Aydheea 16 - Wëël Jwøk

¹ U na jø Möap, jäägu ki nyïïdïëk na ajwäk jï ŋata en paaci cere na en bäät Kïn Dhayan, ni ööu ki pääny Cela nou cura jöör wø cør dï paap.

² 'Ba mään mo Möap kanya pïïcge jwïëy mar Naam Arnön, gena bëëdö ni ge rïmma yïthge, ni tïmge kaamar weny mo obwøk mo tuuŋŋa bwöpge yi jamø jaak.

³ Ni köge jï jø Juuda, ni «Mooyu wa ka acaara mo beer, ni ŋøllu luumwa na kare. Kaa man bëëde ni piny a dhöör cäŋ en, jääŋŋu tïpö maru bäätwa nee tïme kaamar wäär. Kannu waani, wa no oriemmø en, ni ba waayu waani, wa na jiy mo obwøk en.

⁴ Beerra man bëëtwa yi ŋöömö maru, wa na no oriemmø en, ni tïmu ni uuna kar kan røk jïwa kiper ŋat mo raanynya wa.» 'Ba kanyo tïme ni bäŋ ŋat mo caanna jiy këët, na aranya ocuŋŋö, ni bäŋ dïtwïëte këët yi ŋöömö,

⁵ wälu okëël piny ni teek ki mëër; ni ö dïŋut luup mo tïïö na kare ni pï bääte, ni beeye ŋato ööi ki dhi øt Deebit, ni wø many ŋøl ma kare, ŋat wø laar luup ŋøl na adïëri.

⁶ 'Ba waani, atöör mar jø Möap awïnywa, ki koorrø marge, ki bëëtö marge ni dëëtge ege tïŋ maal, ki gootø marge; 'ba ŋwøc marge bäŋ tiere.

⁷ Kiper manøgønø, jø Möap geno göö ko oduuru, geno göö ko oduuru ge bëët kiper poge. Cwïnyge opädhi ni kïmge kiper nyïïomøki moa näk omiinynyø na dhøgi mo pääny Kir-Ërë.

⁸ Pwöth mo Ëcbön atal, ni ö nyïïomøki mo Cebama ni talge thuwø. Kwääri mo wïth juurre, jer omøki moa beyø araanyge, ni beege jera thööth na näk opïï Jadher këël dï paap, na näk bëëdö no oløth no olaak no onigïït piny bäät naama dwøŋ.

⁹ Kiper manøgønø, a jwöŋö ni yia yaa keeyø døc kiper Jadher ki pwöth omøki mo Cebama. Wui, ï na Ëcbön ki ï na Eliyali! Pï nyeŋŋa wëëga nathar bäätu. Kiper kwöŋŋö mar met ec mana wara wïnyö yïth pwöth nyïïjenni mo wø ciek ki cwiir, ki mana wara wïnyö kwör kac mou, aŋøl.

¹⁰ Met ec ki kanynyø mana wara en yïth pwöth nyïïjenni mou aŋøl, ni tïme ni bäŋ kwöŋŋö mar met ec, wala duut mo di wärö yïth pwöth nyïïomøki, ni bäŋ dhaanhø mo nyööbö këët ki køøŋ nyïïomøki; kiper kwöŋŋö mar met ec yaa nø ŋøl.

¹¹ Kiper manøgønø, aana bëëdö naa kïïna gïr Möap ki cwïnya kaamar ŋat wø jwøk jwøk-thøø ki thoom; ni bëëda naa kïmmö kiper Kir-Ërë.

¹² 'Ba kanyo ci jø Möapi kwör lam moge moa en bäät thuuri, ki kanyo cige øt jwøge baŋ lam, geno tïmö ni ge ööla dëëtge jaak ni bäŋ køny mo jootge.

¹³ Manøgø beeye luumma caan Wuuö Jwøki dïkwøŋ kiper jø Möap.

¹⁴ 'Ba ennø, Wuuö Jwøk acäänö ni kööe, «Ni ki yïth cwiiri adäk, kaawat man wø kwaan ŋat tïïci, ajiem mar Möap na dwøŋ, ki jiye na thööth, ränynyö; ni ö jiye moo dööŋ ni kwøw ni dööŋge ni nøk døc ni jägö.»