Bwøth Wøk 20 - Wëël Jwøk

Kanya Ö Jwøki Na Cïp Ciik Moa Näk Apaar

¹ 'Ba Jwøk luup moi bëët acaane, ni kööe,

² ni «Beeye a na Wuuö Jwøk na näk Jwøu, na käl uuni wøk ki yi ŋööm Ijep, paana näk po laŋ.

³ «Kär dee juu møøk jïrï këët nyïma.

⁴ «Kär dëërï tëëŋŋï ki kït gïn mør jaak mo caala kït gïrpiny mo ena maal, wala mo ena bäät piny, wala mo ena yi naam.

⁵ Kär geni lamï, ni ba tïnynyï geni, kiper aani na Wuuö Jwøk na näk Jwøï, aana Jwøk ma ŋat keec, ni jø wø män ki aani, gïïa bacge kïtha bäät obwöre moge ni jääla geni këël dää beenhnhe, ni put pïï ri ŋweer beenhnhe.

⁶ 'Ba jø wø mëër ki aani ni wø gwøk ciik 'moa, mëëya ni wø ba jøøl nyoodha nyoodhø jïge, këël mano pïïe ri jiy ma kum kum.

⁷ «Kär nyeŋ Wuuö Jwøk na näk Jwøï cwølï jaak, kiper ŋat wø cwøl nyeŋ Wuuö Jwøk ki jaak ba doo wec Wuuö Jwøki ka ajäla.

⁸ «Caar wïïï ki cäŋ jwömö, nee bëëde ni ena kur keere na mar Jwøk.

⁹ Tïïï ki nïne abïciel, ni tïïyï tïïe moa diï tïïö bëët ki yïth nïne moøgø.

¹⁰ 'Ba bïriet nïne beeye cäŋ jwömö jï Wuuö Jwøk na näk Jwøï. Kär dee gïn mo tïïyï dïcäŋöce, ïïni wala wäädï wala nyaarï, wala ŋat tïïc marï ma dïcwøø wala ma dhaagø, wala lääc paac moï, wala wëëllö mo path mo bëëdö ka ïïni.

¹¹ Kiper Wuuö Jwøk maal ki piny ki näm ki gïïa en yïthge bëët acwääe ki nïne abïciel, ni jwöm ree ri bïriet nïne. Kiper manøgønø, Wuuö Jwøk cäŋ jwömö agwïëdhe ni tïïc gø na cäŋ mo ena kur keere.

¹² «Wøør wäru ki meru, kiper nee nïr kwøw moï thöönhge yi ŋöömmo cïp Wuuö Jwøki na näk Jwøu jïïu.

¹³ «Kärï nägö ki dhaanhø.

¹⁴ «Kärï kännö ki luk.

¹⁵ «Kärï kwätö.

¹⁶ «Kärï cäänö ki tööt dëër wadu.

¹⁷ «Kär cwïnyï päl ki po wadu; ni ba päth cwïnyï kiper cï wadu, wala ŋat tïïc mare ma dïcwøø wala dhaagø, wala rwaath mare wala arëën mare; këël gïn mør jaak mo mar wadu, kär cwïnyï päl kipere.»

¹⁸ 'Ba kanya ö jiyi bëët na jootge gø ni køth pöödö, na agaackøth mal, ni tuuŋ jwöŋö, ni kïdi duuŋ ki jïrö, jiy dëëtge aput tïmö ni kwanynyi, ni cuŋge kany mo bäär.

¹⁹ Køøre gena köö jï Modhe, ni «Beerra man tïme ni cäänö ïïni ki dëërï kiree ki waani; luubö marï leŋwa leŋø. 'Ba kiper nee wa ba thøwa, beerra man ba cään Jwøki ki waani.»

²⁰ 'Ba Modhe aköö jïge, ni «Käru lwäyö; kiper Jwøk ööi ni päänynya uuni, nou bëëdu nou lwäär ki eni, kiper nou ba bääyu.»

²¹ Kar kanyøgø jiy aput cuŋŋö kany mo bäär, ni ö Modhe ni put nyiik buut pöölla cøl kanya en Jwøki yie.

Ciik Kiper Gïn Wø Cïp Olämme Bääte

²² Køøre Wuuö Jwøk aköö jï Modhe, ni «Caanï jï jø Icriel ni kööï, ni ‹Uuni ki dëëtu kiree aana jootu naa cäänö ki uuni naa ena maal.

²³ Kär a rwöpu ki juu møøk; juu mo tïïc ka warkey wala juu mo tïïc ka gwel-bïrö kär tïïyu kiper dëëtu.

²⁴ « ‹Wäru tïïu jïra ki gïn wø cïp olämme bääte mo tïïc ko odhöönh, ni cïpu bääte ko olämme mo wø waaŋ ko olämme mo wø duunni ki mëër, ni cïpu røk rööm mou ki rwädhe mou. Ki yïth kwöro wäŋŋa bëët ni wïc di parø ki aani, aani, a ööa baŋu kaaca ni gwïëdha uuni.

²⁵ 'Ba ni näk mou tïïö jïra ki gïn wø cïp olämme bääte ki kïte, kär nou tïïya gø ki kïte mo otøø, kiper ni näk mo you gudö ki nywïënyö mar tøk, u pääta gøøni.

²⁶ Käru tïïö ki gïn wø cïp olämme bääte jïra mo dhaanhø etha maal ki bäät gïïa näk othørø, kiper nee ŋat wø edhi nee bathe ba joot jiyi.› »