Aydheea 65 - Wëël Jwøk

Luum Ajäla Kiper Jø Wø Kwier Jwøk

¹ «Aani, a na Wuuö Jwøk, dëëra anyoodha jï jøøa näk a kärge pëënynyö, ni ö jøøa näk a kärge manynyø ni jootge aani, ni kööa jï wï jur mo nyeŋŋa käre cwølø, ni ‹Aani en, aani en.›

² Cääŋŋe bëët, a bëëdö ni ceŋŋa yaa thaaŋø baŋ jiy moa wïthge teek, jø wø caath uutjïëthe mo ba beyø, ni wø bëëdö ni ge cäädhi ka køør acaare moge keerge.

³ Ni beege jø wø tïïc aani cooth naa goota, ni wø cïp olämme moge jï juu møøk yïth ajïniine, ni wø wääŋö ki gïï wø jïcge ŋwääi ni met bäät thuube,

⁴ ni wø thöör wäär yïthakic bwör kwör mo ge ba joot yïthge, ni ge wödö ki juu møøk; ni ge wø cämö ki rïŋ othuri, ni yïth dääe moge da cwek rïŋ mo ba waany;

⁵ ni ge wø köö, ni ‹Bëëdu kur keeru; käru nyänh buutwa, kiper waani, wa waany ni wa ba caal uuni!› Teeŋ jøøgø nø, wëër mara liel dëëtge kaamar maac mo jïye onirwöc ki yïth nïne bëët.

⁶ «Ka adïëri møn, gïïögø bëëdö no ogöör piny nyïma, naa ba lïŋi, 'ba gïïa tïïcge coola coolø. Aani, gïïa tïïcge dwøga bäätge,

⁷ ni beege raay moa tïïcge ki moa tïïc kwäcge. Manøgø caana aani, a na Wuuö Jwøk. 'Ba kiper mana bëëtge ni ge wääŋö ki jer wø jïcge ŋwääi ni met bäät kïte, ni ge janynya aani bäät thuuri, gïïa tïïcge coola coolø ni yaa rømø ki køør tïïe moge moa dïkwøŋ na reyø.»

⁸ 'Ba gïna caan Wuuö Jwøki bee en, ena köö, ni «Kaawat man wø jïtö ki pï nyïïjenni ki ri jwala mar nyïïomøki, ni kö jiyi møøk, ni ‹Kär raanynyi; poot di jïtö ki mo beyø røkge›, aani thuwø gïnögø tïïa tïïö yïthakic jiya, ni ö geni ni ba raanynya ge bëët.

⁹ 'Ba aani, a kännö ki jiy ki røk nyïïkwaac Jeekap ki røk nyïïkwaac Juuda, nee ŋöömö mara na en bäät kïte nee cïba jïge na marge, nee ge na jiya na näk yaa jierø nee ge bëëtge yie, ni tïm kaace na kar bëëtö marge.

¹⁰ 'Ba kiperge, ge na jiya moo bëëdö ni manynya aani, Goor Carön otïmö na kar kwaath mar pïïth dïëk moge, ni ö Goor Akör ni tïme na kar rïc jï pïïth dhäk moge.

¹¹ «'Ba u na wec aani, a na Wuuö Jwøk, u na wïthu wïl ki Dhayan na näk kïdi mara na en kur keere, ni wø nywaak caammi mou ki juu møøk, ni wø tïïc athööthe ni päŋ ki køøŋ nyïïomøki mo ojääbö nee cïpu jï juu møøk,

¹² aani, u wëëga thøw opëëllö, ni kuullu wïthu piny bëët kiper nou ŋalli; kiper kanya cwöta, u kär jïëy, ni kanya cääna, ïthu käru ciiø. Uuna tïïö ki gïï mo reyø, ni jierru gïïa näk yia ba met ki ge.»

¹³ Kiper manøgønø, mana caan Kwäärö Wuuö Jwøk bee en, ena köö, ni «Ka adïëri møn, jiya geno bëëdö ni ge cämö, 'ba uuni, uuno bëëdö ki käc; jiya geno bëëdö ni ge mädhö, 'ba uuni, uuno bëëdö ki riew; jiya geno bëëdö ki met ec, 'ba uuni, uuno bëëdö ki lään wïc.

¹⁴ Ka adïëri møn, jiya geno bëëdö ni ge wär ki dudi ki met ec ki cwïnyge bäre, 'ba uuni, uuno bëëdö nou jwöŋö ki gootø mana en cwïnynyu, ni gööu ko oduuru ni cwïnynyu opädhö.

¹⁵ Nyeŋŋu odööŋ na gïr acïëni yïthakic jiya na näk yaa jierø, ni ööa, a na Kwäärö Wuuö Jwøk, ni wëëga u thøø; 'ba aani, a cïpö ki nyeŋ mo nyään jï jiya.

¹⁶ 'Ba ŋat wø gwëëdhö yi ŋöömö, wø gwëëdhö ka nyeŋŋa, a na Jwø adïëri, ni ö ŋat wø kööŋ yi ŋöömö, ni kööŋ raa, a na Jwø adïëri. Kiper gïïa leth na no opöödhö, wïc wïl ki geni, ni putge rwäänyö nyïma.

Luum Maal Mana Nyään Ki Piny Mana Nyään

¹⁷ «Adïëri møn, aani, a cwääö ki maal mo nyään ki piny mo nyään, 'ba gïïa no opöödhö dïkwøŋ, wïc ba par ki geni këët, ni ge ba duu ya acaara këët.

¹⁸ 'Ba ennø, yïthu mïnge ni kanynyu na bäre bäre ki gïno cwääa, kiper Jerucalem cwääa cwääö na pääny met ec, ni tïm jiye na mo met ec.

¹⁹ Aani yia omïnni ki Jerucalem, ni tïm yia ni met ki jiy 'moa; ni tïm jwøk thøø ko oduuru ni ba wïnynyi yie këët na bäre bäre.

²⁰ «Kar kaace otïmö ni bäŋ nyilaal mo thøw ni thiinh këët, ni bäŋ dhaanhø mo thøw ni kär jäŋ ki cwiiri. 'Ba ni näk dhaanhø thøw ni cwiiye dïpa, poot nëëni ni thiinh jaak; 'ba ni näk da ŋat mo ba pïï ri dïpa, di købø no ocienø.

²¹ Geni, ge gëëdö ki uudi, ni bëëtge yïthge, ni pïïthge ki jer omøki, ni camge nyïïge.

²² 'Ba uudi moo geerge ba beet jø møøki, ni nyïïjenni moo piithge ba cam jø møøki. Kiper cwiiri mo jiya otïmö ni thööth kaamar cwiic jaath, ni ö jiya na näk yaa jierø ni mïn yïthge ki gïïa tïïcge ki ceŋge.

²³ Geni, ge ba ööl këët ki gïn mo bäŋ tiere, no obwöre moo nywølge bäŋ gïï mo leth mo pïï dëëtge këët, kiper geno tïmö na jiy mo ogwïëth Wuuö Jwøki, ge ki nyïïkwaacge bëët.

²⁴ 'Ba kany wø pootge ni ge poot kär pëëö, løøa løø jïge, ni kany wø pootge ni ge poot cäänö, döötge puta ka wïnynyö.

²⁵ Orudö ki nyi røømmø geno cämö na aciel, ni ö ŋuuwi ni cäme ki luum kaamar dhieŋ, ni tïm tørri na cam mar thwöl. Ni put tïmö ni bäŋ gïn mo raac wala mo räänyö bäät kïnna na en kur keere.» Luummögø caana Wuuö Jwøki.