Aydheea 50 - Wëël Jwøk

Luum Raay Mo Jø Icriel Ki Luum Dhaanh Wuuö Jwøk Mana Näk Ee Jierø

¹ 'Ba man beeye luumma caan Wuuö Jwøki, ena köö, na «?Age wëël apääk mana riemma miiu ki gø? ?Aŋa na coola u baŋe kiper mana mäya baŋe? Uuni, u gath kaper raay mou, ni miiu riemmi kaper japa reyø na tïïyu.

² ?Aperŋø ni tïme ni kede bäŋ dhaanhø kanya ööa? ?Ni kanya cwöta, aperŋø ni tïme ni bäŋ dhaanhø mo ojïëy? ?Aŋø, you caarø ni bada ciek ki man cool kwöri mou, ni bäŋ teek jïra ki man käla uuni wøk ki yïth japa leth? Raŋŋu, aani naama dwøŋ taala taalø ki køør mano köömma gø ki dhaa; ni tïïa näm na dïtëën, ni ö reci moa en yïthge ni thøwge ki riew, ni ŋwääge no okwäk kiper bäŋ pïï.

³ Maal tïïa tïïö na muudhö, keda dhaanhø mo oruyö ka abïï mo cøl kiper thøø.»

⁴ Kwäärö Wuuö Jwøk aana mooe ki leep mo tiir ma mar pwöc, nee tïme ni løny jïra ki man wëëga dhaanhø mo oööl tëënnö ki køør luup mo wø caana. Eni, a jiee jieø cooth ka amöölla, ni jap ïtha nee ïtha ciia kaamar dhaanhø mo opwönynyö.

⁵ Kwäärö Wuuö Jwøk ïtha ajabe, ni kära kweer ki man wïnynya luumme, naa kär døø ŋääa.

⁶ 'Ba aani, dïŋääa acïba jï jøøa pwöt aani, ni cïba thäga jï jøøa cööt jïëc tïïa wøk. Aani, täärnyïma kära kanø ka abuua mana buu aani ki gø, ki laaw moa ŋool bääta.

⁷ Kiper Kwäärö Wuuö Jwøk a wø kønye kønyø, kiper manøgønø, wïïa ba lääy. Cwïnya amaa ki man jïënya gïïögø, ni puta gø ŋäc møn ni wïïa ba lääy.

⁸ Kiper Wuuö Jwøk ni wø ŋun aani nut buuta. ?Aŋa nø noo pïëmö ki aani? Beerra man ö ŋateca ni ööe nee dëëtwa raŋwa ki gø! ?Aŋa ni many løøk ki aani? Beerra man ö ŋateca baŋa!

⁹ Raŋŋu, Kwäärö Wuuö Jwøk a wø kønye kønyø. ?Aŋa nø noo jääl aani? Ka adïëri møn, jøøka ge ränynyö bëët kaamar abïï, ni ö geni ni cami ya alweela.

¹⁰ ?Aŋa dïïu ni lwäär ki Wuuö Jwøk, na jïëc luum dhaanhnhe mana näk ee jierø, ni cäädhi ka yi muudhö ni bäŋ tar jïre? Beerra man ö eni ni ŋääth Wuuö Jwøk, ni bëëde no ogöök ri Jwøk mare.

¹¹ 'Ba ennø, u ni wø äp mäc, ni you wïrö ki deŋŋu, ni you rubö ni liel, cäädhu ki yi tar mar mäc mou, ki yïthakic mäc moa näk you rubö ki jenni. 'Ba gïno magu cera bee en, uuni, u pätha yïth gïï mo leth.