Aydheea 26 - Wëël Jwøk

Duut Mo Pwøca Jwøk Kiper Göök Mare

¹ 'Ba dïcäŋeca duut man di wärö yi ŋööm Juuda, na ennø nø: Waani, jïwa da pääny mo teek, kiper Jwøk waana mooe ki kiir mo teek mo piema waani.

² Japu dhøk kiir nee wï jur mana mare beer nee døny yie, ni beeye wï jur man wø bëëdö ni gwøga ŋäädhe mare.

³ Wui Wuuö Jwøk, ŋat wø bëëdö ni cwïnye ee maa dëërï, mooyï mooø ki jwöm ki yi cwïnye, kiper eni bëëdö ni ŋäätha ïïni.

⁴ Bëëdu nou ŋäätha Wuuö Jwøk na bäre bäre, kiper Wuuö Jwøk beeye kïn gwøk røk mo bëëdö na bäre bäre.

⁵ Kiper eni jø wø bëëdö ni rege ege tïŋ maal dwøge piny, ni raany pääny marge na näk ogeerø ni teek. Pääny marge raanynye raanynyø møn, ni put tïmö na tør,

⁶ ni puti ya jøøa canni nyørø ki tietge, ni ö jøøa no othiel piny ni cuŋge bääte.

⁷ Jøøa marge beer, øtjöörge tiir. 'Ba ï na Wuuö Jwøk, ï na marï adïëri, tïïc øtjöör jøøa marge beer ni pøøth ni ba gwalli.

⁸ Wui Wuuö Jwøk, ka adïëri møn, wa raŋŋa jïrï, ni wa bëëdö ni wa caatha køør ŋøl luup marï, ni wa manynya man jiemwa nyeŋŋï ki cwïnywa bäre.

⁹ Cwïnya bëëdö ni lääŋŋa ïïni ki wärre bëët, ni ö jwïëya ni bëëde ni manynya ïïni døc. Kiper ŋøl marï na näk adïëri kanyo ö bäät piny, jø bäät piny ge kwänynyö ki bëët adïëri.

¹⁰ Këël na bëëdï niï nyøtha mëër marï jï jøøa reyø, jöör adïëri poot ba kwanyge. Ge poot bëëdö ni ge temma gïï mo reyø po jøøa marge thïïŋ, ni bäŋ gïn caarge kiper dööŋö mar Wuuö Jwøk.

¹¹ Wui Wuuö Jwøk, cerï atïŋï maal ni kärge gø joodø. Nyooth këëyö marï jïge kiper jiyï, ni wëëgï ge lään wïc. Wui, beerra man ö maaci ni thöör nyïïmän moï.

¹² Wui Wuuö Jwøk, bëët-mëër wø cïpa ïïni jïwa; ni tïïe mowa bëët thur karge ka køør køny marï man wø tïïyï jïwa.

¹³ Wui Wuuö Jwøk, Jwøk marwa, waana bëëdö ni wa käära kwääri møøk mo patha ïïni, 'ba beeye ïïni keerï ni wø nyeŋŋï wøørwa.

¹⁴ 'Ba jøøgø gena thøw, ni ge ba kwøw këët, ni jwïëcge ba duu maal këët! Kiper gena jäälï ni dïïrï wïthge, ni tïïyï ge nee wïc ba par ki geni këët na bäre bäre.

¹⁵ Wui Wuuö Jwøk, wï jur marwa ameetï, wï jur marwa ameetï møn, ni nyaayï nyeŋ kee mowa bëët, ni jït nyeŋŋï ka ajiem ki køøre.

¹⁶ Wui Wuuö Jwøk, jiy moï kanya enge yïth gïï mo leth, ïïna manyge, ni lämge ni ge muuŋö, kanya bëët ajäla marï bäätge.

¹⁷ Bëëtö marwa nyïmï atïmö kaamar dhaagø mo ogøøc mäc lwaarri, mo jwöŋö ni ree døøye døøyø ki rääm kanyo tïm kar lwaarri ni cään.

¹⁸ Waana bëëdö ni wa cooyø ki rääm mo keda mäc lwaar, 'ba bäŋ gïn mo oduu cooyø marwa, ni bäŋ gïn mo beer mo ewa tïïö kiper piny, ni jø bäät piny kär jïtö ki kwøw ki køørwa.

¹⁹ Jiy moï moa thøw geno cäŋ kwøwø, ni ö rïŋ dëëtge ni cäŋge ö maal. Wui, u na näk obutö yïth bwör, päyu ni ööu maal ni kwöŋŋu ki met ec. Kiper Wuuö Jwøk jiy moa no othøw wëëge kwøw, kaa man wø ö thööy wø jwøc bäät piny ka amöölla.

²⁰ U na jiya, dønynyu yïth uudi mou, ni cïëgu dhøk odhuule mou bäätu, ni kannu dëëtu ki kany mo thiinh, këël kanyo ö wëëc Wuuö Jwøki noo pöödhe.

²¹ Kiper ka adïëri møn, Wuuö Jwøk öö ki maal kar bëëtö mare, ni ö piny kuna jääl jiy moa en bäät piny kiper raay moa tïïcge. Ni ö rem jiy moa no okøny piny no okanø ni nëëne, ni ba løny këët ki man ö ŋøømmi ni kan jiy moa no onääö.