Bwøth Wøk 16 - Wëël Jwøk

Kanya Ö Jwøki Na Cïp Meena Ka Ajwëëyi Jï Jø Icriel

¹ Køøre lwaa Icriel bäre atïŋŋö ki Ëlim, ni aacge ni pïïcge dï paap mo cwøl ni Cin ni nïr dwääy apaar kurbïïc mar riet dwäde moa aage wøk ki yi ŋööm Ijep. 'Ba paabøgø ena yïthakic Ëlim ki Kïn Caynay.

² Kanyøgø lwaa Icriel bäre atïmö ni ŋurö ki nyeŋ Modhe ka Aran dï paap.

³ Ni köge jï Modhe ka Aran, na «?Aŋø, ba doo beerra mana dewa thøø cer Wuuö Jwøk jaak yi ŋööm Ijep kanya bëëtwa yie ni waano pï piny lak dääe mo rïŋ, ni wa cämö ki kwane ni jäŋwa? 'Ba ennø, waana kälu wøk ni kälu waani dï paabi en kiper nee lwaak man bäre 'nägu ki käc.»

⁴ Kanyøgø Wuuö Jwøk aköö jï Modhe, ni «Ennø, muunni wëëga pänhnhö ki maal kaamar køth kiperu. Køøre jiy ocii ni cooŋge muunni moøgø kanya ciel mo orømø kiper dïcäŋ man nø cooth. Gïnögø tïïa tïïö naa päänynya geni ki man näk mo ge cäädhi ka køør ciik 'moa wala jïge bäyö.

⁵ Køøre thuwø ri bïcier nïne, kany wø jiiŋge moa kwanyge, puta tïmö ni päl ni rømø kiper nïne ariiø.»

⁶ Køøre Modhe ka Aran aköö jï jø Icriel bëët, ni «Kanyo tïme na abøøya kawaane, putu ka ŋäc møn ni Wuuö Jwøk bee eni na käl uuni wøk ki yi ŋööm Ijep;

⁷ noo tïme na amöölla thuwø, ajiem mar Wuuö Jwøk neennu neenø; kiper ŋurö maru mana ŋuru dëëre ki gøøni awïnynye. ?Aŋø, ni ŋuru dëëtwa en, waana ŋaani cøøn?»

⁸ Ni cäŋ Modhe köö, ni «Beeye Wuuö Jwøk noo mooc uuni ki rïŋö man cammu ka abøøya, ki møø man jäŋŋu ki gø ka amöölla. Kiper eni na Wuuö Jwøk ŋurö mana ŋuru dëëre ki gøøni awïnynye. ?Aŋø, waana ŋaani cøøn? Ŋurö maru ba en bäätwa, 'ba ena bäät Wuuö Jwøk.»

⁹ Kanyøgø Modhe aköö jï Aran, ni «Caanï jï lwaa Icriel bäre ni kööï, ni ‹Ööu nyïm Wuuö Jwøk, kiper ŋurö maru mana ŋuru ki gøøni awïnynye.› »

¹⁰ 'Ba kanya bëëde na Aran cäänö ki lwaa Icriel bäre, gïn mør atägö. Geni gena lwïthö kuna näk da paap; køøre ajiem Wuuö Jwøk anëënö ki yi pöölö.

¹¹ Ni cään Wuuö Jwøki ki Modhe ni kööe,

¹² ni «Ŋurö mana ŋur jø Icrielli ki gøøni awïnynya. Ennø, caanï jïge ni kööï, ni ‹Kanyo tïm cäŋŋi ni manynya pädhö, uuno cämö ki rïŋö; ka amöölla thuwø uuno jäŋ ki møø, ni putu gø ŋäc møn ni beeye aani na Wuuö Jwøk na näk Jwøu.› »

¹³ 'Ba kanya tïme na abøøya møn, ajwëëyi aput öö ni pääŋge twïër; køøre ka amöölla lak twïër atïmö ni da thööy mo thööth.

¹⁴ 'Ba kanya ö thööy na talge, gïï møøk mo thenh thenh mo reep mo caala bøøge mo kwön ajoot piny dï paap, ni piny ege gääbö bäre.

¹⁵ 'Ba kanya ö jø Icrielli na jootge gø, kiper na kucge tier gïnögø, gena cäänö yïthakicge keerge ni köge, ni «?Man agïnaŋø?» Køøre Modhe aköö jïge, ni «Gïnögø beeye møø mana cïp Wuuö Jwøki jïïu kiper nee cammu.

¹⁶ Gïna caan Wuuö Jwøki kiper gïnögø beeye en, ena köö, ni ‹Ŋati man nø wär cuŋ kanya ciel ki møø moo rømø kiper cam mare. U doo lwötö ki kar rumi mana cwøl ni omer jï ŋati man nø, ki køør kwään jiy moa en yo oduŋkaara mar ŋati man nø.› »

¹⁷ Kanyøgø jø Icriel gïna caan jïge atïïcge. Ni cuŋge ki muunni, ni jø møøk dëëtge cooŋa mo thööth ni møøk cooŋa mo nøk.

¹⁸ 'Ba kanya rømge gø ki rumi mana cwøl ni omer, ŋata no cuuŋö ki mo thööth, bäŋgø mo odööŋ wøk wïth moe. Ŋata näk cooŋa mo nøk thuwø bäŋgø mo orëëm wïth moe. Ŋati man nø cooŋa mo orømø kiper cam mare.

¹⁹ Ni kö Modhe jïge, ni «Kär dee ŋat mo wëëö ri mare kiper amöölla mør.»

²⁰ 'Ba luum Modhe kärge leŋø. Køøre jø møøk dëëtge thäk moge akange kiper amöölla, ni ö moa kange ni jït yïthge ki twöŋi ni kwäkge. Ni ö Modhe ni put wëër ki geni.

²¹ 'Ba geni ka amöölla cooth muunni wø cooŋge cooŋø, ni ŋati man nø cooŋa mo orømø kiper cam mare. 'Ba kany wø lëënh cäŋŋi, muunni moa en dï pwöla puta leenyø.

²² 'Ba kanya tïme na bïcier nïne, gena cuuŋö ki muunni mo orømø kiper nïne ariiø. Ni ö ŋati man nø ni jïte ki kar rumme ariiø, ni rømge ki rumi mana cwøl ni omer. 'Ba kanya ö wïth lwaae na caange gø jï Modhe,

²³ Modhe aköö jïge, ni «Gïna caan Wuuö Jwøki beeye en, ena köö, ni ‹Diøø beeye cäŋ jwömö, ni beeye cäŋ jwömö mana en kur keere na mar Wuuö Jwøk. Dïcäŋi deellu gïïa dou deelø, ni thaallu gïïa dou thaalø, ni kannu moa näk odööŋ jïïu kiper amöölla.› »

²⁴ Køøre moa näk odööŋ aputge kan kiper amöölla, kaawat mana caani ya Modhe jïge. 'Ba bäŋgø mo okwäk wala mo yie ojïtö ki twöŋi.

²⁵ Ni kö Modhe, ni «Cammu muunni moøgø dïcäŋi. Kiper dïcäŋi en beeye cäŋ jwömö na mar Wuuö Jwøk; ni bäŋ møø mo jootu dïcäŋi dï pwöla.

²⁶ 'Ba ki yïth nïne moa näk abïciel, løny jïïu ki man cuuŋu ki muunni; 'ba no tïme na bïriet nïne na näk cäŋ jwömö, tïmö ni bäŋgø.»

²⁷ Køøre kanya tïme na ri bïriet nïne, jø møøk dëëtge aa wøk nee cuŋge kiper dëëtge; 'ba bäŋgø mo ege joodø.

²⁸ Kanyøgø Wuuö Jwøk aköö jï Modhe, na «?A këël kany mo nyïëdi nø no bëëdu nou kweeyø ki man gwøgu ciik 'moa ki gïïa cema?

²⁹ Ennø, a na Wuuö Jwøk, uuna mooa ki cäŋ jwömö. Kiper manøgø nø, u mooa mooø ki muunni ma kar nïne ariiø ri bïcier nïne. Ŋati man nø beerra man bëëde kare, ni bäŋe dhaanhø mo paany ree kare ri bïriet nïne.»

³⁰ Køøre jiy ajwöm ri bïriet nïne.

³¹ Kanyøgø jø Icriel nyeŋ møø acwølge ni meena. 'Ba møø manøgø tar ni caala nyeŋ nyïmi, ni ŋweethe caala møø mo okïthö ki maar kïc.

³² Køøre Modhe aköö, ni «Gïna caan Wuuö Jwøki beeye en, ena köö, ni ‹Beerra man känu ki møø mo røm ka rumi mana cwøl ni omer ni päŋ. Ni bëëde ni you kanø ki yïth beenhnhe mou bëët, kiper nee møø mana caama uuni ki gøøni dï paap kanya käla uuni wøk ki yi Ijep nee joot beenhnhe moøgø.› »

³³ Kanyøgø Modhe aköö jï Aran, ni «Lwötï ki dak ni kïthï yie ki meena mo røm ka rumi mana cwøl ni omer, ni cïbï dak manøgø nyïm Wuuö Jwøk, nee bëëde no okanø këël yïth beenhnhe mou bëët.»

³⁴ 'Ba kaawat mana ö Wuuö Jwøki na kööm Modhe, Aran acøø ni cïp dak manøgø piny nyïm acanduk man wø nyooth luumma tuut Jwøki ki jiy, kiper nee kan.

³⁵ 'Ba jø Icriel abëëdö ni cama meena ki cwiiri ma pïëraŋween këël mana pïïcge yi ŋöömma bëët jiyi yie. Ni putge bëëtö ni ge cama gø këël mana pïïcge keew mar ŋööm jø Keenan.

³⁶ 'Ba rumi mana cwøl ni omer yïthe apaar tïmö na rumi aciel mar rumi mana cwøl ni iipa.