Aydheea 51 - Wëël Jwøk

Luum Cøm Cwïny Kiper Jerucalem

¹ U ni wø caath køør bëënynyö, ni wø many Wuuö Jwøk, wïnynyu mara. Neennu kïdi mana kälu ree, ni neennu kïdi mana kuuny uuni wøk ki dëëre.

² Raŋŋu kwaru ma Eeberam, ki waŋu ma Ceera na lwaar ki uuni ki rääm mo leth. Kanya cwøla Eeberam bee eni keere; 'ba ena gwïëdha ni tïïa nyïïkwaaye ni thööth.

³ Ka adïëri møn, Wuuö Jwøk cwïny jø Dhayan di cømø; eni ränynyö mar Dhayan di neenø ni cøm cwïny jiy moa en yie. Eni kwöra näk otal di tïïö ni caala ajïniina mar Ëden, ni tïïc kwöra näk dïtëën ni caala ajïniina mar Wuuö Jwøk, ni ö Dhayan ni jït yie ki met ec ki kanynyø, ki dwøk pwøc ki wär dudi.

⁴ U na jiya, wïnynyu mara; u na wï jur mara, cegu ïthu, kiper ciik ööa wøk ki baŋa, ni ö ŋølli mara na näk adïëri ni tïme na tar jï wïth juurre;

⁵ Bëënynyö mara kare cään, ni køny mara cäädhö jöö, ni ö teek bada ni ŋøl luup wïth juurre; ni beege wïth juurre mo wø bëëdö yïth mïëri moa en bäät naama dwøŋ, ni wø neet jïra, ni ge koora teek bada ni cwïnyge da ŋäädhe.

⁶ Tïŋŋu wïthu ni raŋŋu maal, ni raŋŋu piny thuwø; kiper maal rwäänyö kaamar jïrö ni wø maayi, ni räny pinynyi kaamar man wø räny abïï, ni ö jø wø bëëdö yie ni thøwge kaamar twöŋi. 'Ba køny mara bëëdö na bäre bäre, ni ö bëënynyö mara ni bëëde na bäre ni ba ränynyi.

⁷ Wïnynyu mara, u ni wø caath køør bëënynyö, ni bee u jiy mo wø bëët ciiki 'moa cwïnynyu; kär nou lwäyö ki jø wø jøøŋ uuni, ni ba päth cwïnynyu kany wø janyge uuni.

⁸ Kiper geni, ge tïmö kaamar abïï mo ocam alweela, ni tïmge kaamar jïëc rööm mo ocam twöŋi. 'Ba bëënynyö mara poot bëëdö na bäre bäre, ni ö kønynyi mara ni këët yïth beenhnhe bëët.

⁹ Wui, Wuuö Jwøk, ö maal ni nyoothï teek mar badï! Ö maal kaawat mana kwøŋï tïïc yïth beenhnhe moa no opöödhö ya acääŋŋe! ?Aŋø, paa ïïni na këël Reeyap ki tøŋ, ni bee Ijep, na caal thwöra dwøŋ, ni ŋørï gø na thäŋi?

¹⁰ ?Aŋø, patha ïïni na taal naama dwøŋ, kuda näk päŋ døc, na tïïö ki jöö yi naamøgø, kiper nee jøøa wïïlï wøk nee ŋutge løøga ki yie?

¹¹ 'Ba jic Wuuö Jwøk na näk ee wïïl wøk geno duui, ni dønyge yi Dhayan ni ge wär ki dudi, ni ö met eci marge ni bëëde wïthge kaamar aduda na bäre bäre. Geno bëëdö ki met ec ki kanynyø, ni ö kïmmö ki cooyø ni daakge rege buutge.

¹² Wuuö Jwøk aköö, ni «Bee aani ki dëëra ni wø cøm cwïnynyu. ?Aŋø, uuna jøøe, u ni lwäär ki dhaanhø man ni wø thøw jaak en, ni bee dhaanhø man no ocwääö kaamar luum jaak en?

¹³ ?Aperŋø na wïl wïthu ki a na Wuuö Jwøk na cwääc uuni, ni bee aani na peer maal, na wëëk tier piny këët piny ni teek? ?Aperŋø ni bëëdu nou lwäär cooth ki wëër mar jø wø caar jiy, ni wø bëën aranya? ?'Ba age wëër mar jø wø caar jiy?

¹⁴ Ki kany mo cään jiy moa no omaaø ki tøŋ, ge di pädö, ni ge ba thøø kwöra näk geno twöö yïthge, ni ge ba bööli këët ki gïn camge.

¹⁵ Kiper bee aani na Wuuö Jwøk, Jwøk maru, ni wø jäŋ naama dwøŋ ni wø wëëk athaga lwör, ni nyeŋŋa bee Wuuö Jwøk, aani na wïth jammi bëët.

¹⁶ Aani, luup 'moa akïtha dhøgu, ni rïëba uuni ki tïpö mar cera. Bee aani na cïp maal kare, na wëëk tier piny këët piny ni teek, na köö ki jø Dhayan, ni ‹Uuna jiy 'moa.› »

Luum Aŋuun Jwør Gïï Mo Leth Mar Jerucalem

¹⁷ Wui Jerucalem, päyï! Päyï nø, ni ööï maal, ï na no omäthö ya athöönh wëër cer Wuuö Jwøk. Amaathï møn ni thöörï gø, ni put ïïni wëëk bøømmø.

¹⁸ Ki røk jiy moa nywølï bëët, tïmö ni bäŋgø mo piec ïïni, ni tïmge bëët, ge na piithï, ni bäŋgø mo mak cerï.

¹⁹ Gïï na ariiø bëët ii, ööa bäätï, ni beege ränynyö mano raany pou ri leny, ki thøø mano näk jiy ki gø ko opëëllö, ki thøw käc. ?Aŋa nø, noo kïmmi kiperï? ?Na aŋa noo cøm cwïnyï?

²⁰ Kiper dëët jiy moï aööl, ni bëëtge ni geno päänhnhö nyeŋ jïëthe, kaamar aŋer mo omaa ki thøøl, ni ge bëëdö ni geno omeer ki wëëc Wuuö Jwøk, ni beeye juuk mar Jwøk marï.

²¹ Kiper manøgønø, u na jø Jerucalem na no ocaarø, ni bee u na no omeer, ni paa ki køøŋø, cegu ïthu ki gïn.

²² Man bee gïna caan Kwäärö Wuuö Jwøk, Jwøk maru, eni ni wø bëëdö ni pïëmö kiper jiye, ena köö, ni «Ka adïëri møn, aani, athöönh wëër mana cïba jïïu, na tïïc uuni nou bøømmø, akäla wøk ceŋŋu, nou ba cäŋ mäthö ki gø këët na bäre bäre.

²³ 'Ba aani, athöönh wëër manøgø lwøra lwørø baŋu ni cïba gø ceŋ jø wø tïïc bëëtö maru ni teek, ni beege jø wø köö ki uuni, ni ‹Butu piny, nee wa cääthwa ki bäätu.› Ni tïïyu dïŋäthu kaamar piny, nee tïme kaamar øtjöö nee cäädhö ki bäätu.»