Bwøth Wøk 23 - Wëël Jwøk

Ciik Møøk Ma Teeŋi

¹ «Kär luubö ma luum tööt waayï. Kärï rööpö ki ŋat mo raac ki man cäänï ki luum tööt dëër dhaanhø mør.

² «Kärï dwätö ki jøøa thööth ki man tïïï ki gïn mo raac. Kärï cäänö ki luubö kar løøk niï caatha køør jøøa thööth kiper nee luubö mana näk adïëri daagï.

³ Kär dhaanhø cwagï kar løøk kiper can mare.

⁴ «Ni näk miï røømmø ki dhieŋ wala arëën mar nyimän marï no orwäänyö, ka adïëri møn, wär dwøk baŋe.

⁵ Ni näk ma arëën dhaanhø mo män ki ïïni iï joodø no opädhö ni baa ena dïŋääe, kärï aay buute jaak; ka adïëri møn, eni diï kønyø ki tïŋ gø maal.

⁶ «Luum ŋata can kär kaatï kar løøk.

⁷ Bëëdï ni karï bäär ki luum løøk mo yie da tööt, ni ba ŋølï thøø bäät dhaanhø mo mare beer mo bäŋ gïn ee baaø, kiper aani, a na Wuuö Jwøk, jøøa reyø ba wëënna.

⁸ «Kärï jïëy ki jammi mo wø cïp ki piny, kiper jammi mo wø cïp ki piny waŋ ŋata wïïe leer di cøørø, ni wiil luum ŋata näk mare adïëri.

⁹ «Kär wëëllö mo path caannu; kiper uuni ki dëëtu gïr bëët wëël ŋäyu, kiper uuna kwøŋ bëëtö ni uuna wëëlle yi ŋööm Ijep.

Ciik Kiper Bïriet Cwiiri ki Bïriet Nïne

¹⁰ «Pwöth mou wär piithu ki caammi cooth ki cwiiri abïciel, ni kayu geni.

¹¹ 'Ba noo tïme na ri bïriet cwiiri, wär weyu ni ba puurru, kiper nee caammi mo otuy keerge yïthge nee tïmge na cam jï jø pou moa can; ni ö moo dhäthi ni tïmge na cam jï lääc paap. Ajïniine mou thuwø wär weyu ni caala pwöth mou.

¹² «Tïïe mou dou tïïö ki yïth nïne moa näk abïciel. 'Ba noo tïme na bïriet nïne, tïïc dou wiiø, kiper nee dhäk mou ka arëëni mou dëëtge jwömge, ni ö wäät laaŋe moa nywøl mïëyu bëët ki wëëlle moa path mo wø tïny uuni ni jïtge ki jwöm dëël.

¹³ «'Ba gïïa caana jïïu bëët yøø, beerra man magu rou ki man gwøgu geni. Kär dee nyeŋ juu møøk mo cøøru wala gïrge wïnyö dhøgu.

Ciik Kiper Ajwöm Moa Näk Kwöre Adäk Ki Yi Cwiir

¹⁴ «U doo tïïö ka ajwöm jïra kwöre adäk ki yi cwiir.

¹⁵ «Ajwöm Møga Näk Ree Bäŋ Thømmø dou gwøø. U dou cämö ki nïne abïriiø ki møø mo ree bäŋ thømmø, kaawat mana köömma uuni. 'Ba møgøgø cammu yi kanya näk owäŋŋö yi dwääna cwøl na Abip; kiper beeye dwääna ööu wøk yie ki Ijep. 'Ba kär dee ŋat mo ö nyïma ki ceŋŋe jaak.

¹⁶ «Ajwöm Kac thuwø mar caammi moa kwøŋ ciek na jootu ri caammi moa piithu yïth pwöth mou wär wøørru; ni wøørru Ajwöm Thum Kac mar aŋuun cwiir kany wø kïthu caammi yïth odïï mou moa jootu yïth pwöth.

¹⁷ «Kwöre adäk ki yi cwiir cooth cwøw mou bëët doo ööa nyïma, a na Wuuö Jwøk na en teeki cere.

¹⁸ «Olämi man wø ŋaal ni wø remme cïpu jïra, kär cïpu na aciel ki møø mo ree da thømmø. Kär dwäälö mar olämi man wø cïpu jïra bëëdö këël amöölla ni ba waaŋŋu.

¹⁹ «Thwöth caammi moa beyø moo kwøŋ ciek dïkwøŋ yïth pwöth mou, dou kïtha yi Øt Wuuö Jwøk na näk Jwøu. «Kär nyidiel thaallu ki caa menni.

Ciik Kiper Jø Icriel Kiper Kanyo Pïïcge Yi Ŋöömö Mana Nyään

²⁰ «Ennø, aani, a na Wuuö Jwøk, a jääŋŋö ki nyïïatwiel maal mo cäädhi nyïmmu mo gwøga uuni ki yi wääth maru, kiper nou kïth kanya näk yaa jiiŋŋø kiperu.

²¹ Gwøgu rou nyïme, ni leŋŋu dwøre. Käru kweer ki mare, kiper eni gïïo baayu ba wëënne, kiper gïno tïïe, otïïe ki nyeŋŋa.

²² 'Ba ni näk mo dwøre leŋŋu leŋø møn, ni tïïyu gïï wø caana jïïu bëët, a puta tïmö naa män ki nyïïmän mou, ni caanna jø wø caan uuni.

²³ Kiper nyïïatwiel maal mara manøgø ocäädhi maal nyïmmu, ni kïth uuni yïth ŋøøp jø Amör, ki jø Këth, ki jø Përec, ki jø Keenan, ki jø Ëwi, ki jø Jeebuc; ni puta geni raanynyø na bäre.

²⁴ Kär juu mo jøøgø lammu, wala u tïnynya geni, wala u ŋwaala tïïe mo jøøgø. Juu moge dou raanynyø na bäre, ni tøgu gïï wø lamge na näk ege cwöth piny.

²⁵ 'Ba tïnynyu aani, a na Wuuö Jwøk na näk Jwøu; køøre uuno gwïëdha ki caammi mou ki pïï mou, ni paanya täwe bäätu.

²⁶ 'Ba dhaagø mo nyilaal bwönna wøk yie, wala dhaanhø ma bwøc tïmö ni bäŋgø pou; ni ö nïr kwøwi mou ni pääŋa ge na karge.

²⁷ «'Ba aani, a na Wuuö Jwøk, lwär mo dwøŋ jääŋŋa jääŋŋö nyïmmu kanyo cou yie, ni kiera wïth jø ocou baŋge kaace, ni løøa nyïm nyïïmän mou wøk ni reŋge ki uuni.

²⁸ Aani piini ojääŋŋa nyïmmu kiper nee jø Ëwi ki jø Keenan ki jø Këth nee riemge wøk nyïmmu.

²⁹ 'Ba jøøgø ba riema wøk nyïmmu ki yi cwiir aciel yie aciel bëët, kiper nee paac ba dööŋe na paap jïïu, ni ö lääc paapi ni tïmge ni thööth yie.

³⁰ 'Ba jøøgø riema wøk mëëth nyïmmu, këël mano tïmu nou thööth ni mayu piny.

³¹ Ni tïïa keew maru ni täge ka Naama Kwaar këël mano këët ri naam jø Pilitin, ni ö keewi maya ni täge ki dï paap këël mano këët ri Naam Upareeti. Jøøa bëëdö yïth ŋøøpøgø ocïba ceŋŋu, ni putu geni riem wøk nyïmmu.

³² Kär dee gïn mo tuutu ki geni wala ki juu moge.

³³ Kär ge wëëgu bëëtö yïth ŋøøm mou, kiper nou ba wëëkge bääyö dëëra; kiper ni näk mo juu moge lammu lamø, ka adïëri møn, ge tïmö ni ge caala abïëp kiperu.»