Aydheea 54 - Wëël Jwøk

Luum Ajiem Mar Jerucalem Mano En Nyïm

¹ Wuuö Jwøk aköö, «Wui, ï na Jerucalem ni caal dhaagø ma bwøc mo kär nyöötö ko obwöre, kwöŋŋï ki met ec! Kwöŋŋï døc niï wär ki met ec ni dwørï iï tïŋ maal, ï na näk mäc lwaar kuyï; kiper ïïni, këël na bëëdï ni ïïno dööŋ keerï, ïïno jïti ko obwöre mo thööth, niï kaala dhaagø mo bëëdö ka cwøre.

² Tïïc kar oduŋkaara marï ni laac, ni ö abïïe moa näk gëëŋŋe mo kwör bëëte moï ni twöï ge piny ni yïthge iï peerø ni døøŋŋø, ni ba lwagï ge; ni tïïyï thøøth oduŋkaara marï ni bäyö, ni cwödhï teegi moe piny ni teek.

³ Kiper piny omayï ni këëtï bäät cwïïc ki bäät caam, ni ö ŋøøp wïth juurre ni dööŋe jï nyïïkwaayï, ni bëëtge yïth päänye moa no odööŋ keerge.

⁴ «Kärï lwäyö, kiper wïïï ba wëëk lääö këët; kär wïïï laay, kiper wïïï ba lääy. 'Ba wïïï owïl ki laac wïc mar thïnhö marï, ni ba parï wïïï këët ka ajøøŋ mana pïï dëërï ki køør mana bëëdï kaamar cï thøø.

⁵ Kiper aani ni wø bëëdö kaamar cwørï bee aani na cwääc ïïni, ni nyeŋŋa beeye Wuuö Jwøk, a na wïth jammi bëët. A na Jwø Icriel na en kur keere, bee aani na wïïl ïïni wøk, ni bee a ni wø cwøl ni Jwø Bäät Piny Bäre.

⁶ Ï na Jerucalem, ïïna duua baŋa kaamar dhaagø mo okwierø mo ena yi pänh cwïny, mo okwier cwøre ni poot thiinh.

⁷ Kiper aani, ïïna kwiera ki kany mo thiinh, 'Ba ki køør bäth ec mara na dwøŋ, ï cäŋa ka duu baŋa.

⁸ Aana gootø ki gootø mo dwøŋ, ni kana täärnyïma ki ïïni ki kany mo thiinh. 'Ba ki køør mëër mara ni wø ba jøøl na bäre bäre, cwïnya cäŋa ka bääthö ki ïïni. Manøgø caana a, a na Wuuö Jwøk na wïïl ïïni wøk.

⁹ «Kiper manøgø, gïno tïïa otïmö ni caala nïr Nöa, kanya kööŋa ni pïï kär ö piny këët na jwïïö. Kaawat manøgø thuwø, ennø, aana kööŋ naa ba gooti këët ki ïïni, wala man cäänna ïïni ki luubö mo teek.

¹⁰ Kiper këël kïte doo dak, ni ö thuuri ni jäŋi, mëër mara ni wø ba jøøl ba dak bäätï, ni ö luum bëët-mëër mara mana tuuda ki ïïni ni ba ŋøle. Manøgø caana a, a na Wuuö Jwøk ni wø nyooth bäth ec mare jïrï.

¹¹ «Wui, ï na päänya no ocaarø, na näk wïïï okier gïï mo lethi, kaawat man wø tïïc atuunna, ni bäŋ ŋat mo ocøm cwïnyï, raŋï, aani ï geera geerø ki kïte mo mïërö, ni ö tier kiir marï ni kïtha gø ki kïte mo ŋwaŋŋi.

¹² Uut koor moï geera geerø ki kïte mo kïtge kwayø, ni ö dhøk kiiri moï ni geera ge ki kïte mo paŋŋi, ni ö dëër kiirri bäre ni geera gø ki kïte mo perge leth.

¹³ Wäätï bëët geno kwänynyi baŋ Wuuö Jwøk; ni jït obwöre moï ki bëët-mëër mo dwøŋ.

¹⁴ Tierï okëët piny yi bëëtö mo tiir, ni tïm karï ni bäär ki caannø; kiper ï tïmö ni bäŋ gïn mo lwäärï, ni ö adigööŋ lwär ni daak ree buutï, ni tïme ni ba løny ki man nyänh buutï.

¹⁵ Ni näk da ŋat mo tuga ïïni ki leny, patha a na tïïc gø; dhaanhø jaak mano tuk ïïni, pädhö nyïmï ni böötï gø.

¹⁶ «Ka adïëri møn, bee a ki dëëra na tïïc rëëmmö man wø thääth jap leny, ni wø wëëk nywïëny ciek ki maac mo kwadhe ko opïri; ni bee a na tïïc ŋat wø räänyö, nee räänye.

¹⁷ Bäŋ gïr leny mo di thäädhö kiper ränynyö marï mo thura kare. Jiy bëët moo kïth luup bäätï kar løøk böötï böötö. Manøgø beeye muuy mana cïp jï jic Wuuö Jwøk, ni beeye na tïmö ni bëënynyö marge mana cïba jïge. Luummögø caana aani, a na Wuuö Jwøk.»