Aydheea 66 - Wëël Jwøk

Luum Ajäla Ki Ŋäädhe Mano En Nyïm

¹ Man beeye luumma caan Wuuö Jwøki, ena köö, ni «Maal beeye wälu mara, ni piny beeye køøm tieta. ?A øda ŋø nø, na dou geerø jïra? ?A kanya ŋø na daa jwöm raa yie?

² Kiper beeye cera na tïïc japøgø bëët, ni ö japøgø bëët ni putge tïmö ni nut. Luummögø caana a, a na Wuuö Jwøk. «'Ba aani, ŋato jïre raŋa beeye dhaanhø mo dëëre ee dwøk piny, mo cwïnye opädhö kiper raay moe, ni dëëre kwanynyi ki lwär ki dwøra.

³ 'Ba ŋat wø 'näk dhieŋ nee cïbe no olämi, caala ŋat mo 'näga dhaanhø; ni ŋat wø 'näk nyidiel caala ŋat mo toora ŋut gwök, ni ŋat wø cïp beel na muuy caala ŋat mo cïpa rem othur; ni ö ŋat wø waaŋ jer wø jïcge ŋwääi ni met ni caal ŋat mo wøøra kït gïï wø lam. Gena tïmö ni ge jiera uutjïëthe moge, ni yïthge mïnni ka japge ni wø raac yia ki ge.

⁴ Kiper manøgønø, ge jëënna jëënnö ka ajäla, a kïtha bäätge ki gïn mo ge lwäär ki gø. Kiper aana cwödö, ni bäŋ ŋat mo ojïëy, ni cääna, ni bäŋ ŋat mo ïthe ee ciiø. Gena tïïö ki gïï mo reyø nyïma, ni jierge jammi mo cwïnya ba mïnni ki ge.»

⁵ 'Ba u ni wø dëëtu kwanynyi ki lwär ki dwør Wuuö Jwøk, wïnynyu dwør Wuuö Jwøk! Ena köö, ni «Uuni, nyïïmëëgu amännö ki uuni, ni køøge uuni wøk kiper nyeŋŋa, ni köge jïïu, ni ‹Beerra man jiem Wuuö Jwøk, nee met ec maru jootwa.› 'Ba geni, wïthge poot lääö.

⁶ Wïnynyu dwøl man ni märi yi pääny en, cegu ïthu ki dwøl man ni wïnyi ki yi Øt Jwøk en! Manøgø beeye dwøra, a na Wuuö Jwøk; mara cool kwör dëët nyïïmän 'moa.

⁷ «Dhayan caala dhaagø mo lwaar ni kär gøøc mäc lwaarri, kanya poot räämmi ni kär tägö dëëre, ena lwaar ki nyilaal ma dïcwøø.

⁸ ?Aŋø, teeŋ gïnögø da ŋat mo owïny gø cøøn? ?Da ŋat mo ojoot teeŋ gïnögø cøøn? ?Da jic paac mo di lwaarø ki ge ki dïcäŋ aciel keere? ?Aŋø, da wï jur mo ge put ka nywøl yie aciel? 'Ba Dhayan atïmö kaamar dhaagø mo mäc lwaar kär ruu dëëre, ni put lwaar ko obwöre.»

⁹ Wuuö Jwøk, Jwøk maru, aköö, na «?Aŋø, løny man wëëga mäc lwaar tägö, ni nyilaal ba tïïa nee lwaarø ki gø? ?Na aŋø, aani ni wø wëëk dhaanhø lwaar, kar lwaar daa dëëdö?

¹⁰ Bëëdu ni yïthu met ki Jerucalem nou kanynyø kipere, u bëët, u ni wø mëër ki gø; yïthu mïnge døc ki gø, u ni wø kïmmi kipere.

¹¹ Kiper Jerucalem tïmö ni caala miiu; uuno dhøøth kööre ni jäŋŋu ki thunhnhe na beer; uuno mäthi ki caak moe ni mïn yïthu ki caage ni wø muuli ni thööth.»

¹² Kiper luumma caan Wuuö Jwøki bee en, ena köö, «Ka adïëri møn, bëët-mëër pääŋa pääŋö yi Jerucalem kaamar naam, ni wëëga ajiem mar wïth juurre ööny yie kaamar pï waŋ naam mo kwönnö; uuno dhøøth kööre, ni käär uuni ki tierjwöthe, ni cïp uuni kööre.

¹³ Kaawat man wø ö mïïö wø cøm cwïny nyaare, uuni thuwø cwïnynyu cøma cømø; ni putu bëëtö ni cwïnynyu ocømø yi Jerucalem.»

¹⁴ 'Ba kanyo jootu gïnögø, cwïnynyu omïnni, ni tïm dëëtu ni pulli kaamar luum mo oløth. Ni ö teek bat Wuuö Jwøki ni puti ya jiye ŋäc; 'ba wëër mare onyoodhe jï nyïïmän moe.

¹⁵ Ka adïëri møn, Wuuö Jwøk öö ki yi maac, ki jïëth okwëëc leny moe mo caala apwøyaweerø; eni wëër mare lëëŋe piny ni liel kaamar maac, ni jook jiy ki leep maac.

¹⁶ Kiper Wuuö Jwøk jiy bëët jääle jäälö ki maac ko opëëllö mare, ni ö jiyi moo nääe ni tïmge ni thööth.

¹⁷ Wuuö Jwøk aköö, ni «Jiy mo wø cïp dëëtge kur keerge ni wø tïïc dëëtge ni waany kiper man cige ya ajïniina, ni gena aciel ki jø wø cämö ko othuri, ki jïëy, ki gïïa näk ba waany, kwøw marge ocuŋ ni ränyge bëët.

¹⁸ «'Ba kiper mana ŋääa tïïe moge ka acaare moge, aani a öö ni cooŋa wïth juurre ki teeŋ dhøgi bëët; ni öge ni putge ajiem mara joot.

¹⁹ Ni kïtha yïthakicge ki ŋïï, ni ö moo dööŋ ni kwøw rege ni jääŋŋa ge baŋ wïth juurre; ni beege baŋ jø Tarcëc, ki jø Put, ki jø Lidiya ni wø thöödhö ka athëëre, ki jø Tubal, ki jø Jawan, ni beege jøøa en mïëya kwörge bäyö na en bäät naama dwøŋ, na näk dööŋ kar mar nyeŋŋa kärge wïnynyö na ajiem mara kärge neenø. Geni ajiem mara okøpge jï wïth juurre.

²⁰ Køøre jiy bëët moa bëëdö kaamar nyïïmëëgu ki køør ŋäädhe, okälge ki baŋ wïth juurre bëët, ni kälge ge jïra, a na Wuuö Jwøk, kaamar muuce mo beel. Geno ööi ki ge ni käärge ka bäät okwëënyi, ki yïth jïëth okwëënyi, ki yïth pëëmme, ki bäät gääŋŋe, ki bäät athïrööle, ni kïthge ge bäät kïdi mara na en kur keere na näk Jerucalem, ni caala man wø ö jø Icrielli wø kälge muuce moge mo beel ni käärge ka yïth jammi mo tøŋ ni ge kïtha ge yi Øt Wuuö Jwøk.

²¹ Aani, a jëëdö røkge thuwø ki mo tïïö na dïlämme ki mo tïïya teeŋ tïïc mar jø tuuŋ Libay.

²² «Kaawat man wø bëët maalli mana nyään na cwääa, ki piny mana nyään na cwääa, ni ge nut cooth nyïma en, nyïïkwaayu thuwø obëëdö ni nut cooth, ni bëët nyeŋŋu ni ŋäc.

²³ Kany wø päär dwääyi man nø, ki kany wø ö cäŋ jwömö man nø, jiy bëët geno wäro ö nyïma ni wøørge aani.

²⁴ Køøre geno ci wøk ni raŋge dëët jiy moa no othøw na gëëmö ki aani. Kiper twöŋi moo cam dëëtge ba thøw, ni ö maaci mana jääl ge ki gø ni bëëde ni ba bïp, ni putge tïmö na gïn mo raac døc ki baŋ jiy bëët.»