Aydheea 49 - Wëël Jwøk

Luumma Caan Dhaanh Wuuö Jwøk Mana Näk Ee Jierø

¹ Wui, u na jø wø bëëdö yïth mïëri moa en bäät naama dwøŋ, wïnynyu mara, ni cegu ïthu, u na wïth juurre moa kwörge bäyö. Wuuö Jwøk aana cwøle kanya pooda naa ena ec, ni cak nyeŋŋa kanya pooda naa ena yi mera.

² Wuuö Jwøk luup mo wø ö wøk ki dhaa atïïe kaamar opëëllö mo beth, ni ö eni ni kan aani tïm cere. Ni tïïc aani kaamar atheerø mo ojiedhø, ni put aani kan yi køp mar athëëre.

³ Ni kööe ki aani, ni «Ï na Icriel, ïïna dhaanhnha, ni wø nyoodha ajiem mara ki dëëre.»

⁴ 'Ba aana köö, ni «Aana ööl ki jaak, ni ö kwää dëëra ni øc piny ki gïn mo bäŋ tiere. 'Ba ka adïëri møn, luubö mara ena cer Wuuö Jwøk, ni gïno cool jïra ena baŋe, eni na Jwøk mara.»

⁵ 'Ba ennø, man beeye dwøl mana caan Wuuö Jwøki, eni na cwääc aani ec, naa tïma ni aana dhaanhnhe, nee nyïïkwaac Jeekap duua baŋe, nee ge na jø Icriel dëëtge cooŋge ree; kiper mana näk mo aano wøørø ki nyïm Wuuö Jwøk, ni eni na Jwøk mara bee teek mara.

⁶ Ena köö, ni «Bee gïn mo thiinh jaak kipera ki man tïïa ïïni na dhaanhnha, nee wïth tuŋi mo Jeekap tïŋï maal, ni duuï jø Icriel moa no odööŋ ni kwøw. Aani thuwø ï tïïa tïïö ni ïïna tar mar wïth juurre, nee pïëm mara man wø piema jiy ki gø nee pïïe teegi mo piny bäre.»

⁷ Man beeye dwøl mana caan Wuuö Jwøki, eni na wïïl jø Icriel wøk, eni na Jwøa en kur keere; ni luubö manøgø caane jï ŋata no otaaø, na no okwier wïth juurre, na laŋŋø mar dïbwöthe, ena köö, ni «Nyeye ïïno neenge ni öge maal, ni ö kwääri ni këëlge cøŋge piny ni ge wøøra ïïni, kipera, a na Wuuö Jwøk na no oŋäädhö, a na Jwø Icriel na en kur keere na jier ïïni.»

Luum Duun Jø Icriel Yi Ŋööm Poge

⁸ Man beeye dwøl mana caan Wuuö Jwøki, ena köö, ni «Ki kanyo näk ma kare, løk pïëc marï løøa løø jïrï, ni kønya ïïni dïcäŋo näk cäŋ pïëm man piem jiy yie. Ïïno gwøa ni tïïa ïïni ni ïïna ŋato wëëk luumma tuuda ki jiy thur kare jïge, ni cäŋï ŋöömö manøgø dwøk kare, ni tïïyï kwöra no odööŋ keerge nee cäŋ beetø;

⁹ ni kööï jï jiy moa no omaaø ki tøŋ, ni ‹Dunynyu wøk,› ni kööï jï jiy moa en yi muudhö, ni ‹Nyoothu rou.› Geno bëëdö kaamar dïëk mo cämö ni yïthge met jaak thäk nyeŋ jïëthe, mo cam marge jootge bäät thuuri moa leer.

¹⁰ Geni, ge ba näk käci ki riew, ni ge ba gut lïëth pinynyi ki kwaac cäŋ. Kiper a na Wuuö Jwøk ni wø cwïnye pädhi ki gïrge bee aani noo bwøth geni, noo nyooth geni baŋ pï jøør.

¹¹ Kwöra näk kïte bëët tïïa tïïö na nyeŋ jïëthe, ni ö nyeŋ jïëthe 'moa moa døøŋŋø ni thøri.

¹² Ka adïëri møn, jiya öö ki kany mo bäär, ni møøk käla jï løø wï-piny ni møga käla jï løø kur pänh-cäŋ, ni ö møøki ni kälge paana cwøl ni Cinim.»

¹³ Wui, maalø, kwöŋŋï ki met ec! Wui, ï na piny, yiï mïnne! Wui, u na kïte, jøllu kwöŋŋö mar met ec manøgø! Kiper Wuuö Jwøk cwïny jiye ocøme, ni päth cwïnye ki gïr jiye moa no ocaarø.

¹⁴ 'Ba jø Dhayan aköö, ni «Wuuö Jwøk waana wiie; eni na Kwäärö Wuuö Jwøk wïïe awïl ki waani.»

¹⁵ 'Ba Wuuö Jwøk aköö, na «?Aŋø, dhaagø wïïe wïl ki nyilaal mare mo dhøøth, ni cwïnye ba pädhi ki gïr wääde mana käl yie kiree? Këël dhaagø wïïe doo wïl, aani wïïa ba wïl ki uuni.

¹⁶ Ka adïëri møn, nyeŋŋu agööra thäc ceŋŋa, ni kiir pou ena nyïma cooth.

¹⁷ Jø geer mou ge gëëdö ni ge läädö; ni ö jøøa raany uuni na dïïr wïthu ni wecge uuni ni aacge.

¹⁸ Tïŋu wïthu maal ni lwïthu; jø pou bëët rege acooŋge ni ge ööa baŋu.» Ni kö Wuuö Jwøki, ni «Ka teeŋ man bëëda naa kwøw en, geni ge kïthu dëëtu kaamar jap mïërö, ni meenu ge dëëtu kaamar jap nywöm.

¹⁹ «Kiper kwöra no owiiø na no odööŋ keerge, ki ŋöömö maru na no oraanynyø, ka adïëri møn, otïmö ni thiinh kiper jø obëëdö yie, ni ö jøøa caar uuni ni tïm karge ni bäär døc.

²⁰ Obwöre moa nywøl køør jiy moa thøw, ge poot cäänö ni wïnyö jïïu ni ge köö, ni ‹Kany, thiinh døc kiperwa; wa mooc ki kany mo laac nee wa bëëtwa yie.›

²¹ Køøre pääny tïmö kaamar dhaagø mo cäänö ki yi cwïnye, na ‹?Aŋa na nywøl obwöre moi jïra? Aana dhaanhø mo obwöre moe othum ki thøø, naa ba nywøl këët, ni aano kälö ni aano maa ki tøŋ, naa thääyö jaak. ?Aŋa nø na piith obwöre moi? Ka adïëri møn, aana dööŋ a keera. ?'Ba moi nø ge kälge kaa?› »

²² Man beeye dwøl mana caan Kwäärö Wuuö Jwøk, ena köö, ni «Ka adïëri møn, cera tïŋa maal bäät wïth juurre, ni tïŋa nyuudhi mara maal jï wïth juurre; ni öge ki wäätu ni käärge ka tiet jööthge, ni nyïïu käärge ka göökge.

²³ Nyeye otïmö na wëëe moo piith uuni, ni tïm gwaae moge na mëëe moo dhwøth uuni. Geni, cøŋge këëlge piny nyïmmu ni kuulge wïthge piny, ni täärnyïmge okëët piny yïth ŋøøm, ni naaŋge tør mana en tietu; ni putu gø ŋäc ni bee aani na Wuuö Jwøk; ni jiy mo wø bëëdö ni ŋäätha aani, wïthge ba lääy.

²⁴ «?Aŋø, jap twëër løny ki man lwøri baŋ oteeø, wala jiy mo omaa ki tøŋ løny ki man piemi cer ŋat mo wïnni?»

²⁵ Ka adïëri møn, man beeye dwør Wuuö Jwøk, ena köö, ni «Këël jiy mo omaaø ki tøŋ di lwørø cer oteeø, ni ö jap twëër ni lwøri cer ŋat mo wïnni. 'Ba aani, a ŋäbö ki ŋat wø ŋäbö ki uuni, ni piema obwöre mou.

²⁶ Aani, jøøa caar uuni caama caamø ki rïŋ dëëtge keerge, ni wëëga ge meerø ki remø marge keerge ni caala man wø meerø ki køøŋ nyïïomøki mo keec døc. Ni puti ya jiyi bëët ŋäc ni bee aani na Wuuö Jwøk na pïëmi maru, na wïïl uuni wøk, a na Jwøa teek mar Jeekap.»