Aydheea 9 - Wëël Jwøk

Luum Ööny Nyeya Mano Käär Paac Na Kare

¹ 'Ba køør man ennø, muudhö tïmö ni bäŋgø këët kiper jøøa bëëdö ni ge ena yi bëëtö mo leth. 'Ba yïth nïne moa pöödhö, Jwøk ŋööm jø Dhebulan ki ŋööm jø Naptali awëëk nipäät, 'ba noo tïme na yïth nïne moo en nyïm, eni ŋööm Galili kun bëët juurre yie, na en øtjöör naama dwøŋ løø Naam Jördan, wëëge jiem.

² Jiy mo wø cäädhi yi muudhö, tar mo dwøŋ oneenge, ni ö jø wø bëëdö yi ŋöömma näk muudhö ni rieny tarri bäätge.

³ Wui, Wuuö Jwøk, wï jur marï otïïyï nee nyaacge ni tïmge ni thööth, ni tïïyï met ec marge ni dwøŋ, ni mïn yïthge nyïmï, kaamar man wø mïn yïth jiy ri kac ki beel, wala man wø mïn yïth jiy mo ge pääŋŋa jap twëër.

⁴ Kiper gïïa leth na jwørge na caal jaath puur man wø rïï ŋut dhieŋ, ka athøra man wø caar geni ki gø, otoorï, kaawat gïna tïïc ri leny dëët jø Midien.

⁵ Kiper war bëët mo wø ŋooŋ jø lenynyi ki ge, ka abïïe moge moa näk ogääbö ki remø, di waaŋø ni thööri ya maaci.

⁶ Kiper nyilaal onywöli jïïø, nyilaal ma dïcwøø ocïp jïïø, ni tïm teeki ni ena cere, ni cwøli ni beeye ŋat wø rëëm ec ni wø bwøth jiy ka acaare mo beyø, ni beeye Jwøa teeka eni, ni beeye Wuuö mano bëëdö na bäre bäre, ni beeye Kwääc bëët-mëër.

⁷ 'Ba bura mare ki bëët-mëër mare cäätha maal ni ba cuŋ, ni pï piny bäät wäl Deebit ki buc nyec mar gø, ni mak gø ni ee jølø ni teek ki ŋøl ma adïëri ki bëët bëënynyö, ki mano täge ennø këël bäre bäre. 'Ba Wuuö Jwøk, eni na wïth jammi bëët, gïnögø tïïe tïïö nee thur kare ki këëyö mare.

Luum Ajäla Mano Jääl Jø Icriel Ki Gø

⁸ Kwäärö Wuuö Jwøk dwøre ojääŋŋe baŋ Jeekap ni jääla gø, ni ö ajäla manøgø ni päth bäätge, ge na jø Icriel.

⁹ Ni tïme ni ŋäc jiyi bëët, ni beege jø Ipariem ki jø wø bëëdö Cameria, jø wø cäänö ni ge koorrø ni wø töödö ki yïth cwïnyge, ni ge köö,

¹⁰ «Thuube moa no ogeerø apäänhnhö piny, 'ba cäŋwa ka geerrø ki kïte mo otieŋø; olämmi bëëdö no oŋøt piny, 'ba karge cäŋwa ka pïïnhnhö ki jenni moa perge leth.»

¹¹ Kiper manøgønø, Wuuö Jwøk nyïïmän mo Recin atïïe nee öge bäätge, ni lac geni ki man laarge ö bäätge,

¹² ni beege jø Aram moa en jï løø kur tuul-cäŋ, ki jø Pilitin mo wø bëëdö jï løø kur pänh-cäŋ, ni thöörge jø Icriel kaamar lääy mo dhee ee ŋaammø ni mare löönyö. 'Ba këël køør japøgø bëët, wëër mar Wuuö Jwøk ree poot ba paanye; cere poot bëëdö ni ee rwieø.

¹³ 'Ba jiy kär duu baŋ Wuuö Jwøk, ŋata jääl geni, ni kärge eni manynyø, eni na wïth jammi bëët.

¹⁴ Kiper manøgønø, Wuuö Jwøk wïc ki jïp mar Icriel, ki bøøge moe ki bäädi moe di raanynyø ki dïcäŋ aciel keere.

¹⁵ 'Ba wïc beege jø døøŋŋø ki jøøa no owøørø, ni jïp beege nyïïkuk Jwøk mo wø cäänö ki luup tööt.

¹⁶ Kiper dïbwöthe mo jøøi, jiy atïïcge nee gaage wøk, ni ö jiyi moa bwøth ni ränyge.

¹⁷ Kiper manøgønø, Kwäärö Wuuö Jwøk yie ba mïnni ki wøpe moge, ni cwïnye ba pädhi ki gïr kïïe moge ki määr thuunhnhi moge, kiper mana tïmge bëët ni Jwøk ege kwierø ni ge temma raay, ni dhøkge bëëdö ni cara luup mo reyø. 'Ba këël køør japøgø bëët, wëër mar Wuuö Jwøk ree poot ba paanye, cere poot bëëdö ni ee rwieø.

¹⁸ Ka adïëri møn, bëët rääö wääŋö kaamar maac, ni wø thöör otwel ki koodhi, ni tïme ni caala maa dwaar kany wø waaŋ lul, ni ö jïrö mare ni neetul maal.

¹⁹ Piny waaŋ ki køør wëër mar Wuuö Jwøk, eni na wïth jammi bëët, ni tïm jiyi na jer maac mo liel maaci ki ge, ni put tïmö ni bäŋ ŋat mo cwïnye pädhi ki gïr watge.

²⁰ Gïïa en bäät cwïïcge okälge ni camge ge, 'ba käc marge ba riemme, ni kälge moa en bäät cämge thuwø ni camge ge, ni ba jäŋge. Ni ö ŋati man nø ni døø ro obwöre moe ni cam ge.

²¹ Jø Maneeca ge ööa maal bäät jø Ipariem, ni ö jø Ipariemmi ni öge maal bäät jø Maneeca, ni marge døø rege. 'Ba rege ocäŋge dwallø ni nywääkge dëër Juuda. 'Ba këël køør japøgø bëët, wëër mar Wuuö Jwøk ree poot ba paanye, cere poot bëëdö ni ee rwieø.