Aydheea 64 - Wëël Jwøk

¹ Wui Wuuö Jwøk, ï jeeyï maal wäne nø ni ööï piny, nee kïte tïmge ni jäŋŋi nyïmï!

² Kaawat man wø ö maaci wø waaŋ moonni, ni wëëk pïï twaaø, ö piny ki maal ni tïïyï nyeŋŋï nee ŋäc nyïïmänni moï, ni tïïyï wïth juurre nee dëëtge tïmge ni kwanynyi nyïmï!

³ Kanya ööï piny ki maal na tïïyï japa døøŋŋø na näk kärwa dïëdö ni tägö, kïte atïmö ni jäŋŋi nyïmï.

⁴ Ki mana käl ya acääŋŋe cøøn, bäŋ jwøk mo owïnynyö wala mo ïth ocieø kipere wala mo oneenø, 'ba bee ï keerï, ï ni wø tïny jø wø koor ïïni.

⁵ Ïïni, ï ööa kuna kønyï jø wø yïthge met ki tïï jammi ma karge, ki jø wø paac wïthge ki uutjïëthe moï. Ka adïëri møn, ïïna gootø, kiper waana bääyö; waana bëëdö ni wa temma raay jaak. ?Aŋø, løny ki man piem wa këët ennø?

⁶ Kiper waani bëët, waana tïmö kaamar dhaanhø mo ba waany, ni ö japa beyø bëët na tïïcwa ni tïmge kaamar nywan abïï mo ree da gïn mo raac; waani bëët, waana tïmö kaamar bøøŋ jaath mo otal, ni ö raayi mowa ni køølge wa kaawat man wø tïïc jamø.

⁷ Bäŋ dhaanhø mo cwøl nyeŋŋï, wala mo ree ee cøgø ki man göök riï; kiper täärnyïmï akanï ki waani, ni tïïyï wa nee wa ränywa ki køør raay mowa.

⁸ 'Ba ennø, ï na Wuuö Jwøk, ï poot ni ïïna wääwa. Waana odhöönh, ni bee ï dïcwääy; ni waani bëët, wa tïïya ïïni ki cerï.

⁹ Wui Wuuö Jwøk, kär wëër marï wëëk pöödhö døc bäätwa; kär japa reyø na tïïcwa lääŋŋï këël aŋuudi. Wui, beerra man raŋï wa, kiper waani bëët, waana jiy moï.

¹⁰ Päänye moï na en kur keerge atïmö na dïtëën, këël Dhayan na näk Jerucalem atïmö na paap, ni bäŋ gïrpiny yie.

¹¹ Øt Jwøk marwa na en kur keere na näk øtø mar ajiem, na wara ö kwäcwa ni pwøcge ïïni yie, awaaŋ ki maac; ni ö japa perge leth bëët na en yie ni ränyge.

¹² Wui Wuuö Jwøk, ?aŋø, ki køør japøge bëët, ï poot bëëdö niï lïŋö niï poot meeta ajäla bäätwa?