Aydheea 6 - Wëël Jwøk

Kanya Ö Aydheea Na Joot Jammi Moa Nyooth Ki Yi Wïc Ki Cwödö Mana Cwøli Ki Gø

¹ 'Ba yi cwiina thøw nyeya ma Udhaya yie, Kwäärö Wuuö Jwøk ajooda no opï piny bäät wälu, ni ena maal ni kare dwøŋ, na abïï mare onijääp piny ni Øt Jwøk ee pääŋö bäre.

² Ni nyïïatwiet maal mo wø cwøl ni cerapim ge cuŋŋö maal bääte, na aciel man nø jïre da bwöm abïciel; bwöm ariiø beege mo wø uumge täärnyïmge ki ge, na ariiø møga beege mo wø uumge tietge ki ge, ni ö ariiø møga ni bëëtge na mo wø määtge ki ge.

³ Kanyøgø dhøkge aløøŋge ni ge köö, «Wuuö Jwøk, eni na wïth jammi bëët, ena kur keere, ena kur keere, ena kur keere; ni piny bäre päŋ ka ajiem mare.»

⁴ Ni ö tier dhi Øt Jwøk ni put tïmö ni jäŋŋi ki döötge, ni ö Øt Jwøki thuwø ni put päŋö ki jïrö.

⁵ Køøre aana köö, «Wui, a kare kaa këët nø; aana nø ränynyö! Kiper aana dhaanhø mo dhee ba waany, naa bëëdö dï jiy mo dhøkge ba waany; kiper aani nyeya ma Wuuö Jwøk, eni na wïth jammi bëët, aneena ki waŋa.»

⁶ Køøre ki røk nyïïatwiet maal mo wø cwøl ni cerapim, aciel dïge amään baŋa ni käädö ki cugö mo wärri mo lwøre bäät gïn wø waaŋ gïï wø jïcge ŋwääi ni met bääte, ni lwøre ka kwäny maac.

⁷ Ni ööe ni gut dhaa ki cugö manøgø ni kööe, ni «Ka adïëri møn, dhiï anø gut gïnögø; ni ö gïïa näk iï baa bëët ni paanyi bäätï, ni ö raayi moï bëët ni wëënni.»

⁸ Køøre dwør Kwäärö Wuuö Jwøk awïnynya ni köö, na «?Aŋa noo jääŋŋa nø? ?Aŋa no cii kiperwa?» Køøre aana köö, «A nutö. Jääŋ aani!»

⁹ Køøre ena köö, «Ciï, ni caanï gø jï jøøgø ni kööï, «ni ‹Bëëdu ni ïthu you ciiø, 'ba tiere ba kwanynyu; bëëdu nou räŋö, 'ba tiere ba ci cwïnynyu.›

¹⁰ Tïïc cwïny jøøgø ni teek, ni cïëgï ïthge, ni meyï nyeŋge, nee tïme ni ba løny ki man nëënge ki nyeŋge, ni ba wïnyge ki ïthge, ni ba ci luupi cwïnyge, ni ba duuge baŋ Jwøk ki man jïtge ki køny.»

¹¹ Køøre aana köö, «Wui, Kwäärö Wuuö Jwøk, a këël kany mo nyïëdi noo bëëtge na ennø nø?» Ni løk gø, ni «Këël kanyo raany päänye noo dööŋge ni bäŋ jiy mo bëëdö yïthge, ni bëëdö uudi keerge ni bäŋ jiy, ni dööŋŋa ŋöömö keere;

¹² këël kanyo ööa, a na Wuuö Jwøk, noo riema jiy kany mo bäär, ni ö ŋøømmi mo odööŋ keerge ni tïmge ni thöötha geni dï ŋöömö manøgø.

¹³ 'Ba këël ni näk mo dööŋŋa dhaanhø aciel ki ra apaar yi ŋöömmögø, poot cäŋa waaŋ; ni tïmge kaamar jaath mo teek kanyo ŋødi piny ni dööŋ gutö mare. 'Ba gutö manøgø beeye noo tïmö na kunhnhö mana näk ena kur keere.»