Bwøth Wøk 24 - Wëël Jwøk

Kanya Ö Jiyi Na Jïëcge Luumma Tuut Jwøki Ki Geni

¹ Køøre Wuuö Jwøk aköö jï Modhe, ni «Ïnhnhu maal baŋa bäät kïdi, ïïni ka Aran ki Nadap ka Abiyu ki jiy ma pïërabïriiø røk jø døøk Icriel. 'Ba kanyo tïme ni karu poot bäär mëëth ki aani, wäru cuŋŋu kaace ni wøørru aani.

² 'Ba ïïni na Modhe keerï en, wärï nyänh buuta, 'ba jø møga kär nyänhnhö, këël jiy bëët thuwø ba doo ïnhnha maal ki ïïni.»

³ Køøre Modhe aduu piny ni køp luup bëët jï jiy, moa caan Wuuö Jwøki ki ciik moe bëët; ni ö jiyi bëët ni løkge gø ki dwøl aciel ni köge, ni «Luup bëët moa caan Wuuö Jwøki tïïcwa tïïö.»

⁴ Ni ö Modhe ni göör luup piny bëët moa caan Wuuö Jwøki. Køøre ena ö maal ka amöölla cøøn, ni cøøe ni tïïe ki gïn wø cïp olämme bääte tier kïdi, ni tïïc gø ki kïte apaar kurriiø mo ee cwöth piny ni ee päärö ki kwään wïth tuŋi mo jø Icriel na näk apaar kurriiø.

⁵ Ni ö eni ni jääge ki jiy mo dëëtge poot teek røk jø Icriel, ni cige ni cïpge ko olämme mo wø waaŋ, ni ŋarge rwädhe no olämme mo wø duunni ki mëër jï Wuuö Jwøk.

⁶ Ni ö Modhe ni lwør thääŋ remø ni kïth gø yïth athääe, ni ö thääŋ mana dööŋ ni jør gø bäät gïn wø cïp olämme bääte manøgø.

⁷ Kanyøgø wëëlö mana gööre, na näk luumma tuut Jwøki ki jiy, alwøre ni kwaan gø ni wïnyö jï jiy; ni kö jiyi, ni «Gïïa caan Wuuö Jwøki bëët yøø jïëcwa jïëö, ni tïïcwa geni.»

⁸ Ni ö Modhe ni lwør remø mana dööŋ ni jør gø dëët jiy ni kööe, ni «Man beeye rem luumma tuut Wuuö Jwøki ki uuni ki køør luup moøgø bëët.»

⁹ Køøre Modhe ka Aran ki Nadap ka Abiyu ki jiy ma pïërabïriiø røk jø døøk Icriel gena eth maal bäät kïdi,

¹⁰ ni jootge Jwø Icriel, ni kuna en tiete yie jï piny da gïn mo keda thudhi mo caala kïdi mo paŋŋi ni tøŋ ni caala maal.

¹¹ 'Ba Jwøk bäŋ gïn mo ee tïïö dëët jøøgø na näk dïbwöthe mo jø Icriel yøø. Geni Jwøk ajootge; køøre gena cämö ni mäthge kaace.

Kanya Døø Modhe Baŋ Jwøk Bäät Kïn Caynay

¹² 'Ba Wuuö Jwøk acäŋ köö jï Modhe, ni «Ïnh maal baŋa bäät kïdi ni bëëdï kany; køøre opäp kïte moa näk ciik ki gïïa cema yaa göör piny bäätge cïba cïbö jïrï, kiper nee jiy pwönynyï ki geni.»

¹³ Køøre Modhe atïŋŋö ki Jøcua na näk ŋat tïïc mare, ni cige maal bäät Kïn Jwøk.

¹⁴ 'Ba kanya poot Modhe ki Jøcua ni ge poot kär tïŋŋö, Modhe aköö jï jø døøŋŋø, ni «Koorru waani kany këël kanyo duuwa baŋu. Ennø, Aran ki Ur nutö buutu; wäro dee ŋat mo jïre da løøk, wär eni ci baŋge.»

¹⁵ Køøre Modhe aci maal bäät kïdi, ni ö pöölö ni uum kïdi.

¹⁶ Kanyøgø ajiem Wuuö Jwøk aput ö ni bëëde bäät Kïn Caynay; ni ö Kïn Caynay ni bëëde no ouum pöölö ki nïne abïciel. 'Ba na tïme na ri bïriet nïne, Wuuö Jwøk acwötö ki yi pöölö ni cwøl Modhe.

¹⁷ 'Ba jø Icriel ajiem Wuuö Jwøk nëënö jïge bäät kïdi keda maac mo waaŋ mo thööra jammi bëët.

¹⁸ Ni ö Modhe ni døny dï pöölö ni ci maal bäät kïdi, ni bëëde bäät kïdi ki cääŋŋe ma pïëraŋween ki wärre ma pïëraŋween.