Aydheea 52 - Wëël Jwøk

Luum Pïëm Mano Piem Jerucalem Ki Gø

¹ Wui Dhayan, päyï, päyï nø, ni røøï teek marï dëërï! Wui Jerucalem, ï na päänya en kur keere, røø abïïgï dëërï moa beyø; kiper jøøa näk kär daŋø ki jøøa näk ba waany, ge ba duny yiï këët.

² Wui ï na Jerucalem, ï na näk omaa ki tøŋ, teeŋ tør wøk dëërï nø, ni ööï maal! Wui ï na Dhayan na caal nyakøø, ï na näk omaa ki tøŋ, pät oguudi wøk nø moa no otwöö cwaagï.

³ Kiper gïna caan Wuuö Jwøki bee en, ena köö, ni «Uuna gath kaamar gïn mo bäŋ gäte, 'ba u wïïla wøk ni bäŋ gwel mo cïp.»

⁴ Kiper Kwäärö Wuuö Jwøk aköö, ni «Jiya akwøŋ ci Ijep dïkwøŋ ni bëëtge yie; 'ba køøre gena caar jø Aciria ki gïn mo bäŋ tiere.»

⁵ Kiper manøgønø, Wuuö Jwøk aköö, ni «?Ennø, agïne noo tïïa kany? Kiper jiya akäl jaak ki gïn mo bäŋ tiere, ni ö jiyi moa käär geni ni bëëtge ni ge kwöŋŋö bäätge, ni nyeŋŋa bëëdö ni di janynyø cooth ki yïth nïne bëët.

⁶ Kiper manøgønø, jiya nyeŋŋa otïmö ni ŋäcge; kiper noo tïme na dïcäŋeca, oŋäcge ni bee aani noo cäänö; ka adïëri møn, bee aani.»

⁷ A teeŋ met ec mo nyïëdi ki man joot dhaanhø mo ööi ka bäät kïte ni käla luubö mo nyään mo met, ŋat mo køpa luum bëët-mëër, mo käla luubö mo nyään mo met mo beer, ŋat mo gøøa luum pïëm piny man piem jiy ki gø, ni kööe jï jø Dhayan, ni «Jwøk maru beeye ni wø käär piny na nyeya!»

⁸ Cegu ïthu! Dïkuye mou ge kwöŋŋö; ge kwöŋŋö ki met ec ge bëët, kiper jootge joodø ki nyeŋge kiree kanyo ö Wuuö Jwøki noo duu yi Dhayan.

⁹ Pänynyu maal, ni kwöŋŋu ki met ec, u bëët, u na en kwöra no oränynyö yi Jerucalem, kiper Wuuö Jwøk cwïny jiye acøme, ni wïïl jø Jerucalem wøk.

¹⁰ Wuuö Jwøk teek bade na en kur keere di nyoodhø, ni nëënö jï wïth juurre bëët, ni ö jø wø en teegi bëët bäät piny ni raŋge pïëm mare man piem jiy ki gø, eni na Jwøk marø.

¹¹ 'Ba u ni wø käär jap Wuuö Jwøk na en kur keerge, aayu, aayu, daagu rou kaagø! Kär dee gïn mo gutu mo ba waany! Dønynyu wøk ki yi paanøgø, ni døøyu dëëtu mo waany.

¹² 'Ba u ba aay nou rwäänhnhö døc, kaamar jiy mo kwala rege; kiper Wuuö Jwøk obwödhö nyïmmu, Wuuö Jwøk, Jwø Icriel, oen buutu ni koora uuni.

Luum Jwør Gïï Mo Leth Mar Dhaanh Wuuö Jwøk Mana Näk Ee Jierø

¹³ Wuuö Jwøk aköö, ni «Ka adïëri møn, dhaanhnha na näk yaa jierø, jammi otïïe na karge, eno tïmö ni ena maal wïth jammi bëët, no owøørø ni kare dwøŋ døc.

¹⁴ Jiy mo thööth yïthge othäŋŋi kanyo jootge gø, kiper kïdö mare oraanynyø ni put tïmö ni ba caal kït dhaanhø; ni dëëre bäre ogwayø ni ba caal dëër dhaanhø.

¹⁵ 'Ba eni, wïth juurre mo thööth yïthge othääŋe, ni ö nyeye ni bëëtge ni dhøkge ege miiø ki luumme; kiper geni jammi moa näk kär caanø jïge jootge joodø, ni kwanyge tiet jammi moa näk kärge wïnynyö.»