Bwøth Wøk 26 - Wëël Jwøk

Jöör Tïïc Mar Oduŋkaara

¹ «'Ba oduŋkaara mana näk kar bëëtö mara, a na Wuuö Jwøk, wär tïïyï ka abïïe apaar mo cwääc ka waac lïïna mo tar mo mïërö ki waare mo kïtge caala kït abïcøle ki ma dïmuur ki mo kwaar. Abïïe moøgø wär tïïyï ni dëëtge da kït nyïïatwiet maal mo wø cwøl ni kirubëlli, ni tïïya dhaanhe mo waŋe riek ki tïïc manøgø.

² 'Ba bär mar abïï man nø beeye gööye ma pïërariiø ka abära, ni dööŋ yie beeye gööye aŋween. 'Ba abïïe bëët wär näk mo gööye moge röömi.

³ Abïïe abïïc wär kwøc na abïï aciel, ni ö abïïci møga ni kwøi na abïï aciel thuwø.

⁴ Køøre deŋ abïï mana dïkwøŋ wär kïthï ki waare mo odølø mo kïtge caala kït abïcøle, ni kïthï deŋ abïï maya thuwø ki waare mo odølø ni caala mana dïkwøŋ.

⁵ 'Ba deŋ abïï mana dïkwøŋ wär kïthï ki waare mo odølø ma pïërabïïc, ni kïthï deŋ maya thuwø ki waare mo odølø ma pïërabïïc. Waare moa no odølø moo kïthï deŋ abïïe moøgø wär näk mo man nø dïët ki maya.

⁶ Ni tïïï ki nywïëny ma pïërabïïc mo tïïc ka warkey ni dhøkge ogønø, ni kuupï abïïe moø na ariiø yøø ki geni, kiper nee oduŋkaara na näk kar bëëtö mara nëëne na gïrpiny aciel.

⁷ «Køøre wärï tïïï ka abïïe mo tïïc ka jïëc dïëk ma atëëe, kiper nee rïëp bäät oduŋkaara na näk kar bëëtö mara. Abïïe moo tïïc wär näk ma abïïe apaar kurciel.

⁸ 'Ba bär mar abïï man nø wär näk ma gööye ma pïëradäk, ni dööŋ yie beeye gööye aŋween. 'Ba abïïe moøgø na apaar kurciel yøø wär näk mo gööye moge röömi.

⁹ Køøre abïïe abïïc wär kwøyï kur keerge, ni kwøyï moa dööŋ na näk abïciel kur keerge. 'Ba bïcier abïï mana näk okwøø ri møga wär ban maal bäät dho oduŋkaara.

¹⁰ Køøre deŋ abïï mana dïkwøŋ wär kïthï ki waare mo odølø ma pïërabïïc, ni kïthï deŋ maya thuwø ki waare mo odølø ma pïërabïïc.

¹¹ Ni tïïï ki nywïëny ma pïërabïïc mo tïïc ka nywïënyö ma jwïël ni dhøkge ogønø, ni kïthï geni yïthakic waare moa no odølø, ni kuupï abïïe nee tïme na rëëbi aciel.

¹² 'Ba thääŋ abïï mano dööŋ wøk røk abïïe moa kuup na rëëbi wär pööth piny mëëth ni kaal abïï oduŋkaara, nee dööŋe ni lïërö ŋää oduŋkaara.

¹³ Ni ö deŋ abïï rëëbi ni pööth piny mëëth løø oduŋkaara løøi ki løøga, ni deŋ abïï oduŋkaara ee kaalø ki gööye oceele, kiper nee oduŋkaara uume.

¹⁴ Ni tïïï ki rëëbi kipere mo tïïc ka pëët nyöök rööm mo otïïö ki kït mo kwayø, ni tïïï ki rëëbi mør thuwø mo kïth bääte maal mo tïïc ka pëët lääy mo onyøŋø.

¹⁵ «Køøre ï doo tïïö ko opämi mo jaadha cwøl ni cïta kiper oduŋkaara na näk kar bëëtö mara, ni cïbï ge piny ni cuŋŋö.

¹⁶ 'Ba bär mar opäm man nø beeye rumme apaar, ni dööŋ yie beeye rumi aciel ki thääŋö, ni rumme moøgø røm ka cenø.

¹⁷ 'Ba wär näk da tiel ariiø ro opäm man nø mo løny ki man gääp opämi ki ge. Køøre opämi bëët mo oduŋkaara diï tïïö ni caala manøgø.

¹⁸ Tïïï ko opämi ma pïërariiø kiper jï løø tier-piny mar oduŋkaara.

¹⁹ Ni tïïï ki gïï wø cwöth tietge yïthge ma pïëraŋween mo tïïc ka gwel-bïrö kiper nee opämi moa näk pïërariiø cwöth yïthge, ni gïï wø cwöth tietge yïthge ariiø moi nø ena tier opäm man nø kiper tiete na näk ariiø.

²⁰ Ni tïïï ko opämi ma pïërariiø thuwø kiper jï løø wï-piny mar oduŋkaara,

²¹ ki gïï wø cwöth tietge yïthge ma pïëraŋween mo tïïc ka gwel-bïrö, ni gïï wø cwöth tietge yïthge ariiø moi nø ena tier opäm man nø.

²² Ni tïïï ko opämi abïciel kiper ŋää oduŋkaara na en jï løø kur pänh-cäŋ.

²³ Ni tïïï ko opämi ariiø kiper gøøde moa en ŋää oduŋkaara.

²⁴ Ni ö opämi mo gøøt ni kuubi ni tägi ka tiere piny këël mano këët røk oguudi moa en maal. Ni ö opämi mo gøøde karge riet ni tïïi ni caala manøgø.

²⁵ 'Ba kwään opämi moo en ŋää oduŋkaara beege abära, no opäm man nø jïre da gïï wø cwöth tiete yïthge ariiø mo tïïc ka gwel-bïrö, ni gïï wø cwöth tiet opämi yïthge bëët beege apaar ka abïciel.

²⁶ «Køøre wärï tïïï ki jenni mo caala läämme ki ri jaadha cwøl ni cïta, ni beege abïïc kiper opämi moa en løø oduŋkaara løøi,

²⁷ ka abïïc kiper opämi moa en løø oduŋkaara løøga, ka abïïc møøk kiper opämi moa en ŋää oduŋkaara na en jï løø kur pänh-cäŋ.

²⁸ Ni ö läämmö mana en dïër ki man mak opämi ki dïge, ni rwaagi ki teegø man këël mano këët teegø maya.

²⁹ 'Ba dëët opämi wär lëënynyï ki warkey, ni tïïï ko oguudi mo warkey kiperge, nee tïmge na mäge kiper jenni moa näk caala läämme, ni leenyï warkey dëët jenni moøgø.

³⁰ «Køøre nø, oduŋkaara na näk kar bëëtö mara wär gur piny ki køør nyuudhi mana nyoodha jïrï bäät kïdi.

³¹ «Køøre wärï tïïï ka abïï man wø gëëŋ kanya en kur keere na pere leth ki gø, ni tïïc ka waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö; ni tïïyï dëëre ni da kït nyïïatwiet maal mo wø cwøl ni kirubëlli; ni tïïya dhaanhe mo waŋe riek ki tïïc manøgø.

³² Ni lïërï abïï manøgø røk cööthe aŋween mo tïïc ka jaadha cwøl ni cïta ni dëëtge olëënynyö ki warkey, ni nywïëny moge moa no ogøn tïïc ka warkey, ni cööthe moøgø cuŋŋa bäät gïï wø cwöth tietge yïthge ma aŋween mo tïïc ka gwel-bïrö.

³³ Abïï mana näk gëëŋi wär lïër maal ni dïët ki nywïëny moa no ogønø na näk abïï mar oduŋkaara okuubö ki ge, ni bëëde ni lïërö tiet nywïëny moøgø. 'Ba acanduk man wø nyooth luumma tuut Jwøki ki jiy wär käl kanya no ogëëŋö; ni ö abïï mana näk gëëŋi ni bëëde ni ena yïthakic kanya en kur keere ki kanya en kur keere na pere leth.

³⁴ Ni kïthï rëëbi mana näk nyuudhi mar wëën raay bäät acanduk man wø nyooth luumma tuut Jwøki ki jiy, na acanduk ena kanya en kur keere na pere leth.

³⁵ 'Ba tharabëëta wär cïp wøk ŋää abïï mana näk gëëŋi; ni cïbï gïn wø cuŋ lambae bääte thuwø wøk ni dïët ki tharabëëta ni ena jï kuna näk da tier-piny kany wø døny yo oduŋkaara; ni tharabëëta ena jï kuna näk da wï-piny yo oduŋkaara.

³⁶ «Køøre wärï tïïï ka abïï mo mar gëëŋ kiper dho oduŋkaara, ni cwääc ka waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö; ni cwääya dhaanhe mo waŋe riek ki tïïc manøgø.

³⁷ Ni tïïï ki cööthe abïïc ki ri jaadha cwøl ni cïta kiper abïï mana näk gëëŋi mana näk mar dho oduŋkaara, ni leenyï warkey dëëtge, ni tïïyï nywïëny moge moa no ogøn thuwø ki warkey; ni ö gïï wø cwöth tietge yïthge ni tïïyï ge na abïïc ni tïïc ka nywïënyö ma jwïël.»