Bwøth Wøk 1 - Wëël Jwøk

Kanya Nyaac Jø Icrielli Yi Ŋööm Ijep Ni Caar Geni

¹ 'Ba nyeŋ wäät Icriel moa öö Ijep ki wääge ma Jeekap, ni ŋati man nø ööi ka jø paare,

² beege Ruben, ki Cimien, ki Libay, ki Juuda;

³ ki Icakar, ki Dhebulan, ki Benjamen;

⁴ ki Daan, ki Naptali, ki Gaat, ka Acer.

⁵ Kwään jiy bëët moa käl ri Jeekap beege jiy ma pïërabïriiø. 'Ba Jocep kar kaaca oløny ni ena Ijep.

⁶ Køøre Jocep ki coki ki uutwänni, ki beenhnhø mana enge yie bäre, gena thøw.

⁷ 'Ba nyïïkwaac Icriel gena nyöödö ni meetge rege ni thööth, ni nyaacge, ni tïmge ni teek døc; ni ö paaci bäre ni pääŋe ki geni.

⁸ 'Ba Ijep ajïtö ki nyeya mør mo nyään mo Jocep kuue.

⁹ Køøre ena köö jï jiye, ni «Ennø, jiy moa näk nyïïkwaac Icriel atïmö ni thööth ni teeka geni døc ni kaala øøni.

¹⁰ Ööu nø, nee ge tïïø ki riek waŋ, nee ge ba nyaacge, kiper ni näk mo da leny mo ööa baŋø, kanymør ge rööpö ki nyïïmän 'moø ni duuge dëëtø, ni päärge wøk paayø.»

¹¹ Køøre jø Ijep aput röönyö ki jiy mo käär tïïe bäät nyïïkwaac Icriel, nee bëëtge ni ege caannø ki køør tïïe moo tïïcge na teek. Ni ö nyïïkwaac Icrielli ni gëëtge ki päänye mo cuŋ yïthge ki caammi jï Peerø, ni beege päänye moa cwøl ni Pithöm ki Raamcic.

¹² 'Ba këël na bëët jø Ijepi ni nyïïkwaac Icriel ege caannø døc, nyïïkwaac Icriel anyaay døc ni thöönhge, ni tïm jø Ijepi ni lwäär ki geni.

¹³ Ni ö jø Ijepi ni caange nyïïkwaac Icriel ki køør tïïe moa teek na eelge bäätge.

¹⁴ Ni tïïcge bëëtö mar nyïïkwaac Icriel ni teek døc ki køør tïïe moa teek na näk tïï thuube ko odhöönh man wø caam thuube ki gø, ki teeŋ tïïe møøk mo wø tïïc yïth pwöth, ni beege tïïe bëët mo wø tïïcge no oeel bäätge ni geno caannø.

¹⁵ Køøre nyeny Ijep acäänö ki dïcööte mo jø Ibaru, mo nyeŋŋe cwøl ni Cipara ki Puwa;

¹⁶ ni kööe, ni «Kany wäro cøøllu määr Ibaru mo wø lwaar, noo jootu nyilaal mano ö wøk, ni näk ma dïcwøø, wär 'nägu; 'ba ni näk ma nyakøø, wär weyu ni kwøw.»

¹⁷ 'Ba dïcööte alwäyö ki Jwøk, ni kärge gïna caan nyeny Ijepi tïïö, ni wecge obwöre moa näk cwøw ni kwøw.

¹⁸ Køøre nyeny Ijep dïcööte acwøle, ni kööe jïge, na «?Aŋø na tïïyu gïn en, ni weyu obwöre moa näk cwøw ni kwøw?»

¹⁹ Ni kö dïcööte jï Peerø, ni «Beeye kiper määr Ibaru ba caal määr Ijep; kiper geni ge teek, ni kanyo poode ni dïcöödi poot kär pïï buutge, ge laara lwaar.»

²⁰ Køøre Jwøk atïïö ki gïn mo beer kiper dïcööte, ni ö nyïïkwaac Icrielli ni nyaacge, ni tëënge døc.

²¹ 'Ba kiper mana tïm dïcööte ni ge lwäär ki Jwøk, Jwøk dhøk uudi mo dïcööte atïïe ni teek.

²² Køøre Peerø jiye bëët aceme, ni kööe, ni «Nyilaal mo onywølø na dïcwøø jaak røk jø Ibaru wär leeŋu yi naam, ni weyu nyakøø ni kwøw.»