Aydheea 56 - Wëël Jwøk

Pïëm Man Piem Jiy Ki Gø Nyaa Bäät Jø Møøk

¹ Man beeye luumma caan Wuuö Jwøki, ena köö, ni «Tïïyu ŋøl ma kare, ni tïïyu gïn ma adïëri, kiper pïëm mara man piema jiy ki gø aløny ni öö, ni bëënynyö mara oløny ni kare cään ki man nyoodhi.

² Gwïëth oen bäät ŋat wø tïïc japøge, ni wø laar ge mak, ni wø gwøk cäŋ jwömö ni ba pääde, ni wø män cere ki tïïc gïn mo raac.»

³ Beerra man ba kö wëëllö mo odwätö ki Wuuö Jwøk, ni «Ka adïëri møn, Wuuö Jwøk a ŋule wøk ki ri jiye.» Ni ö ŋat mo odïnö ni ba ŋure ni kööe, ni «Raŋŋu, aani a caala jaath mo otal.»

⁴ Kiper man beeye luumma caan Wuuö Jwøki, ena köö, ni «Jøøa no odïnö mo wø gwøk cäŋ jwömö, ni wø jier jap wø met yia ki ge, ni wø laar göök ri luumma tuuda ki jiy,

⁵ a cïpö jïge ki nyeŋ ajiem yi øtø mara ki yi kiir mara, na nyeŋ mo wïc di paayø ki gø; ni beeye nyeŋ mo kaala obwöc cwøw ko obwöc mään moa dige nywølø. Aani, nyeŋ man wø bëëdö na bäre bäre ni ba ränynyi, cïba cïbö jïge.

⁶ 'Ba wëëlle thuwø mo wø bëëdö no odwätö ki Wuuö Jwøk, ni wø tïny Wuuö Jwøk, ni wø mëër ki nyeŋ Wuuö Jwøk, ni wø wøør Wuuö Jwøk, ni beege jiy bëët mo wø gwøk cäŋ jwömö ni ba päätge, ni wø laar göök ri luumma tuuda ki jiy,

⁷ ge tïïa tïïö nee öge bäät kïdi mara na en kur keere, ni mooa geni ki met ec yi øt lam mara. Olämme moge mo wø waaŋ, ki muuce moge, di jïëö ki man cïbi bäät gïn wø cïp olämme bääte mara; kiper øtø mara ocwøl ni Øt Lam kiper wïth juurre bëët.»

⁸ Kwäärö Wuuö Jwøk, eni ni wø cooŋ jø Icriel moa no okeethø, aköö, ni «Poot da jiy møøk mo cooŋa bäät jiy moa no onø cooŋ.»

Rääö Mar Dïbwöthe Mo Jø Icriel

⁹ U bëët, u na lääc paap ni wø bëëdö yi lul, ööu ni cammu jiya!

¹⁰ Jø koor mo Icriel gena cööye; bäŋ gïn mo ŋäcge ge bëët. Ge bëët, ge caala guu mo dhøkge orïpö, mo ba løny ki man gucge, ge bëëdö ni geno butö jaak ni marge lääk, ni gena jiy mo yïthge met ka niine,

¹¹ ni ge caala guu mo owär mo ge ba jäŋ, ni ge caala dïkwääc dïëk mo tiet luup ba kwanyge. Ge bëët, gena gaa wøk ni aacge ki øtjöö marge keerge, ni ŋati man nø dëëtge manynya gïn mo joode kiper dëëre keere.

¹² Geni, røkge cøørge cøørø keerge ni ge köö, ni «Ööu, ö aa baŋ maath ki køøŋø, cøø mäthö døc ki køøŋø mo keec; diøø thuwø cäŋø ka tïïyö na ennønø, ni kaala mar dïcäŋi.»