Bwøth Wøk 11 - Wëël Jwøk

Kanya Ö Jwøki Na Caan Thøø Mar Kaai Mo Jø Ijep

¹ Kar kanyøgø Wuuö Jwøk aköö jï Modhe, ni «Da gïrpiny aciel mør mo leth døc mo odööŋ mo poot jääŋŋa jääŋŋö bäät Peerø ki bäät Ijep. 'Ba ki køør manøgø nø, Peerø wääth ocïbe jïïu ni putu aay kany. 'Ba kanyo cïp wääth jïïu nou aayu, ka adïëri møn, uuno put riem wøk bëët kany.

² Ennø, caanï ni wïnyö jï jø Icriel bëët, ni dïcwøø man nø doo pëëö baŋ nyawati ma ŋat Ijep, ni ö dhaage man nø ni pëëe baŋ nyawati ma ŋat Ijep kiper nee jïtge ki jammi moa näk tïïc ka warkey ki moa näk tïïc ka gwel-bïrö.»

³ 'Ba Wuuö Jwøki yïth jø Ijep atïïe ni met ki jø Icriel. Ni ö Modhe ni nëëne na dhaanhø mo kare dwøŋ yi ŋööm Ijep ki jï jø kööre mo Peerø ki jø Ijep bëët.

⁴ Ni cäŋ Modhe köö jï Peerø, ni «Gïna caan Wuuö Jwøki beeye en, ena köö, ni ‹Kanyo tïme na dhöör dï wäär aano ö dï Ijep,

⁵ ni ö obwöc cwøwi moa näk kaai na en yi ŋööm Ijep bëët ni thøwge, ni tägi ka kaa mar Peerø na en paaci cere, këël kany dhaagø ma laŋŋø mo gudö bäät kïn guur, këël kaai mo lääc paac bëët.

⁶ Ni ö oduuru mo dwøŋ døc ni tïme ni dagø yi ŋööm Ijep bäre, ni beeye oduuru mo teeŋe poot kär tägö cøøn, ni ba cäŋ tägö këët.

⁷ 'Ba ki baŋ jø Icriel, ki mano täge ki dhaanhø këël lään paac, bäŋ gwök mo guyi bäätge, kiper nee putu ŋäc møn ni Wuuö Jwøk da apääk mo ee tïïö yïthakic jø Ijep ki jø Icriel.› »

⁸ Ni cäŋ Modhe köö jï Peerø, ni «Jø kööre moï bëët moi ni kany ii, ge ööa baŋa ni këëlge cøŋge piny ni kuulge wïthge piny nyïma, ni köge, ni ‹Ïïni ki jøøa caath køørï bëët cou wøk powa.› Ki køør manøgø nø, aano put ci wøk.» Ni ö Modhe ni put døny wøk nyïm Peerø no owëër døc.

⁹ Kar kanyøgø onø caan Wuuö Jwøki jï Modhe, ni «Kiper nee gïï mo rëëma ec 'moa rege meetge bäät Ijep, Peerø luubö maru ba wïnynye.»

¹⁰ 'Ba Modhe ka Aran gïï mo rëëma ec moøgø atïïcge nyïm Peerø; 'ba Wuuö Jwøk cwïny Peerø poot døøye mo teek, ni ö Peerø ni män jø Icriel ki man aacge paare.