Aydheea 7 - Wëël Jwøk

Dwøl Mana Caan Jï Eeyeth

¹ 'Ba yïth nïra bëët Eeyeth o Jötham, wär Udhaya, na nyeny Juuda, Recin nyeny Aram ki Peka o Remaliya, nyeny Icriel, gena ci Jerucalem baŋ leny, 'ba kär løny ki man tukge gø.

² 'Ba kanya caani jï dhi øt Deebit, ni køp, ni «Jø Aram twïër marge anø tïïcge yi ŋööm Ipariem,» nyeya ma Eeyeth ki jiye cwïnyge abwøk døc, ni tïme kaawat man wø ö jer lulli wø jäŋi ya jamø.

³ Køøre Wuuö Jwøk aköö jï Aydheea, ni «Ennø, ci døny wøk ki wäädï ma Cier-Jacup, nou røømmu ki Eeyeth dhi waŋ mar puul mana en jï maal, nou cøra yi jöör pwöth nyen wø pïnyö ka abïïe.

⁴ Ni caanï gø jïre, ni ‹Gwøk riï, ni cïbï cwïnyï piny, ni ba lwäyï, ni ö cwïnyï ni ba pädhe kiper wëër mar Recin ki jiye ma jø Aram, ki wëër mar o Remaliya, jøøgø na ariiø yøø ni caal dhøk ameethi ariiø mo marge duuŋ jaak.

⁵ Kiper jø Aram, ki jø Ipariem ki nyenyge ma o Remaliya, gena nø cädö ki gïn mo raac kiperu, ni köge,

⁶ ni «Beerra man cøø baŋ leny ki jø Juuda, ni tïïø ge nee lwäcge døc, ni ö kiir pääny marge ni putø gø tuc, ni røønyø o Thabël nee bëëde na nyeye yie.»

⁷ « ‹'Ba Kwäärö Wuuö Jwøk aköö, « ‹ni «Gïnögø ba thur kare, ni ba tägi na bäre bäre.

⁸ Kiper pääny mana dwøŋ mar Aram beeye Damacka, ni bwödhi mar Damacka beeye Recin. 'Ba noo tïme na cwiiri ma pïërabïciel ka abïïc, jø Ipariem keethø ni tïmge ni paa wï jur këët.

⁹ Pääny mana dwøŋ mar Ipariem beeye Cameria, ni bwödhi mar Cameria beeye o Remaliya. Ni näk mo gïnögø ba ŋääthu, ka adïëri møn, u ba ruu.» › »

Nyuudhi Ma Imanuwel

¹⁰ Køøre Wuuö Jwøk acäŋ cäänö ki Eeyeth, ni kööe,

¹¹ ni «Pëëï ki nyuudhi kiper dëërï baŋ Wuuö Jwøk, Jwøk marï; pëënynyï na nyuudhi mo løny ki man joodi tiet ŋøøm kar bëët jwïëc jøøa no othøw, wala yi maal kuya.»

¹² 'Ba Eeyeth aköö, «Aani, a ba pëëö; Wuuö Jwøk ba päänynya!»

¹³ Køøre Aydheea aköö, «Wui, u na dhi Øt Deebit, cegu ïthu ennø. ?Aŋø, ki man cwaatu yïth jiy atïmö ni thiinh kiperu, ni tïmu nou daa baŋ Jwøk mara nou cwaata yie en?

¹⁴ Kiper manøgønø, Kwäärö Wuuö Jwøk ki dëëre cïpö jïïu ki nyuudhi; ka adïëri møn, nyakøø mo dëër dïcwøø poot kuue ojïti ki nyilaal ni lwaare ki gø na dïcwøø, ni cak nyeŋ gø ni Imanuwel.

¹⁵ Eno tïmö ni cama caak mo opuuö ki maar kïc kanyo rïën waŋe ni løny ki man kwier gïna raac ni jier mana beer.

¹⁶ Kiper kanyo poot nyilaarøgø ni waŋe poot kär rïënnö, ki man kwier gïna raac ni jier mana beer, ŋøøp nyeye moø na ariiø ni lwääru ki ge yøø dööŋ keerge.

¹⁷ Wuuö Jwøk känna bäätï ki bäät jiyï, ki bäät dhi øt wäru ki teeŋ nïr bëëtö mo leth mo poot kär kwøŋ joot ki mana täge ki dïcäŋa ö jø Ipariemmi na pääge ki jø Juuda, ni bëëtö manøgø käle ki ri nyeny Aciria.»

¹⁸ 'Ba noo tïme na dïcäŋeca, Wuuö Jwøk olwiyi ni cwøla lwaŋŋi moa en ya aŋuun näm mo Ijep, ki lwaa kïc mana en yi ŋööm Aciria.

¹⁹ Ni öge bëët ni pïge piny ni pääŋge kwöra näk agäp-kïte, ki yïth gøøde mo kïte, ki yïth abuŋŋe mo koodhi, ki kwör wø kwaac lääc paac yïthge.

²⁰ 'Ba dïcäŋeca Kwäärö Wuuö Jwøk wïthu oliele ki muuc mo käla løø Naam Upareeti løøga, ni liel jïëc tietu, ki jïëc tïgu thuwø; ni manøgø beeye nyeny Aciria.

²¹ 'Ba noo tïme na dïcäŋeca, otïmö ni dööŋŋa dhieŋ aciel ki dïëk ariiø jï dhaanhø;

²² ni bëët dhaanhe ni cämö ki caak mo opuuö, kiper mana bëëde ni caak thööth, kiper jiy bëët moo dööŋ yi ŋöömö manøgø tïmö ni ge cama caak mo opuuö, ki maar kïc.

²³ 'Ba noo tïme na dïcäŋeca, kany ma kar jer omøki ma kuma, mo duunnö ki gwet-bïrö ma kuma, odööŋ ni tuya otwel ki koodhi yie.

²⁴ Ni put jiy tïmö ni ge cøøa yie baŋ dwaar ni ge käära atume ka athëëre, kiper ŋöömö manøgø bäre onø dööŋö no otuy ko otwel ki koodhi.

²⁵ 'Ba kwöra näk thuuri bëët na wara puur ki cääle, u ba pïï yïthge kiper mano lwäyu ko otwel ki koodhi; 'ba otïmö na kwör kwaac dhäk yïthge ni rïïŋa dïëk yïthge.