Aydheea 45 - Wëël Jwøk

Luum Jïër Mar Nyeya Ma Kiröc

¹ Man beeye dwøl mana caan Wuuö Jwøki jï nyeya ma Kiröc, na näk ee røønyø na ŋat tïïc mare, na näk ee maaø ki cer cwïï gø, nee wïth juurre dïïme ki ree, nee teek mar nyeye lwøre, nee dhøk kiiri jap jïre ni ba cïëge këët; ena köö,

² ni «Aano cäädhi nyïmï ni tïïa kwöra no opäny maal bëët ni rege päärö; aani dhøk kiiri moa no otïïö ki nywïëny moa näk jwëëlli tøya tøyø, ni ö nywïënynyi moa no orïïö ki dïge ni ŋøra ge.

³ Aani jap kwärö moa no okan yi muudhö ki moa no okanø kwör mo kuc cïba cïbö jïrï, nee ŋäyï ni bee aani, a na Wuuö Jwøk, Jwø Icriel, na cwøl ïïni ki nyeŋŋï kiree.

⁴ 'Ba ï na Kiröc, ïïna cwøla ki nyeŋŋï kiree, kiper dhaanhnha ma Jeekap, ni beeye Icriel na näk ya jierø, ni mooa ïïni ki nyeŋ wödö, këël na bëëdï naa kuyï.

⁵ Bee aani na Wuuö Jwøk, ni bäŋ Jwøk mør këët. Bäŋ Jwøk mør këët ni näk mo paa aani keera. Aani, ï mooa mooø ki teek, këël na bëëdï naa kuyï;

⁶ nee tïme ni løny ki man ö jiyi ni ŋäcge gø, ki mano täge ki jï løø kur tuul-cäŋ këël jï løø kur pänh-cäŋ, ni bäŋ Jwøk mør këët ni näk mo paa aani keera. Bee aani na Wuuö Jwøk ni bäŋ Jwøk mør këët.

⁷ Bee a na tïïc tar na tïïc muudhö, ni bee a ni wø känni ki bëëtö mo beer, ni wø wëëk bëëtö mo raac tägö, bee aani na Wuuö Jwøk ni wø tïïc gïïögø bëët.

⁸ «Wui maalø, beerra man wëëgï bëënynyö ööny piny kaamar køth, ni ö pøølli ni jääŋ bëënynyö manøgø piny, beerra man ö ŋøømmi ni jap ree, ni ö pïëmmi man wø piem jiy ki gø ni tuul wøk ki bëënynyö na aciel, ni døøŋge ni jïtge ki nyïëdi. 'Ba aani, a na Wuuö Jwøk, bee a na cïp gïïögø piny.

⁹ «Otïmö ni leth jï ŋat wø pïëmö ki ŋata cwääc gø. Eni caala dak aciel røk dääe mo bäät piny! ?Aŋø, dak doo köö jï dïcwäc dääe, na ‹Agïnaŋø ni tïïyï enø?› ?Wala gïn mo otïïö doo köö jï ŋata tïïc gø, ni ‹Bäŋ ceŋ jïrï›?

¹⁰ Wui, otïmö ni leth jï ŋat wø köö jï wänni, na ‹?Agïnaŋø na mooyï ki jwïëy?› Wala köö jï menni, na ‹?Agïnaŋø na lwaarï ki gø?› »

¹¹ Man beeye dwør Wuuö Jwøk, eni na Jwø Icriel na en kur keere, na cwääc Icriel, ena köö, na «?Aŋø, a dou pëënynyö kiper gïïo tägi yi nyïm kiper obwöre 'moa, naa dou köömmö kiper gïïa tïïa ki cera?

¹² Bee aani na tïïc piny ni cwääa dhaanhø bääte. Maal apeera ki ceŋŋa, ni cïïmma gïïa en yie bëët.

¹³ Aani Kiröc anø tïŋa maal ki køør adïëri mara, 'ba nyeŋ jïëthe moe bëët otïïa ni tiir, ni ö eni ni geer pääny mara, ni tïïc jiya moa no omaaø ki tøŋ nee wec, ni bäŋ gwel mo di coolø wala muuy mo dï cïbö.» Manøgø bee dwør Wuuö Jwøk, eni na wïth jammi bëët.

¹⁴ Man beeye dwør Wuuö Jwøk, ena köö, ni «Jap kwärö mo jø Ijep, ki gïïa perge leth mo jø Kuuc, otïmö na moï, ni ö jø Caaba moøgø ni bäyö yøø ni öge baŋï. Geno cäädhi køørï ni geno twöö ki tiimme, ni këëlge cøŋge piny nyïmï; ni cäänge ni köge, ni ‹Ka adïëri møn, Jwøk bëëdö ka ïïni, ni bäŋ Jwøk mør këët ni näk mo paa eni.› »

¹⁵ Wui, ï na Jwø Icriel, ï na pïëmi! Ka adïëri møn, ïïna Jwøk mo dëërï kanï kanø.

¹⁶ Jiy bëët mo wø tïïö ki kït gïï wø lam, wïthge olääy ni tïm nyeŋge ni law. Ni ö geni bëët ni putge aay ni wïthge olääö.

¹⁷ 'Ba Icriel onø piem Wuuö Jwøki, ki pïëm mo bäŋ cuŋŋe. Eni wïïe ba lääy ni waŋe ba tïmö ni law këët ki yïth cwiiri bëët na bäre bäre.

¹⁸ 'Ba man beeye dwør Wuuö Jwøk, na cwääc maal, ni bee eni na Jwøk na cwääc piny na tïïc gø. Eni, piny akëël piny, ni käre cwääö nee bëëde ni ŋaam jaak, 'ba acwääe kiper nee beet. Ena köö, ni «Bee aani na Wuuö Jwøk, ni bäŋ jwøk mør këët.

¹⁹ Aani a kär cäänö ni tiet luup 'moa yaa kanø, naa kär cäänö yi ŋöömö mør ma muudhö; a kär köö jï nyïïkwaac Jeekap, ni ‹Manynyu aani kiper gïn mo bäŋ tiere;› aani, a na Wuuö Jwøk, a wø caana adïëri, naa wø køpa luup mo tiir.

²⁰ «Dwallu rou na aciel ni ööu! Nyänhnhu kany mo cään na aciel, u na wïth juurre moa no obøth. Jiy mo wø käär jenni na juu mo wø lam, ni wø lam juu moøgø ni ba kunyö yøø, bäŋ gïn mo ŋäcge.

²¹ Køpu maru, ni caannu gø, beerra man cäännu bääte na aciel. ?Aŋa na caan gïnögø ki mana täge ya acääŋŋe ki kany mo bäär? ?Aŋa na car gïnögø cøøn? ?Aŋø, paa aani, a na Wuuö Jwøk? Bäŋ Jwøk mør këët ni näk mo paa aani keera, ni bee a na Jwøk na näk mare adïëri, na näk pïëmi. Bäŋ Jwøk mør këët, 'ba bee a keera.

²² «U na jiy moa en teegi mo piny bëët, ööu baŋa nou piem, kiper bee aani na Jwøk, ni bäŋ Jwøk mør këët.

²³ Aana kööŋ ŋëëta keera; luubö manøgø anø duny wøk ki dhaa na adïëri, ni ba løny ki man døøe këët. Cøŋŋi bëët këëlla piny nyïma, ni ö lëëpi bëët ni kööŋge nyïma.

²⁴ Gïra caange caanø ni köge, na ‹Adïëri ki tëënnö joot ka ri Wuuö Jwøk keere.› Jiy ööa baŋe, ni ö jiyi bëët moa no owëër ki eni ni wëëk geni lään wïc.

²⁵ Ki ri Wuuö Jwøk nyïïkwaac Icriel bëët di ŋunnö, ni putge eni jiem.»