Aydheea 19 - Wëël Jwøk

Luumma Nyooth Wuuö Jwøki Kiper Ijep

¹ 'Ba luumma nyooth Wuuö Jwøki kiper jø Ijep beeye en: Ka adïëri møn, Wuuö Jwøk öö ni ena bäät pöölö mo rïïŋö døc, ni ööa Ijep. Ni ö kït gïï wø lam mo jø Ijep ni put dëëtge tïmö ni kwanynyi nyïme, ni ö cwïny jø Ijepi ni bwøkge ki gø.

² Wuuö Jwøk aköö, ni «Jø Ijep tïïa tïïö nee døøge rege keerge; ni tïm ŋati man nø ni këëdö ki coki, ni ö ŋat atut man nø ni tïme ni këëdö ki ŋat atut mare, ni ö päänye moe ni tïmge ni këëdö ki rege, ni kwääri moe thuwø këëdö ki rege keerge.

³ Kanyøgønø jø Ijep cwïnyge obëëdö no opädhö, ni ö jammi moa näk ege cïp piny na dige tïïö, ni tïïa ge ni bäŋ tietge. 'Ba geno ci baŋ kït gïï wø lam moge, ki baŋ jwïëc jøøa no othøw, kuna pëënyge geni kiper køny, ni cige baŋ jøøa näk rege da juu mo cøøra jwïëc jøøa no othøw nee ge mooc ka acaara.

⁴ 'Ba aani ge poot cïba cer nyeya mo raac, ni tïŋŋa maal bäätge ki nyeya mo teek mo wïnni.» Manøgø caana Kwäärö Wuuö Jwøk, eni na wïth jammi bëët.

⁵ 'Ba pïï mo Naam Nail tal, pïï moe dwön ni talge.

⁶ Näm moa koony jiyi oŋwääi no okwäk, ni ö nyeŋ näm mo Ijep ni decge ni talge; ni ö otöök ki lumme moa en deŋge ni kwäkge.

⁷ Luum mana no otuy ki bäät Naam Nail ki deŋŋe, ki jammi bëët moa no opiidhø bäät Naam Nail tal, ni køøli ya jame, ni tïmge ni bäŋgø.

⁸ Kanyøgønø dïbïth rec mo Naam Nail geno kïmmi; jiy bëët mo wø bïdhö ko obïïdhi cwïnyge opädhi, ni ö jiyi mo wø bïdhö ka ajääpi mo wø leeŋ ni dwatge.

⁹ Jiy mo wø biith waac jaath wø cwøl ni telba, ki jø wø cwääö ka abïïk lïïna mo tar, nyeŋge otïmö ni law.

¹⁰ Jø wø cwääö ka abïïe, bäätge opädhi, ni ö jø wø tïïö bëët ni ge di cunnö ni kïmge.

¹¹ 'Ba kwääri mo Dhöän gena bøøre døc. Jiy moa wïthge leer ni wø cïpi ka acaare jï Peerø gena tïmö ni ge cïpa acaare mo reyø. Nyie jaay, kee uuna köö jï Peerø na bëëde, ni «Waana nyïïkwaac jøøa wïthge leer, ni kwäcwa beege nyeye moa dïkwøŋ.»

¹² Ï na Peerø! ?Age jiyï moa wïthge leer? Beerra man ŋäcge ränynyö mar Ijep mana no ocïp Wuuö Jwøki piny, eni na wïth jammi bëët, ni caange gø jïrï.

¹³ Kwääri mo Dhöän gena tïïö ki jap bøøl, ni ö kwääri mo Mempic ni maaŋ wïthge; ni ö dïbwöthe mo wïth tuŋi moge na caal kïn gøøt ni bwøthge Ijep ki jöö mo ba thïïŋ.

¹⁴ Wïthge akier Wuuö Jwøki ki jwïëy mo wø cwöth wïc, ni bwøthge Ijep ki jöö mo ba thïïŋ ki yïth tïïe mo gø bëët, ni tïm Ijepi kaamar dhaanhø mo omeer mo bøømmø ni ena yïth ŋwøk moe.

¹⁵ 'Ba Ijep otïmö ni bäŋ gïn mo løny tïïc jïre, ki mano täge ki wïïe këël jïbe, ki bäädi moe ki bøøge.

¹⁶ 'Ba dïcäŋeca, jø Ijep otïmö kaamar mään; dëëtge otïmö ni kwanynyi ki lwär kanyo ö Wuuö Jwøki, eni na wïth jammi bëët, noo tuuŋ cere bäätge.

¹⁷ 'Ba ŋööm Juuda okänni ki lwär mo dwøŋ døc bäät jø Ijep; kany wø ö ŋat Ijepi noo wïny nyeŋ Juuda jaak, puta lwäyö døc kiper gïna no ocïp Wuuö Jwøki piny noo tïïe dëëtge, ni beeye Wuuö Jwøk, eni na wïth jammi bëët.

¹⁸ 'Ba dïcäŋeca, päänye abïïc yi ŋööm Ijep ocäänö ki dhi Keenan, ni kööŋge ki man cääthge køør Wuuö Jwøk, eni na wïth jammi bëët; ni ö acielli dëëtge ni cwøli ni Pääny Cäŋ.

¹⁹ 'Ba dïcäŋeca, otïmö ni da gïn wø cïp olämme bääte jï Wuuö Jwøk dï ŋööm Ijep, ni ö waŋ keew mare ni cöönhnhi ki kïdi na nyuudhi jï Wuuö Jwøk.

²⁰ Manøgø otïmö na nyuudhi na gïr lïŋ dï ŋööm Ijep kiper Wuuö Jwøk, eni na wïth jammi bëët; nee kanyo wäro jwöŋ jø Ijepi jï Wuuö Jwøk kiper jø wø caar geni, nee eni wø jääŋ baŋge ki pïëmi na kunyi mo wïïl geni wøk.

²¹ Wuuö Jwøk dëëre onyoodhe jï jø Ijep, ni ö jø Ijepi ni ŋäcge Wuuö Jwøk dïcäŋeca, ni putge tïmö ni Jwøk lamge ni ge cïpö ko olämme ki muuce, ni ge kööŋ nyïm Wuuö Jwøk ni gwøkge japa kööŋge kiperge.

²² 'Ba Wuuö Jwøk Ijep ojääle; geno jääle møn, 'ba ge cäŋe ka kønynyø; ni ö geni ni duuge baŋ Wuuö Jwøk, ni ö Wuuö Jwøki ni wïny kwac marge ni køny geni.

²³ 'Ba dïcäŋeca, otïmö ni da waŋjöö mo dwøŋ yïthakic Ijep ka Aciria, ni tïm jø Aciria ni ge cøøa Ijep, ni ö jø Ijepi thuwø ni cige ya Aciria, ni tïm jø Ijepi ni ge lämö na aciel ki jø Aciria.

²⁴ 'Ba dïcäŋeca, Icriel otïmö ni dää mïëri kanyo dwäte ki Ijep ka Aciria, ni putge tïmö na mïëri mo gwïëth jø bäät piny ki køørge.

²⁵ Wuuö Jwøk, eni na wïth jammi bëët, geno gwïëdhe ni kööe, ni «Gwïëth en jï jø Ijep, ge na jiya, ki jï jø Aciria na tïïa ki cera, ki jï jø Icriel na näk yaa jierø na 'moa.»