Aydheea 46 - Wëël Jwøk

Luum Juu Mo Wø Wøør Mo Jø Babiløn

¹ Jwøa cwøl ni Bël cøŋŋe akëël piny, ni ö jwøa cwøl ni Nebø ni dwøk kööre piny. Kïtge moa no otieŋø akïth bäät dhäk ki lääc paac møøk, ni tïmge na tëër mo peek døc, ni duunne ki öölö mo dwøŋ bäätge.

² Geni, kööthge adwøkge piny ni këëlge cøŋge piny ge bëët. Ni tïme ni kär løny ki man kønyge dëëtge, 'ba ge ki dëëtge kiree gena käl ki tøŋ.

³ «Wui, jø dhi øt Jeekap, cegu ïthu ki mara, u na jø dhi øt Icriel moa no odööŋ, u na käära ki mana täge nou ena ec, naa poot bëëdö naa käära uuni ennø ki mana täge ki kanya nywøl uuni;

⁴ këël mano pïïe ri cwiic dööŋö maru, aani, a poot na kara. Ni këël kanyo døøŋŋu ni wïthu da lwaar, u poot käära käärö. Bee aani na tïïc uuni; 'ba u puta ka käärö. U käära käärö møn, ni piema uuni.

⁵ «?Aŋa nø ni pääru a ki gø, naa tïïyu naa röömi ki eni? ?Aŋa ni tïïyu aani naa röömi ki gø nou päära aani ki eni?

⁶ Da jiy mo warkey wø kunyge wøk ki yïth opïri moge, ni rømge gwel-bïrö bäät gïr røm, ni cwötge ki ŋat mo waŋe riek ki tïï warkey, ni ö ŋatøgø ni tïïc gø na kït gïn wø lam. Kanyøgønø, cøŋge këëlge piny nyïme ni wøørge gø.

⁷ Geni, gïnögø wø jiege göökge, ni käärge gø; ni cïpge gø kare ni put bëëtö ni cuŋŋö kare kanya en yie. Eni dëëre ba tuue kare kaace. Këël dhaanhø doo jwöga baŋe, bäŋ gïn løøe, ni ba løny ki man piem ŋatøgø cer gïna leth na näk ee jwørø.

⁸ «Lääŋŋu gïn ni maau gø wïthu, ni putu gø kan cwïnynyu, u na jø raay.

⁹ Parru wïthu ki gïïa no opöödhö na kwøŋ tägö cøøn, kiper bee aani na Jwøk, ni bäŋ Jwøk mør këët. Aana Jwøk, ni bäŋ Jwøk mør këët mo caala aani.

¹⁰ Gïno tägi ya aŋuudi wø kwøŋa ka caan, ni caana gïïa näk poot kär tïïö, ki kany mo bäär cøøn, ni kööa, ni ‹Luubö mara cuŋŋö kare na adïëri, ni wëëga gïïa met yia ki ge thur karge.›

¹¹ 'Ba aani, da ŋat mo cwøla cwølø ki jï løø kur tuul-cäŋ, mo käla paac mør mo bäär, ni ööe kaamar wenyø man wø cämö ni cwëëdhö, nee gïno manynya nee tïïe. Ka adïëri møn, luubö manøgø anø caana, ni ka adïëri møn, puta ka wëëk thur kare. Luubö manøgø ya nø cooŋ; ka adïëri møn, tïïa tïïö.

¹² «Cegu ïthu ki mara, u ni wïthu teek en, ni karu bäär ka adïëri.

¹³ Adïëri mara nyïïa kany mo cään, ni kare ba bäär këët. Pïëm man piema jiy ki gø ba ruu. Pïëm man piema jiy ki gø kïtha yi Dhayan, ni nyoodha ajiem mara jï jø Icriel.