Aydheea 36 - Wëël Jwøk

Kanya Ö Jø Aciria Na Ŋwöge Bäät Jerucalem

¹ 'Ba kanya tïm cwiic Edhekaya na apaar kurŋween bäät nyec, Cenakerëp nyeny Aciria acøø ni tuk päänye mo Juuda bëët moa näk kiiri moge ogeerø ni teek ni mak geni.

² Køøre nyeny Aciria, kwääy lwaa leny mana cwøl ni Rapcakë, ki lwaa leny mo päl, ajääŋŋe ki Lakic nee cige Jerucalem baŋ nyeya ma Edhekaya. Kanyøgønø gena cuŋŋö bäät øøl pïï mana käl yi puul mana en jï maal, waŋjööra dwøŋ man wø cør pwöla mar jø peny ka abïïe.

³ Køøre Eliekim wär Kilkiya na en paan dwøŋŋi cere, ki Cëpna ŋat wø göör luup akwöma piny, ki Jöa wär Acaap ŋat wø par wïc ki luup, gena ö wøk baŋ jøøgø.

⁴ Kanyøgønø kwääy lwaa leny aköö jïge, ni «Caannu jï Edhekaya ni nyeny Aciria na dwøŋ aköö, «ni ‹?Ïïni, ï ŋääthï ŋø?

⁵ ?Aŋø, ïïni, waŋï riek ki leny døc, ni jïrï da jø leny mo teek? Marï kaa waac jaak. ?Ennø, ï ŋääthï ŋa ni gëëmï ki aani en?

⁶ Ka adïëri møn, ïïni, ï ŋäätha Ijep ni wø bëëdö kaamar abaarø ni wø laar toor ni cwøp cer dhaanhø kany wø näk mo dhaanhø kwömö ki gø. 'Ba Peerø nyeny Ijep caala abaarø manøgø ki jï jø wø ŋääth gø bëët.

⁷ ?'Ba ni näk mo u köö jïra nou ŋäätha Wuuö Jwøk, Jwøk maru, aŋø, paa eni na kwör lam moe mo wø läm jiyi yïthge bäät thuuri, ki gïï wø cïp olämme bäätge moe, raany Edhekaya, na kööm uuni, u na jø Juuda ki jø Jerucalem, ni lämu nyïm gïn wø cïp olämme bääte mana en Jerucalem keere?› »

⁸ Ni cäŋ kwääy lwaa leny köö, ni «Ennø, beerra man gääbu dhøgu ki nyeya mara ma nyeny Aciria, naa cïpa jïïu ko okwëënyi ma kume ariiø ni näk mo løny jïïu ki man cïpu ki jiy mo cäädhi ki bäätge.

⁹ ?Aŋø, këël na näk mo u ŋäätha jø Ijep kiper jïëth leny mo wø tut okwëënyi, ki jø leny mo wø këëdi ki bäät okwëënyi, olønye jïïu nidïï ki man riemmu kwääy leny aciel mana kare thiinh mar nyeya mara?

¹⁰ ?Aŋø, ni ööa kany en baŋ leny nee kany raanynya, ki jïïu naa ba ööi ka køør dwør Wuuö Jwøk? Beeye Wuuö Jwøk na köö jïra ni ööa paani naa këëda ki gø nee raanynya.»

¹¹ 'Ba Eliekim, ki Cëpna, ki Jöa gena köö jï kwääy lwaa leny, ni «Beerra man ba caanï luummögø jïwa ki dhi Ibaru, na näk dhøk marwa, ni wïnyö jï jøøi no opï piny bäät kiir ii; 'ba caanï jïwa ki dhi jø Aram, kiper wïnyö jïwa.»

¹² 'Ba kwääy lwaa leny aköö jïge, na «?Aŋø, nyeya mara na jääŋ aani, a jääŋŋe kaper nee luupi ii cara jï nyeya maru ki jïïu keeru, ni paa kiper nee wïny jøøgø no opï piny bäät kiir yøø, jø ojwør gïï mo leth ki uuni na aciel, noo cam laac-døøŋŋø moge noo maath laac moge moa therø ki uuni na aciel?»

¹³ Kanyøgø kwääy lwaa leny aput ö maal ni rwääye ki dhi Ibaru ni dwøre ee tïŋ maal ni kööe, ni «Uuni, wïnynyu dwør nyeny Aciria na dwøŋ.

¹⁴ Nyeya aköö, ni ‹Uuni, kär u cøøk Edhekaya, kiper ba løny jïre ki man piem uuni cera.

¹⁵ Kär nee Edhekaya tïïya uuni nee Wuuö Jwøk ŋääthu, ki køør man wø kööe, ni «Ka adïëri møn, Wuuö Jwøk ø pieme piemø; ni pääny man ba ci cer nyeny Aciria.» ›

¹⁶ «Kär dwør Edhekaya wïnynyu; wïnynyu dwør nyeny Aciria na köö, ni ‹Tïïyu bëët-mëër ki aani, ni ööu wøk baŋa. Køøre uuno bëëdö ni ŋati man nø opï piny paare ni cama caammi mo pwöthe ni maatha pïï moa näk ee cooŋø,

¹⁷ këël kanyo ööa noo käla uuni noo kïtha uuni yi ŋöömö mo caala ŋöömö maru, ni beeye ŋöömö mo beel ki nyïïomøki ciek yie, mo yie da caammi, ki pwöth nyïïomøki.

¹⁸ « ‹Gwøgu rou nee Edhekaya wïthu ba maaŋŋe ki køør man wø kööe, ni «Wuuö Jwøk ø pieme piemø.» ?Aŋø, da jwøk røk juu mo wïth juurre, mo jiy moa bëëdö yi ŋöömme ee piemø cer nyeny Aciria?

¹⁹ ?Age juuk jø Amath ki juuk jø Arpat? ?Age juuk jø Cepar-Waym? ?Aŋø, geni jø Cameria apiemge cera?

²⁰ ?A juuge moe røk juu bëët mo tiet mïëri moøgø mo jø wø bëëdö yïth ŋøøpge ege piemø cera, ni tïme ni Wuuö Jwøk jø Jerucalem pieme piemø cera en?› »

²¹ 'Ba jøøa en bäät kiir gena bëëdö ni geno nikïïl ni bäŋ luubö mo ege dwøgø jïgø, kiper geno nø kööm nyeya ma Edhekaya, ni «Kär dee gïn mo dwøgu jïre.»

²² Køøre Eliekim wär Kilkiya na en paan dwøŋŋi cere, ki Cëpna ni wø göör luup akwöma piny, ki Jöa wär Acaap ni wø par wïc ki luup, gena duu baŋ Edhekaya na abïïe moge ege jeeyø ki pänh cwïny, ni caange luup moa caan kwääy lwaa leny jïre.