Ba kaw mar abïï man wø twöö abïïna cwøl ni ëëput piny ki gø wär cwääc ki riek waŋ ni caala ëëput; ni cwääc ka teeŋ gïïa cwääc ëëput ki ge, ni beege warkey, ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö.

⁹ «Køøre kïte ariiø moa cwøl ni cöyammi na näk kïte mo perge leth wär lwørï ni göörï nyeŋ wäät Icriel na näk apaar kurriiø bäätge,

¹⁰ ni nyeŋ jiy abïciel ena bäät kïdi aciel, ni nyeŋ jiy abïciel møga ena bäät kïdi maya, ni iï göör piny ki køør nyöödö mana nywøl ge ki gø.

¹¹ Kïte moøgø na ariiø yøø nyeŋ wäät Icriel na näk apaar kurriiø diï gööra bäätge, ni gööra dhaanhe mo waŋe riek ki tïïc manøgø; ni kïthï kïte moøgø yïth gïï wø maai piny ki ge mo tïïc ka warkey.

¹² Køøre kïte moøgø na ariiø yøø wär kïth kwöra näk da göök abïïna cwøl ni ëëput, nee bëëtge na kïte mo wïc di parø ki køørge kiper nyeŋ wäät Icriel na en dëëtge, ni ö Aranni ni käl nyeŋge nyïma, a na Wuuö Jwøk, ni ena røk gööge karge riet, kiper nee wïc wø par ki ge.

¹³ Wärï tïïï ki gïï wø mäk piny ki ge ki warkey,

¹⁴ ni tïïï ki tiimme ariiø ki warkey mana tøŋ; ni tïïyï ge ni caala thøøl mo owenyø, ni kïthï ge røk gïï wø mäk piny ki ge.

Jöör Tïïc Mar Abïï Käw

¹⁵ «Køøre wärï tïïï ka abïï käw man wø nyooth adïëri mar Jwøk ki køøre, ni tïïya dhaanhe mo waŋe riek ki tïïc manøgø, no otïïö ni caala tïïc mana tïïc abïïna cwøl ni ëëput ki gø; ni tïïc ka warkey, ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö.

¹⁶ Ni tïïyï gø ni deŋŋe röömi bëët no obanø na dïrïbi, ni bär mar deŋŋe beeye rumi mar yïthakic lweedi, ni dööŋ yie beeye rumi mar yïthakic lweedi.

¹⁷ Ni kïthï dëëre ki teeŋ kïte mo perge leth mo mïërö no ocaanø na kwöre aŋween; ni tïïyï mana dïkwøŋ na mar kïte moa perge leth, ni beege mo kwaar ni caala dha adhieŋ, ki mo piilli kaamar warkey, ki mo ŋwaŋŋi døc mo caala keenh-orwëëdhö;

¹⁸ ni tïïyï rietge na mar kïte moa perge leth, ni beege mo ränni ni tøŋ, ki mo caala dïmuuy, ki mo piilli ni lïw;

¹⁹ ni tïïyï dääge na mar kïte moa perge leth, ni beege mo caala abïcøle, ki mo caala otïït, ki mo caala dïmuur;

²⁰ ni tïïyï ŋweerge na mar kïte moa perge leth, ni beege mo caala okwëër, ki kïdi mo pere leth mo cwøl ni cöyam, ki mo ŋwaŋŋi døc ni tøŋ keda wïlli; ni kïthï kïte moøgø bëët yïth gïï wø maai piny ki ge mo tïïc ka warkey.

²¹ Kïte moøgø ni perge leth yøø beege kïte apaar kurriiø, na aciel man nø nyeŋ dhaanhø aciel røk wäät Icriel ogöör bääte, ni nyootha wïth tuŋi apaar kurriiø mo jø Icriel.

²² «Ni kïthï dëër abïï käw ki tiimme mo caala thøøl mo owenyø, ni tïïc ka warkey mana tøŋ.

²³ Wärï tïïï ko oguudi ariiø mo thiiwï ka warkey, ni gänï ge ra abïï käw røk deŋŋe moa en maal karge riet.

²⁴ Tiimme moa näk ariiø yøø na näk caala thøøl mo owenyø wär roopï ki yïth oguudi moa näk ariiø na en røk deŋ abïï käw.

²⁵ Ni ö dhøk tiimme møga ni roopï ge ki yïth gïïa näk ariiø ni wø mäk piny ki ge na en røk göök abïïna cwøl ni ëëput, ni ena jï kuna näk da nyïm en.

²⁶ Køøre wärï cäŋ tïïö ko oguudi ariiø mo thiiwï ka warkey ni gänï ge ra abïï käw røk deŋŋe moa en piny, ni ena kuna en da ec mar abïïna cwøl ni ëëput.

²⁷ Wärï tïïï ko oguudi ariiø møøk thuwø ni thiiwï ka warkey, ni gänï ge røk ceŋ abïïna cwøl ni ëëput na en røk gööge karge riet jï piny mëëth, ni ena jï kun da nyïm ni kare cään ki kanya kuubi ki yie, ni ena jï maal mëëth ki kaw mar abïï man wø twöö ëëput piny ki gø na näk ocwääö ki riek waŋ.

²⁸ 'Ba abïï käw wär twöc ki røk oguudi moa en deŋŋe, ni twöi røk oguudi moa en dëër ëëput, ni twöc ka waare mo owenyø mo kïte caala kït abïcøle, ni løny ki man bëëde ni teek ri kaw mar abïï man wø twöö ëëput piny ki gø na näk ocwääö ki riek waŋ, kiper na abïï käw ba bëëde ni lwäägö kanyo en ri ëëput.

²⁹ «'Ba kany wø døny Aranni kanya en kur keere, abïï käw man wø nyooth adïëri mar Jwøk ki køøre wär näk ee røø, ni käär nyeŋ wäät Icriel ki kööre ni ena ra abïïnögø, kiper nee bëëde na gïr par wïc nyïma cooth, a na Wuuö Jwøk.

³⁰ Abïï käw man wø nyooth adïëri mar Jwøk ki køøre, yie wär kïthï ki gïïa cwøl ni Urim ki Thumim, nee kany wø duny Aranni nyïma, a na Wuuö Jwøk, nee bëëtge ni ena ya abïïnögø kööre; ni ö Aranni ni käär gïn wø nyooth adïëri mar Jwøk jï jø Icriel ni ena kööre cooth kany wø ö nyïma, a na Wuuö Jwøk.

Jöör Tïïc Mar Abïïe Møga Mo Dïlämme

³¹ «Køøre jalabiiya mana ciek man wø røø tier abïïna cwøl ni ëëput wär tïïyï bäre ni kïte caala kït abïcøle.

³² Ni wëën dïëre maal ki kany mo ŋaam na kar wïc; ni cwääc deŋŋe kanya no owiiø ni ŋaam enø ki waare ni teek, kiper nee ba jeee.

³³ Deŋ jalabiiya manøgø mana en piny bäre wär kïthï ki gïï mo caala nyïïadikwäle mo otïïö ki waare mo kïtge caala kït abïcøle, ki ma dïmuur, ki mo kwaar; ni yïthakicge da gare mo otïïö ki warkey.

³⁴ Ni kelï ge ni kany nø da waŋ gara mo tïïc ka warkey, køøre ki waare moa no otïïö ni caala nyaadikwala, këël mano wïrï deŋ jalabiiya manøgø ki piny bäre.

³⁵ Jalabiiya manøgø wär näk ena dëër Aran kany wø tïïc tïï dïlämi. Ni kany wø duny kanya en kur keere nyïma, a na Wuuö Jwøk, wala kany wø døny wøk, dööt gare moa näk tïïc ka warkey ra abïï manøgø løny ki man wïnye, kiper nee eni ba thøøe.

³⁶ «Køøre wärï tïïï ki gïn mo ŋwaŋŋi no otïïö ki warkey mana tøŋ, ni göönnï dëëre ki gööre mo køp, ni ‹Eni ena kur keere na mar Wuuö Jwøk.›

³⁷ Ni twöï gø ra abïï man wø meen wïc, ni twöc ka waare moa no owenyø na näk kïte caala kït abïcøle, ni ena jï kun da nyïm en.

³⁸ Ni ö gïnögø ni bëëde täärnyïm Aran; ni ö Aranni ni lwør ajäl raay mana doo en bäät jø Icriel ki køør gïï wø cïpge ni patha karge røk japa en kur keerge bëët mo wø kälge baŋa. Ni ö gïnögø ni bëëde täärnyïm Aran cooth, nee gïïo cïpge jïëa, a na Wuuö Jwøk.

³⁹ «Køøre jalabiiya mana bäär wär cwääc ki waac lïïna mo tar mo mïërö ni cwääi ni waŋe orïëm; ni tïïc abïï man wø meen wïc ki lïïna mo tar mo mïërö, ni cwääö ki kaw mar abïï, ni cwääya dhaanhe mo waŋe riek ki tïïc manøgø.

⁴⁰ «Køøre wärï tïïï ki jalabiiye mo okwøø ni bäyö kiper wäät Aran; ni cwääï ki kaae mo abïïe jïge thuwø, ni tïïï ki cöörri, kiper nee tïmge na jap ajiem ni jap mïërö jïge.

⁴¹ Køøre nø, gïïögø bëët wär kïth dëër cöögu ma Aran, ni kïthï mo wääte dëëtge na aciel ki eni bëët; ni jørï geni ki maaw, ni røønyï geni, ni tïïyï ge na jiy mo ena kur keerge, naa tïnyge ni gena dïlämme.

⁴² «Ni tïïï jïge ki libaae mo tïïc ka lïïna mo tar, nee dëëtge kwöra määnö uumge ki ge; ni kwøi no orøm pier no okëët ämmi.

⁴³ 'Ba kany wø døny Aranni ki wääte yo oduŋkaany røømmø, wala kany wø nyiikge buut gïna näk caala tharabëëta ni wø waaŋ gïn wø jïye ŋwääi ni met bääte ni ge tïïya tïï dïlämme kanya en kur keere, abïïe moøgø wär näk mo ena dëëtge, kiper nee ba tïme na raay bäätge, ni ba thøwge. Gïnögø wär bëëde na ciik cooth jï Aran këël mano këët røk wääte ki nyïïkwaaye bëët moo ööi køøre.