Aydheea 61 - Wëël Jwøk

Luum Luubö Mo Nyään Mo Met Man Piem Jiy Ki Gø

¹ Jwïëc Kwäärö Wuuö Jwøk ena bääta, kiper Wuuö Jwøk aana jiere nee luubö mo nyään mo met caana jï jøøa can. Ni jääŋ aani nee jiy moa näk cwïnyge opädhö nee cwïnyge cøma, nee luum pät mar jøøa no omaa ki tøŋ ki jøøa no otwöö nee køba jïge,

² nee cwiino ö eni noo nyooth met ec mare yie, ki cäŋ ajäla mare, eni na Jwøk marø, nee køba, nee jiy bëët moa näk kïmmö nee cwïnyge cøma,

³ nee jøøa näk cwïnyge opädhö na en yi Dhayan, nee ge ŋada ka aduda mar ajiem na kar mana bëëtge yi bur, ki met ec na kar kïmmö, ki pwøc na kar pänh cwïny. 'Ba ki køør bëënynyö marge geno cwøl ni jenni mo teek moa tøøk Wuuö Jwøki, nee nyeŋŋe jiem ki rege.

⁴ Køøre mïëri moa no oränynyö ya acääŋŋe odwøkge karge, ni ö japa no oniruuth piny no oränynyö ni tïŋge ge maal; ni ö päänye moa no oruuki na beet beenhnhe moa pöödhö ni cäŋge ge geerrø.

⁵ Wëëlle otïmö na dïkwääc dïëk moge, ni ö jøøa pathi ni tïmge na jø puur jïge, na jø koor pwöth omøki moge.

⁶ 'Ba ge na jiya geno cwøl na dïlämme mo Wuuö Jwøk, ni cøøri ya jiyi ni jø wø tïny Jwøk marø. Geno cämö ki jap kwär mo wïth juurre, ni jïëmge ki køør jammi moøgø.

⁷ Geno jïti ki kurge mo opöödhö ri jap kwärö na kar lään wïc marge, ni jïtge ki met ec bäät japøge na kar pänh cwïny marge; ge jïtö ki kurge mo opöödhö ri jap kwärö yi ŋöömö marge, ni ö met eci marge ni bëëde na bäre bäre.

⁸ Wuuö Jwøk aköö, «Kiper aani, a na Wuuö Jwøk, a mëër ki ŋøl luup ma adïëri, naa män ki kwal, ni mäna ki gïï mo reyø. 'Ba ki køør adïëri mara, aani jiya ŋada ŋadø, ni tuda ki luubö ki geni mo bëëdö na bäre bäre.

⁹ Nyïïkwaacge otïmö ni ŋäc ki yïthakic wïth juurre, ni ö obwöre moge ni ŋääi ki dï jiy. Jiy bëët moo joot geni putge ka ŋec ni beege jøøa näk yaa gwïëdhö, a na Wuuö Jwøk.»

Cäänö Mar Jerucalem

¹⁰ Aani yia amïnnö døc ki ri Wuuö Jwøk, jwïëya ajïtö ki met ec ri Jwøk mara; kiper pïëm man wø piem jiy ki gø, ki bëënynyö arøø dëëra kaamar abïï, ni tïma kaamar cø dhaagø thiinh mo wïïe ee kïthö ki jap mïërö, naa caala dhaagø thiinh mo dëëre ee jiiŋŋø ni mïërö ki nyeŋ tii mo perge leth.

¹¹ Kaa teeŋ man wø ö pinynyi wø wëëk jammi tuuö, ni ö ajïniina ni wëëk köödhi moa piith yie tuuö, Wuuö Jwøk bëënynyö ki pwøc wëëge tuuö nyïm wïth juurre.