Aydheea 63 - Wëël Jwøk

Luum Ajäla Mano Tïïc Wuuö Jwøki Bäät Wïth Juurre

¹ ?Aŋø, man aŋa ni ööi ki Ëdöm, ni ööi ki yi Bödhra ni eno ruyö ka abïï mo kwaar en? ?Man aŋa no oruyö ni mïërö ni cäädhi ni dwøŋ ki teek mare en? Ni løk gø, ni «Bee aani ni wø car luup ni thïïŋ, ni wø jïre da teek ki man piem jiy.»

² Ni pëënynyi, na «?Aŋø, abïïnï tïïyi ŋø ni kwaar kaamar abïïn ŋat mo nyïïomøki ee nyørø yi buur wø bii nyïïomøki yie?»

³ Ni løk gø, ni «Aani, wïth juurre anyøra kaawat man wø nyør nyïïomøki yi buur-biic; ni bee a keera ni bäŋ dhaanhø mo okøny aani. Gena nyøra ki gootø mara, ni cwödha ge ki tieta ki wëër mara; ni ö remø marge ni neeker ra abïïna, ni put dëër abïïna bäre gääbö ki gø.

⁴ Kiper cäŋ mara mar cuut kwör nut cwïnya, ni cwiino wïïla jiya wøk yie anø öö.

⁵ Aana rääŋö, 'ba bäŋ dhaanhø mo oö kuna kunynye, ni thäŋ yia kiper mana tïme ni bäŋ dhaanhø mo oö kuna køny kööra; kiper manøgønø, bada na teek aana pieme, ni ö wëërri mara ni cwak aani.

⁶ Wïth juurre anyøra ki gootø mara, ni wëëga ge meerø ki køør wëër mara, ni kønynya remge piny yïth ŋøøm.»

Luum Pïëm Mar Wuuö Jwøk Mana Piem Jiye Ki Gø

⁷ Aani, mëër man wø ba jøøl mar Wuuö Jwøk caana caanø, ni caana tïïe moe mo nyeŋŋe doo pwøø kiperge ki køør gïïa tïïe bëët kiperø, ki japa beyø na thööth na tïïe kiper dhi øt Icriel ki køør bäth ec mare ki mëër mare na dwøŋ ni wø ba jøøl.

⁸ Kiper Wuuö Jwøk aköö, ni «Ka adïëri møn, gena jiy 'moa, ni beege obwöre mo ba løny ki man cäänge ki tööt jïra.» Kiper manøgønø, Wuuö Jwøk atïmö na pïëmi marge.

⁹ Ki yïth japa leth bëët na jwørge, Wuuö Jwøk ajwötö thuwø; ni ö nyïïatwiel maal mana en nyïme ni piem geni, ni wïïl geni wøk ki køør mëër mare ki bäth ec mare, ni tïŋ geni maal ni käär ge ki yïth nïne bëët moa pöödhö.

¹⁰ 'Ba gena tïmö ni ge tïïya ageem, ni raanyge cwïny Jwïëy moe na en kur keere. Kiper manøgønø, Wuuö Jwøk ŋääe aløøe ni tïme na nyimän marge, ni ö eni ki dëëre ni këëde ki geni.

¹¹ Køøre geni, ge na jic Wuuö Jwøk, wïthge aparge ki nïne moa pöödhö mo Modhe, ni köge, na «?Age Wuuö Jwøk na tïïc jiye nee pööthge ki yi naama dwøŋ, ge ki dïbwödhi marge? ?Age eni na cïp Jwïëy moe na en kur keere bäätge?

¹² ?Age eni na jääŋ bade na teek na näk bada ajiem bäät cer cwïï Modhe? ?Age eni na pääŋ pïï ki dïëre nyïmge, na tïïc nyeŋŋe nee bëëde ni ŋäc na bäre bäre?

¹³ ?Age eni na bwøth geni ki kanya päŋ? Gena tïmö kaamar okwëënyi mo ena yi pwöla, ni bäŋe gø mo ocwaany tiere.

¹⁴ Gena mooc Jwïëc Wuuö Jwøki ki jwöm kaamar lääc paac mo cøøa yi gool.» Wui Wuuö Jwøk, manøgø beeye jöö mana bwøthï jiyï ki gø, na tïïyï nyeŋŋï nee bëëde ni di jiemø.

Lam Mar Jiy Kiper Pïëm Mar Wuuö Jwøk

¹⁵ Wui, Wuuö Jwøk, lwïthï piny ni räŋŋï niï ena maal kar bëëtö marï na en kur keere na näk mar ajiem. ?Age këëyö marï ki teek marï? Mëër marï ni wø ba jøøl ki bäth ec marï akanï ki waani.

¹⁶ 'Ba ïïni, ïïna wääwa, këël na bëëde ni Eeberam wa kuue, ni kwarwa ma Icriel wa käre ŋiiø; ï na Wuuö Jwøk bee ï na wääwa, ni bee ï ni wø wïïl wa wøk ki mana täge ya acääŋŋe ki køør nyeŋŋï.

¹⁷ ?Wui Wuuö Jwøk, aŋø na tïïyï wa nee wa gaawa wøk ki uutjïëthe moï, ni døøyï cwïnywa mo teek nee wa ba lwäärwa ki ïïni? Luu nyïmï baŋwa, wa na jiyï, wa na wï tuuŋa näk thööŋŋï.

¹⁸ Kiper kar bëëtö marï na en kur keere abëëdö ni ena ceŋ jiyï na en kur keere ki kany mo thiinh, 'ba ennø, nyïïmänwa aöö ni raanyge gø, ni nyørge gø ki tietge.

¹⁹ Waana tïmö kaamar jiy mo ge kär bëëdö tierï, mo ge kär cwøl ri nyeŋŋï.