Aydheea 29 - Wëël Jwøk

Luum Ränynyö Mano Tägi Bäät Jerucalem

¹ Wui, otïmö ni leth jïrï, ï na Ariël, ï na päänya tïïc Deebiti na kar bëëtö mare. Mëëtï ki cwiir bäät cwiir mør, ni ö nïne mo ajwöm moï ni bëëtge ni nut karge.

² 'Ba ï na Ariël, ï wëëga jwør gïï mo leth, ni wëëga ïïni kïmmö ko oduuru, ni tïmï kaamar gïn wø cïp olämme bääte mo ogääbö ki remø.

³ Aani a tïïö ki twïër deŋŋï bäre, ni tïïa ki kwör mo othørø kiper leny, ni wïra deŋŋï ki uut koor mo ogeerø ni ena maal.

⁴ Ïïni, ï dwøga piny, ni tïm cäänö marï ni ö wøk ka yïth ŋøøm; dwørï ööa wøk ki yi tør, ni tïm dwørï ni ö wøk ka yïth ŋøøm kaamar dwør jwïëc dhaanhø mo othøw, ni ö cäänö marï ni tïme ni wïnyi ni muuŋö ki yi tør.

⁵ Nyïïmän moï na thööth ge twäät kaamar tør, ni ö jøøa no ogäy ni tïmge kaamar lethø mo okøøl jamø. 'Ba gïnögø otägi dëëtge ni cwöba røkge.

⁶ Kwäärö Wuuö Jwøk, eni na wïth jammi bëët, oööi ni cwöba røk, ni jääl ïïni ki køth mo märö, ki dïjäŋ piny, ki dwøl mo löörö, ka atuunna, ki køth mo ree da atuunna, ki maac mo räänyö.

⁷ 'Ba lwaak mana käl røk wïth juurre bëët na këëdö ka Ariël, na raany kwör gwøk røk moe, na ciel gø dïër, ge rwäänyö kaamar lääk, kaamar gïn wø nyooth ki yi wïc ki wäär.

⁸ Kaawat man wø ö dhaanhe mo ree da käc oläge ki wäär kee eni cämö, 'ba noo pääe, käc poot nut dëëre; wala kany wø läk dhaanhe mo onäk riewi kee eno mäthö ki pïï, 'ba noo pääe, cwaage poot no otal, ni riew kär aay dëëre; lwaak thuwø mana käl røk wïth juurre, ni wø many leny ki jø Dhayan, otïmö na ennø nø.

⁹ Bëëdu ni uuno bwøk, ni yïthu othäŋŋö, tïmu ni uuna cööye nou ba nëënö, bëëdu ni uuno meer, ni paa ki køøŋø, bëëdu nou bøømmø, 'ba maru patha meerø ki køøŋø.

¹⁰ Kiper Wuuö Jwøk akän bäätu ki jwïëc niine mo thööth, ni wëëk nyeŋŋu nijïïm, u na nyïïkuk Jwøk, ni cïëk wïthu, u na jø wø joot jammi ki køør man wø nyooth Jwøki jïïu.

¹¹ Ni tïm luupi bëët mo wø nyooth ki yi wïc ni caala luup mo ena yi wëëlö mo dhee omwönö; këël wëëllögø doo wëëga ŋat mo ŋäc kwäänö ni købi jïre, ni «Kwaan gïn,» eno köö, ni «Ba løny kwaan jïra, kiper omwönö.»

¹² Wala këël wëëllögø doo cïbö jï dhaanhø mo kwäänö kuue thuwø, ni købi jïre, ni «Kwaan gïn,» eno köö, ni «Kwäänö ba løny jïra.»

¹³ Kanyøgø Wuuö Jwøk aköö, ni «Jøøi ii, gena ö kany mo cään ki aani ki dhøkge jaak, naa wøørge ka lëëpge, 'ba cwïnyge karge bäär ki aani, ni jöör lam marge tïïcge ka køør ciik moa tïïc jiyi.

¹⁴ Kiper manøgønø, a cäŋa tïïö ki gïn mør mo ec thäŋŋö ki gø dëët jøøgø, ni beeye gïn mo rëëma ec mo ec thäŋŋö ki gø møn. Leec wïc mar jøøa wïthge leer wëëga ränynyö, ni ö jø wø laar tiet jammi joot ni tïmge ni tiet jammi ba kwanyge.»

¹⁵ Otïmö ni leth jï jø wø kaan jïëth tïïe moge ki Wuuö Jwøk, ni beege jø wø tïïc tïïe moge yi muudhö, ni wø köö, na «?Aŋa noo joot øøni?» wala «?Aŋa noo ŋäc øøni?»

¹⁶ Uuni luup wø wellu wellø. ?Aŋø, dïcwäc dääe doo päärö ni röömi ko odhöönh? ?Gïna cwääc doo köö jï ŋata cwääc gø, na «A ba cwääya ïïni»? ?Aŋø, dak doo köö jï dïcwäc dääe, ni «Bäŋ gïn ŋäyï»?

Luum Køny Mano Køny Jerucalem Ki Gø

¹⁷ Ki nyi kany mo thiinh, paap mar Libaanø otïmö na pwödhö mo ŋøøm moe beyø; 'ba pwödhö mo ŋøøpe beyø kadhø ni tïme kaamar lul mo oløth.

¹⁸ 'Ba dïcäŋece, miiŋŋe luup moa no ogöörö yi wëëlö wïnyge wïnynyö, ni ö jøøa en yi muudhö, na näk nyeŋge onijïïm ki cöörö, ni nëënge.

¹⁹ Jøøa no othiel piny, met ec marge okadhi ki Wuuö Jwøk, ni ö jøøa canni ni mïn yïthge ki Jwø Icriel, eni na en kur keere.

²⁰ Kiper jøøa no ogäy tïmö ni bäŋgø, ni ö jø abuua ni thumge, ni ö jø wø cwïnyge piew ki tïïc gïï mo reyø ni thøwge,

²¹ ni beege jø wø kïth luup bäät jiy ni wø kat luup kar løøk, ni ge cara luup tööt, kiper nee jøøa marge tiir nee ba ŋunni kar løøk.

²² Kiper manøgønø, Wuuö Jwøk na wïïl Eeberam wøk acäänö kiper dhi øt Jeekap, ni kööe, «Jø dhi øt Jeekap ba bëëdö këët ki kany mo bäär ni wïthge olääö, ge ba bëëdö këët ni täärnyïmge oniduk ki laac wïc.

²³ 'Ba kanyo jootge obwöre moge moa tïïa ki cera ni nut yïthakicge, nyeŋŋa na en kur keere ojiemge, ni wøørge aani na Jwø Jeekap na en kur keere, ni cuŋge nyïma ni ge lwäär ki aani, a na Jwø Icriel.

²⁴ 'Ba jøøa näk wïthge rege cwödhö, tiet luup okwanyge, ni ö jøøa bëëdö ni ŋurö ni jïëcge pwöc.»