Aydheea 30 - Wëël Jwøk

Luum Ajäla Mano Tägi Bäät Jø Icriel Kiper Mana Göökge Dëër Ijep

¹ Wuuö Jwøk aköö, no «Otïmö ni leth jï obwöre moa wïthge teek, jø wø cïp piny ka acaare ni tïïcge gø, ni patha ki køør mana manynya, ni wø tudö ki luup, ni patha ki køør Jwïëy 'moa, ni ge meeda raay bäät raay moge møga.

² Gena kweer ki man pëënyge aani, ni cige Ijep nee göökge ri Peerø nyeny Ijep nee ge køny, nee Ijep tïme na tïpö bäätge man gwøk geni.

³ Kiper manøgønø, køny mar Peerø otïmö na lään wïc bäätge, ni ö gööki mana di Ijepi tïmö na tïpö bäätge ni tïme ni beeye ränynyö marge.

⁴ Këël na bëëtge ni kwääri moge onø ci yi Dhöän, ni jøøa jääŋge onø pïï Anec,

⁵ ge bëët wïthge olääy kiper mano tïme ni bäŋ køny wala bëënynyö mo jootge joodø baŋ jøøa ŋääthge; 'ba otïmö ni beeye lään wïc keere ka ajøøŋ noo pïï bäätge.»

⁶ 'Ba luumma nyooth Wuuö Jwøki kiper 'lääy mo wø en kanya cwøl ni Nëgëp bee en: Jøøa jääŋŋi gena aay ni ge cøra yi ŋöömma raac ni wø jwør gïï mo leth yie, kanya näk yie da ŋuuwe, ki thwöre mo reyø, ki teeŋ thwöre møøk mo määdö; ni ge aay ni jap kwärö moge käärge ka bäät arëëni, ni japa näk ege kaannø na perge leth käärge ka bäät athïrööle, ni ge cøøa baŋ jiy mo bäŋ køny mo tïïcge,

⁷ kiper køny mar Ijep bäŋ tiere. Kiper manøgønø, ena cwøla ni «Reeyap na näk bäŋ gïn mo løny ki tïïc jïre.»

⁸ 'Ba Wuuö Jwøk aköö jïra, ni «Ciï ni göörï luummögø piny nyïm jø Icriel bäät opäm ni nëënö jïge, ni göörï gø piny yi wëëlö thuwø, nee bëëde ni nut yïth nïne moo ööi, nee tïme na lïŋi na bäre bäre.

⁹ Kiper jøøgø beege jø ageem, ni geno obwöre ma tööte, ni beege obwöre mo wïthge teek ki man wïnyge ciik Wuuö Jwøk;

¹⁰ jø wø köö jï jø wø nyuunh Wuuö Jwøki ki luup mo wø nyooth ki yi wïc, ni ‹Kär dee gïï mo neennu;› ni wø köö jï nyïïkuk Jwøk, ni ‹Kär luup ma adïëri mo wø nyooth jïïu caannu jïwa; 'ba caru luup mo cwïnywa mïnnö ki ge, këël doo na cwøk jaak.

¹¹ Weyu jöör adïëri manøgø, ni daagu rou yie; wa ba many gø këët nee dee gïn mo wïnywa wïnynyö kiper Jwø Icriel na en kur keere.› »

¹² Kiper manøgønø, man beeye gïna caan Jwø Icrielli na en kur keere, ena köö, ni «Kiper mana kwierru luubö mara, ni tïme nou ŋäätha teek maru ki man caaru jiy, nou cuŋŋa ri cwøk,

¹³ raay moøgø duua bäätu, kaawat man wø muk kiirri mo bäär, ni päth piny na thäŋi yie aciel.

¹⁴ Ni pädhe kaawat man wø päth daki ni wø peti na thäŋi, ni bäŋ abat mare mo dööŋ mo rømø ki man käär maac ki gø, wala man twøm pïï ki gø yi iith.»

¹⁵ Kiper man beeye gïna caan Kwäärö Wuuö Jwøki, Jwø Icriel na en kur keere, ena köö, ni «Ki man løgu cwïnynyu ni jïtu ki jwöm, beeye jöör pïëm man piem uuni ki gø, ni ö bëëtö man bëëdu nou lïŋö nou ŋäätha aani, ni näk beeye teek maru; 'ba gïnögø käru jïëö.

¹⁶ Uuna köö, ni ‹Ba løny, wa päära wøk ko okwëëc lääy, wa päära wøk ko okwëëc lääy mo rïïŋö døc.› Wøp nø, uuno päär wøk! 'Ba jiy moo rïŋ køøru ge rïïŋö døc ni kaala uuni.

¹⁷ Jiy ma kuma dëëtu, oriem dhaanhe acielli keere, ni rïïŋu nou ŋwieya jiy abïïc keerge, këël mano noubay bäät kïte, ni tïmu kaamar jaath mo bäär mo ocwöth wï kïdi, nou caala gïn ma ŋïï mo ena bäät thuur.»

¹⁸ 'Ba Wuuö Jwøk poot manynya uuni ki man cäŋ mëër mare nyoothø jïïu, ni poot koora uuni ki maal ki man nyooth bäth ec mare jïïu. Kiper Wuuö Jwøk beeye Jwø adïëri. Gwïëth en bäät jiy bëët mo wø bëëdö ni koora eni.

Luum Gïï Mo Beyø Moo Tïïc Jwøki Kiper Jiye

¹⁹ Wui, u na jø Dhayan, ni wø bëëdö yi Jerucalem, u ba jwöŋi këët. Kiper ka adïëri møn, eni na Wuuö Jwøk mëër mare nyoodhe nyoodhø jïïu kany wø jwöŋu nyïme kiper køny; ni kany wø wïny oduuru maru jaak, pïëc maru pute ka løk.

²⁰ 'Ba këël na bëëde ni Wuuö Jwøk, caannø ki jwør gïï mo leth ee nø nøøyø dëëtu kaamar cam kwön ki maath pïï, eni na dïpööy maru dëëre ba kane këët ki uuni, 'ba eni jootu joodø na adïëri ki nyeŋŋu.

²¹ Kanyo wäru cäädhu nou gaa bäät cwïïc wala bäät caam, dwøl wïnynyu wïnynyö ŋäthu mo köö, ni «Jöö en, cäädhu ki yie.»

²² Køøre kït gïï wø lammu moa no olëënynyö ki gwel-bïrö ki moa no olëënynyö ki warkey ba wøørru këët; geni ge putu ka wetø kaamar abïï mo ree da gïn mo raac, ni kööu jïge, «Waana pää ki uuni!»

²³ Køøre nø, Wuuö Jwøk køth ojääŋŋe jïïu kiper köödhi moo piithu yi ŋöömö, ni ö jammi moo ciek yi ŋöömö ni duunne jïïu ki cam mo päl. 'Ba dïcäŋece, lääc paac mou geno cämö kar kwaath mo laac.

²⁴ Dhäk ka arëëni mo wø puur ŋöömö, geno cämö ki cam mo ojiiŋŋø ni met ka acäbö, ni beeye cam mo opiedhø ki gïï wø kwödö ki ge.

²⁵ 'Ba noo tïme na ri cäŋ man tïïc 'näk mana dwøŋ yie, kanyo päth uut koorri moa no ogeerø ni ena maal, wïth kïte moa bäyö bëët ki wïth thuuri moa bäyö bëët ocööt ki nyeŋ näm mo muulö ki pïï.

²⁶ Kanyøgø tar mar dwääy otïmö ni caala tar mar cäŋ, ni ö tarri mar cäŋ ni rienye døc no omëëtö ki kwöre abïriiø, ki tar mo röömi ki tar mar nïne abïriiø. 'Ba yi cäŋ manøgø beeye cäŋ mano ö Wuuö Jwøki noo 'käl gïïa leth wøk bäät jiye, ni beeye kanyo wëëk atwøt caŋŋø yie moa kïth dëët jiye.

Luum Ajäla Mano Tïïc Jwøki Bäät Aciria

²⁷ Raŋŋu, nyeŋ Wuuö Jwøk öö ki kany mo bäär; ni wëër mare liel kaamar maac mo jïye onitul ni cøl; eni wëër døc, ni dwøre bëëdö ni caala maac man wø thöör jammi.

²⁸ Dwør jwïëy mar jam dhee lwör kaamar naam mo pänhnhö, mo päŋ ni ena cwaak. Eni wïth juurre di jierø kaawat man wø pëëdhö ki luul, ni kïth dhøkge ki nywïëny dho okweeny man pee geni kar ränynyö ki gø.

²⁹ 'Ba uuni, uuno wär ki dudi kaawat man wø wärru ki wäär kany wø wøørru ajwömma en kur keere. Cwïnynyu omïnni kaamar jiy mo cøøa baŋ lam ni ge kudhö ko opele, ni ge cøøa bäät Kïn Wuuö Jwøk baŋ Jwø Icriel na näk kïn gwøk røk.

³⁰ Wuuö Jwøk dwøre na teek tïïe tïïö nee wïnye, ni wëëk teek bade ööny piny ni nëënö jï jiy, ki yi maac mo liel man wø thöör jammi bëët, ki yi køth ma ruuga, ki yïth pey.

³¹ 'Ba jø Aciria 'obwøk ki dwør Wuuö Jwøk, kanyo ö Wuuö Jwøki noo pwöt geni ka athøra.

³² 'Ba kanyo ö Wuuö Jwøki noo pwöt jø Aciria ka athøra ni jääla geni, noo wëëk teek bade ööny piny noo tïïc leny bäät Aciria, otïmö ni wïnynya dööt anëët ki dööt thøme mo meeŋ ki baŋ jø Icriel.

³³ Kiper kar maac onø jiiŋŋø ki kany mo bäär; ka adïëri møn, onø jiiŋŋø kiper nyeny Aciria. Ojiiŋŋø na buur mo bäär mo yie dwøŋ, no oämmö ki maac mo wärri mo orubö ki jenni mo thööth. 'Ba jam dhi Wuuö Jwøk beeye na wëëk maac manøgø liel ni wärri.