Aydheea 55 - Wëël Jwøk

Luum Cwödö Mana Ö Wuuö Jwøki Na Cwøl Jiy Ki Gø

¹ Wuuö Jwøk aköö, «Wui, u na no onäk riewi bëët, ööu kuna mäthu ki pïï! Wui, u na jïïu bäŋ gwel bëët, ööu ni lwötu ki caammi ni cämu! Ööu ni källu kwøk nyïïomøki ki caak ni bäŋ gwel mo pëënynyi ki uuni, wala gätge.

² ?Aŋø ni raanynyu gwetu jaak en ki ŋïëw gïï mo patha caammi? ?Aŋø ni wø kälu gwetu wøk moa jootu ki køør kwäk maru nou ŋeewa gïï mo u ba jäŋ ki ge en? Ennø, cegu ïthu na kare ki dwøra, ni cammu cam mana beer, ni mïn yïthu ki cam mana beer na kaal caammi bëët.

³ Wïnynyu mara, ni ööu baŋa; cegu ïthu nou bëëdu nou kwøw. Aani a tudö ki luubö ki uuni mo bëëdö na bäre bäre, ki køør mëër mara na näk adïëri na nyoodha jï Deebit.

⁴ Ka adïëri møn, ŋatøgø atïïa na ŋat ŋäc tiet jammi 'moa, ni wø caan gø jï jiy, ni tïïa eni na bwödhi na ŋat kööm jiy.

⁵ 'Ba eni wïth juurre mo kuue ocwøle, ni ö wïth juurre moa kuc eni ni rïŋge baŋ gø, kiper a na Wuuö Jwøk, Jwøk mare, a na Jwø Icriel na en kur keere, eni mooa mooø ka ajiem.»

⁶ Manynyu Wuuö Jwøk kany poode ni nut en; cwøllu eni kany poode ni kare cään en.

⁷ Beerra man ö ŋata raaci ni wec jöö mare, ni ö ŋata näk bëëtö mare ba tiir ni tiir acaara mare; beerra man ö eni ni duu baŋ Wuuö Jwøk, Wuuö Jwøk bäth ec mare onyoodhe jïgø; beerra man ö eni ni duu baŋ Jwøk marø, kiper Wuuö Jwøk wëënnö mare dwøŋ.

⁸ Kiper Wuuö Jwøk aköö, na «Acaare 'moa ba caal acaare mou, ni uutjïëthe 'moa ba caal uutjïëthe mou.

⁹ Kaa teeŋ man bëëde ni maal kare bäär ki piny en, uutjïëthe 'moa thuwø karge bäär ki mou, na acaare 'moa kadha geni ki mou.

¹⁰ Kaawat man wø ö køthi wø pänhnhe ki maal, ni ba døøk jaak ni piny käre jooø, ni ba døøk jaak ni jap piny käre wëëk tuuö ni ciekge, ni ba døøk jaak ni kär cïpö ki köödhi jï jø wø pïïdhö ni cïpe ki cam jï jiy,

¹¹ aani thuwø, a na Wuuö Jwøk, luubö man wø ö wøk ki dhaa ba duu baŋa jaak ni gïna manynya nee tïïe käre thöörö, ni gïna jääŋŋa gø kipere käre wëëk thur kare.

¹² Kiper uuno døny wøk ki met ec, ni bwøth uuni ki bëët-mëër; kïte ki thuuri geno kwöŋŋi ki met ec nyïmmu, ni ö jenni bëët ni paŋge ceŋge.

¹³ Kanyøgønø, otïmö ni tuya jenni mo mar mo bøøge moge ba øc piny, ni patha koodhi, ni tuc jenni moa perge leth ni patha otwel. 'Ba oput tïmö na gïn par wïc ki gø ki Wuuö Jwøk, na ŋïï mo bëëdö na bäre bäre ni ba ränynyi.»