Aydheea 32 - Wëël Jwøk

Luum Nyeya Mano Käär Jiy Ki Jöör Adïëri

¹ Neennu, nyeya mo käära jiy ki jöör adïëri oööi, ni ö kwääri ni käärge paac ki jöör ŋøl luup ma kare.

² ŋati man nø rege otïmö ni caala gëëŋi kiper jamø, ni caala kar gwøk røk kiper apwøyaweerø, ni caala pï jøøro mo ena dïtëën, ni caala tïm kïdi mo ena yi ŋöömö ma pwöla.

³ Kar kaace nyeŋ jiy moa näk nëënö ba nijïïm këët, ni ö jiyi moa näk ïthge wïnyö ni putge ïthge cek.

⁴ Jiy moa näk wïthge ba cädö, adïëri otïmö ni ŋäcge, ni ö jiyi mo wø cäänö ni lëëpge ba tiir ni tïmge ni ge cäänö ni lëëpge tiir.

⁵ 'Ba ŋat mo wïïe ba leer ba cwøl këët ni bëëtö mare beer, ni ö ŋat mo bëëtö mare ba tiir ni ba købi ni bëëtö mare tiir.

⁶ Kiper ŋat mo wïïe ba leer cara luup mo oballe jaak, ni rääö man wø en cwïnye okadhø, ni bëëdö ni temma raay, ni Jwøk ee kwierø, ni cara gïï mo reyø dëër Wuuö Jwøk; ni tïïya dhaanhø mo onäk käci nee ba jääŋe, ni judha pïï wøk dhi dhaanhø mo onäk riewi.

⁷ 'Ba ŋat mo bëëtö mare ba tiir, tïïe moe reyø; eni cïpa piny ka acaare mo reyø, nee ŋata no ocaarø raanynye ki luup tööt, këël doo caana luubö ma adïëri.

⁸ 'Ba ŋat mo bëëtö mare beer, acaare moe beyø, ni cuŋŋe ni teek ki køør acaare moe na beyø.

⁹ Wui, u na määr wø bëëdö ki bëëtö mo jööt jaak, ööu maal ni wïnynyu dwøra; u na mään moa therø, u ni wø cädö ni karu beer, cegu ïthu ki luubö mara.

¹⁰ Ki køør cwiir aciel ki nïne møøk wïïe, u ni wø cädö ni karu beer, dëëtu otïmö ni kwanynyi, kiper jer omøki ränynyö, ni tïme ni bäŋ nyïïomøki mo di cooŋø këët.

¹¹ U na määr wø bëëdö ki bëëtö mo jööt jaak, dëëtu tïme ni kwanynyi. U na mään moa therø, u ni wø cädö ni karu beer, dëëtu tïme ni rïïŋö. Göönyu abïïe wøk dëëtu, ni dööŋŋu ki dëëtu, ni dwølu keece dëëtu.

¹² Pöötu kööthu kiper gïna tägö dëët pwöth jer omøki, ki jer omøki mo wø nywøl døc,

¹³ ki ŋööm jiya na näk yie otuy ko otwel ki koodhi. Kare møn, kïmmu kiper mïëri moa näk bëëdö ni yïthge da met ec, ki päänya näk yie päŋ ki met ec.

¹⁴ Kiper paan dwøŋ dööŋ keere, ni ö paana näk jiy thööth yie ni tïme ni bäŋ jiy yie. Thuuri ki uut koor tïmö na kwör bëëte jï lääc paap na bäre bäre, ni tïme na kar kwääk jï arëëni mo paap, ni bëëde na kar kwaath mar dïëk;

¹⁵ këël kanyo ö Jwïëc Jwøki noo ööe ki maal noo ö bäätø, noo tïm dï paapi na pwödhö mo ŋöömme beer, ni ö pwödhö mo ŋöömme beer ni kadhe ni tïme kaamar lul mo oløth.

¹⁶ Køøre jöör ŋøl luup ma kare tïmö ni dagø yi ŋöömö manøgø, ni ö bëët adïëri ni tïme no ogääbö yi pwötha ŋöömme beer.

¹⁷ 'Ba tïïc mar bëët adïëri tïmö na bëët-mëër, ni gïno duu bëët adïëri beeye bëëtö mëëth ki ŋääth røk mo bëëdö ni nut na bäre bäre.

¹⁸ Køøre nø, jiya obëëdö kany mo nuta bëët-mëër yie, ni beeye kany mo jiy bëëdö no ogwøø yie, mo jiy jïtö ki jwöm yie ni bäŋ okiera.

¹⁹ 'Ba pey opänhnhi, ni ö lulli ni gøøi piny, ni put pääny dwøk piny na bäre.

²⁰ 'Ba këël gïïögø doo tägö, gwïëth oen bäätu, u ni wø piith caammi mou deŋ pïï, ni wø wec dhäk ka arëëni nee cääthge jaak ni ge cämö ki luum.