Aydheea 33 - Wëël Jwøk

Luum Ajäla Mano Tïïc Jwøki Dëët Nyïïmän, Ki Pïëm Mano Piem Jiye Ki Gø

¹ Wui, otïmö ni leth jïrï, ï ni wø räänyö, ni bäŋ ŋat mo raany ïïni. Wui, otïmö ni leth jïrï, ï ni wø tïïc gïï mo reyø ki piny, ni bäŋ gïn mo raac mo otïïö dëërï. 'Ba kanyo weyï räänyö, ï put ka raanynyø, ni kanyo weyï gïï mo reyø mo wø tïïyï ki piny, gïï mo reyø put ka tïïc dëërï thuwø.

² Wui, Wuuö Jwøk, nyooth met ec marï jïwa, kiper wa bëëdö ni wa raŋŋa jïrï. Tïmï ni ïïna teek marwa cooth ka amöölla, ni bëëdï ni ïïna pïëmi marwa kanyo enwa yïth gïï mo leth.

³ Wui Wuuö Jwøk, kany wø määr dwørï, jiy puta bwøk, ni kany wø ööï maal, wïth juurre puta keethø.

⁴ Wui, u na wïth juurre, jammi mou otwier jø møøki, kaamar man wø ö bäänyö wø nigerääc bäät beel, ni putge gø thöör.

⁵ Wuuö Jwøk kare dwøŋ, ni eni bëëdö maal; eni ŋøl mana na adïëri ki bëët adïëri otïïe ni dwøŋ yi Dhayan.

⁶ Eno tïmö ni beeye tier bëëtö maru ki yïth nïne mou, ni bee eni na tier kwärö man wø joot køny ki leec wïc ki kwänynyö baŋe. 'Ba ki man lwäär Wuuö Jwøk beeye kwärö eni.

⁷ Raŋŋu, jicge moa teek døc ge jwöŋö nyeŋ jïëthe, ni ö jø wø jääŋŋi ni wø tïïc mëër ni jwöŋge ni keeya yïthge.

⁸ Uutjïëthe moa døøŋŋø adööŋ ni ŋaam, ni bäŋ ŋat mo cäädhi ki yïthge. Ni ö luumma no otuudö ni raanynyi, ni ö päänye ni nigepäät, ni bäŋ ŋat cädö kiper jiy.

⁹ Ŋöömö jwöŋö ni kïmme; ni ö lur Libaanø ni lää wïïe ni tale; goor Carön tïmö kaamar paap ma tëën; ni ö jenni mo ŋööm Baacan ki mo Kïn Karmël ni øc bøøge moge piny.

¹⁰ Køøre Wuuö Jwøk aköö, ni «Ennø, a ööa maal, ni wëëga nyeŋŋa jiem, ni tïŋa nyeŋŋa maal.

¹¹ Lethø anø ci iï kaamar dhaanhø, 'ba onywølï na luum mo otal, ni ö jam jwïëy marï ni tïme na maac ni cam ïïni.

¹² Wïth juurre owaaŋ ni tïmge na bur, kaamar man wø waaŋ koodhi mo oŋøt piny.

¹³ «Wui, u na kwöru bäyö, wïnynyu gïna tïïa; wui, u na kwöru cärö, kwanynyu tier teek mara.»

¹⁴ Jø raay moa en Dhayan, gena lwäyö, ni tïm dëëtge ni kwanynyi, ge na bëëdö ni Jwøk ege wiiø, ni köge, na «?Aŋa dëëtø ni løny jïre ki man bëëde buut maac man wø räänyö; aŋa dëëtø ni løny jïre ki man bëëde buut maac man wø wääŋö na bäre bäre?»

¹⁵ Beeye ŋat wø bëëdö ki bëëtö ma kare, ni wø cäänö ki luup ma adïëri, ni beeye ŋat wø kweer ki käl jammi ki jöö mo raac, ni wø bëëdö ni ba jïëy ki jammi mo wø cïp ki piny, ni wø ïthe ba ciie ki luup jiy mo nääö ki piny, ni wø män ree ki raŋ gïï mo reyø.

¹⁶ Teeŋ ŋatøgø, kar bëëtö mare otïmö ni ena maal bäät kïdi, ni tïm kïdi na kar gwøk røk mare, ni tïm cam mare ni di cïbö jïre, ni pïï moe moo maadhe ba cöök.

¹⁷ 'Ba uuni nyeya oneennu ki nyeŋŋu ka ajiem mare, ni jootu paana näk ree ee jwaa ni bäär.

¹⁸ 'Ba kar kaaca, wïthu oparru ki gïna wara bëëdu nou lwäär ki gø, ni kööu, na «?Aŋø, age ŋata wara bëëdö ni kwaana jammi? ?Aŋø, age ŋata wara bëëdö ni røma jammi? ?Aŋø, age ŋata wara bëëdö ni kwaana uut koor moa no ogeerø ni ena maal?»

¹⁹ Uuni, jø atöör moøgø ba jootu këët, ni beege jø wø cäänö ni dhøk marge kuc, ni wø car luup mo tietge ba kwany, ni wø cäänö ni keda ge gwøŋ, ni tiet luup moge ba ci cwïny.

²⁰ Neennu Dhayan, pääny man wø wøørwa ajwöm mowa yie; Jerucalem ojootu ki nyeŋŋu na kar bëëtö mo päŋ ki bëët-mëër, ni tïme kaamar oduŋkaara mo bäŋ ŋat daak gø, wala ŋat mo pudha teegi moe wøk, wala ŋat mo cööta thøøli moe.

²¹ 'Ba kar kaaca, Wuuö Jwøk otïmö ni bee teek marwa ni tïme kaamar kany mo da näm, ki nyeŋ näm mo okønynyø ni døøŋŋø, ni bäŋ ŋat mo cør yïthge ki jää leny man wø kiiw ko opääli, ni bäŋ jïëth leny mo teek mo pöödhi ki yïthge.

²² Kiper Wuuö Jwøk bee dïŋut luup marwa, ni bee eni na cïp ciik jïwa, ni ena nyeya marwa, ni bee eni noo piem waani.

²³ Thøøli mo wø tïïc jääy nee cäädhe, nilwak, ni ö abïïna no otwöö wï ogeella ni ba peer ree. Køøre, japa thööth na näk jap twëër opääŋŋi, ni këël ŋwøl jïtö rege.

²⁴ 'Ba kar kaaca, bäŋ ŋat mo ena Dhayan mo köö, ni «Aani dëëra da täw.» 'Ba jiy mo wø bëëdö yie raay moge di wëënnö.