Aydheea 28 - Wëël Jwøk

Luum Ajäla Mano Ö Bäät Ipariem Ki Jerucalem

¹ Otïmö ni leth jï Cameria, päänya näk caala adun atöör mar jø Ipariem na näk jø meerø, päänya näk ajiem mïërö mare caala wï jaath mo oŋøøk ni manynya närö, na näk ogeer bäät thuur buut gool mana ŋöömme beer na näk mar jøøa no oŋääö ki maath.

² Raŋŋu, Kwäärö Wuuö Jwøk jïre da ŋat mo dwøŋ mo teek, mo caala køth mo ree da pey ka atuunna man wø räänyö, mo caala athaga mo teek mar naam mo pänhnhö; eni wï pääny Cameria thiele piny ki cere yïth ŋøøm.

³ Adun atöör mar jø meerø mo Ipariem nyøre nyørø ki tiete,

⁴ ni ö ajiem mïërö mare na caal wï jaath mo oŋøøk ni manynya närö, na kïth bäät thuura en buut goora näk ŋöömme beer, ni tïme kaamar nyo olaam man wø ciek ni cwiir poodi, ni jooti ya dhaanhe ni lwør gø ni laar gø cam.

⁵ 'Ba dïcäŋeca Wuuö Jwøk, eni na wïth jammi bëët, otïmö ni beeye aduda mana mïërö, na adun ajiem kiper jiye moa dööŋ ni kwøw.

⁶ Eno tïmö ni ena jwïëy man wø cïp ŋøl luup ma adïëri jï jø wø en ŋøl luupi ceŋge, ni tïme ni ena teek jï jø wø dwøk jø leny wøk ki dhi kiir.

⁷ 'Ba këël nyikuk Jwøk ki dïlämme, ge mädhö ki kwøŋ mo keec, ni cääthge ni ge näännö ni ge bøømmø ki meerø. Ge bëëdö ni wïthge ocwöth køøŋe, ni ge cäädhi ni ge bøømmø kany wø mäthge ki kwøga keec. Ge bëëdö ni ge näännö ki meerø kany wø nyuunh geni ki luup, ni tïmge ni ge bääö ni luup ba ŋølge na adïëri.

⁸ Bäät tharabëëte moge bëët bëëdö ni päŋ ki ŋwøk, ni bäŋ kany mo tøŋ.

⁹ Ge cäänö, na «?Aŋa noo pwönynye ki leec wïc? ?Luumme ocaan gø jï ŋa? ?'Ba tiirra obwöre moa no omänö ki caak na näk thunh ege wiiø?

¹⁰ Kiper pwöc moe köö, ‹Tïïyu gïn, ni tïïyu gïn, gwøgu ciik man ki ciik man, nyi luubö mo thiinh en, maya ice.› »

¹¹ 'Ba wøp nø, Jwøk jøøi poot cäänne cäännö ki dhøk jiy mo path ki dhøk juurre.

¹² Kiper eno kwøŋ köö jïge, ni «Jwöm en; beerra man ö jiyi moa no oööl ni jïtge ki jwöm;» ni kööe, ni «Kar jwöm bee en,» 'ba gena kweer.

¹³ Kiper manøgønø, dwør Wuuö Jwøk mano caane kiperge otïmö ni bee en, «Tïïyu gïn, ni tïïyu gïn, gwøgu ciik man, ki ciik man; nyi luubö mo thiinh en, maya ice.» Kanyøgø geno aay, ni päänhge no otaare, ni tøcge, ni päthge ya abïëp, ni mak geni ki tøŋ.

¹⁴ Kiper manøgønø, u na jø abuua, ni wø käär jøøi ni en yi Jerucalem en, wïnynyu dwør Wuuö Jwøk!

¹⁵ Kiper uuna köö, ni «Waana nø tudö ki luubö ki thøø, nee wa ba gude, ni nø tutwa ki luubö ki kar bëët jwïëc jøøa no othøw, nee wa ba ciwa yie; këël jwïïö man wø räänyö ocur bäätwa, wa ba gude. Kiper tööt ewa nø tïïc ni beeye gïn gwøk waani, ni nø tïïcwa gø ni beeye kany kanwa dëëtwa yie.»

¹⁶ Kiper manøgønø, Kwäärö Wuuö Jwøk aköö, ni «Raŋŋu, aani a kïtha yi Dhayan ki kïdi, ni beeye kïdi mo onø päänynyö, kïnna pere leth na näk kïn gøøt, na näk ocwöth piny ni teek. 'Ba ŋato jïëc gøøni, wïïe ree ba kiere.

¹⁷ 'Ba ŋøl mana na adïëri otïïa ni caala thøøl man wø røm tiir mar øtø ki gø, ni tïïa bëënynyö ni caala thøøl man wø røm tiir mar dëër øtø ki gø. Køøre pey opänhnhi ni raany tööt mana gwøk uuni, ni kwön jwïïe ni raany kwöra kanu dëëtu yïthge.

¹⁸ 'Ba luubö mana tuutu ki thøø nou ba gude oraanynyi, ni ö luubö mana tuutu ki kar bëët jwïëc jøøa no othøw, ni ba thur kare; kany wø ö jwïïö man wø räänyö noo kwön bäätu, uuno raanynye.

¹⁹ Cooth kany wø kwönne, uuno køøle, kiper mano bëëde ni kwönna bäätu cooth ki yïth caae bëët, amöölla ki waŋcäŋ ki wäär.» 'Ba kanyo kwany tier luummögø, okänni ki lwär mo dwøŋ.

²⁰ Uuno tïmö kaamar dhaanhø mo obut bäät pëëm mo ciek døc ni ba løny ki man rwiec tiete yie, mo dïmalïïcu mare thiinh døc ni ba løny ki man uum dëëre bäre.

²¹ Kiper Wuuö Jwøk ööa maal bäätu kaawat mana tïïe bäät Kïn Peradhim; eni wëër kaawat mana tïïe yi goor Gibien; ni ööe ni tïïe ki gïn mo kär dïëdö, ni beeye gïn mo nyään mo kär kwøŋ tïïc.

²² 'Ba ennø, weyu abuua maru. 'Ba ni näk mo ba weyu, oguudi cäŋ ka methø døc tietu. Kiper Kwäärö Wuuö Jwøk, eni na wïth jammi bëët, da gïn mo yaa wïnynyö baŋe mo ee nø cïp piny, ki man raany piny bäre.

²³ Cegu ïthu ni wïnynyu dwøra; cegu ïthu ni wïnynyu luup 'moa.

²⁴ ?Aŋø, ŋat puur wø bëëdö ni tïïya tïï puur keere ni ba pïïdhö? ?Aŋø, eni 'bëëdö ni kuga ŋøøm cooth ni jaalla ge jaak?

²⁵ ?Eni ŋøøp pwödhö bäŋ wø jiiŋŋe na karge, ni pïïdhe ki teeŋ jer wø ŋwääi ni met, ni piith cïndë na laany? ?Kaagø thuwø bäŋ wø pïïnhnhe ki beek wø cwøl ni gäbci, ki man wø cwøl na aja kwöra näk orømø kiperge?

²⁶ Kiper beeye Jwøk mare na nyuunh gø na pwöny gø ki jöö mana beer.

²⁷ Eni teeŋ jer wø ŋwääi ni met, nyïï gø ba dïne ka abaya, wala gïr dïn man wø tut dhäki; 'ba teeŋ nyïï jerøgø wø dïne ka thiir.

²⁸ Beel mo wø cam na kwön wø di wälö, ni dhaanhø ba bëëdö cooth ni mare dïn keere jaak. 'Ba eni këël wø dïn beel ki gïr dïn mare, okweeny mare beel ba raanynye.

²⁹ 'Ba gïïögø bëët käla baŋ Wuuö Jwøk, eni na wïth jammi bëët, ŋata näk acaara mare rëëma ec, ni leec wïc mare dwøŋ.