Bwøth Wøk 27 - Wëël Jwøk

Jöör Tïïc Mar Gïn Wø Cïp Olämme Bääte

¹ «Køøre wärï tïïï ki gïn wø cïp olämme bääte ni tïïc ka jaadha cwøl ni cïta, ni bär mare ki deŋŋe beeye rumme abïïc, ni dööŋ yie beeye rumme abïïc; gïn wø cïp olämme bääte manøgø wär näk deŋŋe karge ŋweeri röömi, ni bär mare ki piny beeye rumme adäk, ni rumme moøgø røm ka cenø.

² Wärï tïïï ki gïï mo caala tuŋi mo ena maal wïth deŋŋe moa näk aŋween; ni tuŋi moøgø ogääbö na aciel ki dëëre, ni lëënynyï dëëre bäre ki nywïënyö ma jwïël.

³ Wärï tïïï ki dääe moe mo wø jøøp bur yïthge, ka akaape, ki cäänne, ki gïï wø lääm rïŋ wøk ki ge, ka athääk jwëëlli mo wø käär mäc ki ge. Jape moøgø bëët wär näk tïïyï ka nywïënyö ma jwïël.

⁴ Wärï tïïï ki gïn mo keda oŋana mo tïïc ka nywïënyö ma jwïël no okatø ni caala ajääp, ni kïthï deŋŋe karge ŋweeri ko oguudi aŋween mo tïïc ka nywïënyö ma jwïël.

⁵ Ni kïthï gïnögø yi gïn wø cïp olämme bääte no onyiik piny mëëth dïëre ni ena tier gïna no opööth wøk ki deŋŋe.

⁶ Ni tïïï ki jenni mo käär gïn wø cïp olämme bääte ki ge ki ri jaadha cwøl ni cïta, ni lëënynyï dëëtge ki nywïënyö ma jwïël.

⁷ Kany wø tïme na ri käär gïn wø cïp olämme bääte, jer tëër moøgø wär rwaak yïth oguudi, kwöra näk ariiø na en løøi ki løøi.

⁸ Gïn wø cïp olämme bääte manøgø wär tïïyï ko opämi ni yie owiiø ni ŋaam, ni tïïc ki køør nyuudhi mana nyoodha jïrï bäät kïdi.»

Jöör Tïïc Mar Kal Mar Oduŋkaara

⁹ «Køøre wärï tïïï ki kal kiper oduŋkaara na näk kar bëëtö mara. Ni tïïï ka abïï mar gëëŋ kiper løø kal jï kuna en tier-piny nee bëëde ni lïërö, na abïï manøgø tïïc ka lïïna mo tar mo mïërö, ni bär mar deŋŋe beeye gööye ma dïpa.

¹⁰ 'Ba jer kal wär näk ma pïërariiø, ki gïï wø cwöth tietge yïthge ma pïërariiø thuwø mo tïïc ka nywïënyö ma jwïël; ni ö nywïëny mo ogøn moa näk mo jer kal, ki gïï wø maai piny ki ge, ni tïï ka gwel-bïrö.

¹¹ Løø kal jï kuna en wï-piny thuwø wär tïïc ni caala maya, no okïthö ka abïï mo olïërö mo bär mar deŋŋe beeye gööye ma dïpa, ki jer kal ma pïërariiø, ki gïï wø cwöth tietge yïthge ma pïërariiø mo tïïc ka nywïënyö ma jwïël; ni ö nywïëny moa no ogøn mo jer kal ki gïï wø maai piny ki ge ni tïï ki gwel-bïrö.

¹² «'Ba løø kal ki jï løø kur pänh-cäŋ wär kïthi ka abïï mo olïërö mo bär mare beeye gööye ma pïërabïïc, ki jer kal apaar, ki gïï wø cwöth tietge yïthge ma apaar thuwø.

¹³ 'Ba dööŋ yi kal ki jï løø kur tuul-cäŋ beeye rumme ma pïërabïïc, ni røm ka cenø.

¹⁴ Køøre buut dhi kal løøk aciel man, wär kïthi ka abïï mo olïërö mo bär mar deŋŋe beeye gööye apaar kurbïïc, ki jer kal moe ma adäk, ki gïï wø cwöth tietge yïthge ma adäk thuwø.

¹⁵ Ni kïth løøk maya ka abïï mo olïërö ma gööye apaar kurbïïc, ki jer kal moe ma adäk, ki gïï wø cwöth tietge yïthge ma adäk thuwø.

¹⁶ «'Ba wär näk da abïï mo mar gëëŋ ma gööye ma pïërariiø kiper dhi kal, no ocwääö ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, ni cwääya dhaanhe mo waŋe riek ki tïïc manøgø, ki jer kal moe ma aŋween, ki gïï wø cwöth tietge yïthge ma aŋween thuwø.

¹⁷ Jer kal bëët wär tïïc ni da gïï wø maai piny ki ge mo tïïc ka gwel-bïrö, ki nywïëny moge mo ogøn mo tïïc ka gwel-bïrö, ki gïï wø cwöth tietge yïthge mo tïïc ka nywïënyö ma jwïël.

¹⁸ Bär mar kal ki deŋŋe wär tïme na rumme ma dïpa, ni dööŋ yie beeye rumme ma pïërabïïc, ni rumme moøgø røm ka cenø, ni bär mar abïïe moa näk gëëŋŋe ki piny beeye gööye obïïci. Na abïïe moa näk gëëŋŋe moøgø tïïc ka lïïna mo tar mo mïërö, ni ö gïï wø cwöth tiet jer kal yïthge ni tïï ki nywïënyö ma jwïël.

¹⁹ Jammi møga bëët moa näk mo tïïc mo oduŋkaara, ki dïnööy moe bëët, ki dïnööy mo kal bëët, wär tïïc ki nywïënyö ma jwïël.»

Jöör Tïïc Mar Maar Lamba

²⁰ «'Ba ïïni jø Icriel diï köömmö nee känge jïrï ki maaw mana tøŋ kiper lambae, mo käla ri nyïï jenni mo wø wel na mädhi, nee lambae bëëtge ni liel cooth.

²¹ Aran ki wääte lambae dege jiiŋŋø na karge nee lielge nyïma, a na Wuuö Jwøk, ni beeye ki mano täge ki wïthïënhö këël amöölla. Ni tïïc manøgø tïïcge yo oduŋkaany røømmø ŋää gëëŋi wøk na en nyïm acanduk man wø nyooth luumma tuut Jwøki ki jiy. Gïnögø wär tïme na ciik jï jø Icriel cooth këël mano këët røk beenhnhe moge moo ööi bëët.»