Aydheea 13 - Wëël Jwøk

Luum Ajäla Mana Caan Kiper Babiløn

¹ 'Ba luubö mana nyooth Wuuö Jwøki na joot Aydheea wär Amöth kiper Babiløn bee en:

² «Tïŋŋu maal ki ŋïï mar leny bäät kïnna näk bäŋ gïrpiny bääte, ni tïŋu döötu maal nee wïny jø lenynyi, ni tuuŋŋu ceŋŋu na nyuudhi nee jø leny dønyge ki dhøk uudi mo jøøa kwörge døøŋŋø.

³ Aani jiya moa näk yaa cïp kur keerge anø köömma, ni nø cwøla jø leny 'moa na teek kiper nee wëër mara kïthge bäät tïïc, ni beege jiya mo wø ŋwöö ni ge töödö.

⁴ «Cegu ïthu ki dïlweel bäät kïte, ni beeye dööt jiy mo thööth! Cegu ïthu ki dwøl manø ni märi ni dwøŋ enø yïth mïëc nyeye, ni beeye dööt wïth juurre moa näk dëëtge ege cooŋø! Wuuö Jwøk, eni na wïth jammi bëët, jiiŋŋa lwaak kiper leny.

⁵ Lwaak manøgø käla paac mo bäär, ni käla ya aŋuun piny mana bäär døc. Wuuö Jwøk ŋöömö manøgø bäre di raanynyø ki gïr tïïc mar ajäla mare.

⁶ «Gööu ko oduuru, kiper cäŋ mar Wuuö Jwøk kare acäännö. Cäŋögø öö na cäŋ aranya ni käla baŋ Jwøa en teeki jïre.

⁷ Kiper manøgø nø, bäät jiy bëët oput niläp, ni ö cwïny jiy bëët ni put bwøk døc.

⁸ 'Ba geno lwäyi døc, ni ö räämmi mo teek ki bëëtö mo leth ni put tägö dëëtge. Geni, dëëtge døøcge døøyø kaamar dhaagø mo ogøøc mäc lwaarri. Ŋati man nø rege watge oneene ni yie othäŋŋö, ni täärnyïme owïïtö ki lwär.

⁹ Neennu, cäŋ mar Wuuö Jwøk öö, ni beeye cäŋ mo raac døc ma mar bëët rääm, ki wëër mo liel kaamar maac, ni tïïya ŋöömö manøgø nee dööŋe keere. Ni ö Wuuö Jwøki ni thöör jø raay mo ŋöömmögø ki 'näk.

¹⁰ 'Ba ceer mo maal ki moa näk dëëtge ege cøŋŋø otïmö ni ba cïpi ki tar. Cäŋ otïmö ni cøl kanyo tuule, ni ö dwääyi ni ba cïp tar mare.

¹¹ 'Ba a na Wuuö Jwøk, piny jääla jäälö kiper rääö mare, ni jääla jø raay kiper raay moge. Aani thuwø, jø atöör, atöör marge raanynya raanynyø, ni ö bëët koorrø mar jøøa no ogäy ni dwøga gø piny.

¹² Aani, jiy mo obøth otïïa ni nøk ni ba joot caar ni kaala warkey mo tøŋ, ni joot na alïm ni kaala warkey mar kanya cwøl no Öpïr.

¹³ Kiper manøgønø, maal bäre tïïa tïïö ni jäŋŋi, ni ö pinynyi ni tïme ni kwanynyi, kanyo ö wëërri mara, a na Wuuö Jwøk na näk wïth jammi bëët, ni beeye dïcäŋo ö wëërri mara noo liele kaamar maac.

¹⁴ «Ni tïm jiyi kaamar röönne mo di dwarø, ni tïmge kaamar dïëk mo bäŋ dïkwääy jïge, ni ö ŋati man nø dëëtge ni døø baŋ jø poge, ni ö ŋati man nø ni døø yi ŋöömö marge.

¹⁵ ŋato joot jaak put ka cwøp ki tøŋ, ni ö ŋato mak ni nääi ko opëëllö.

¹⁶ Obwöre moge moa therø di gøyø ki ri kïte ni petge ni nëënö jïge; ni ö gïïa en yïth uudi moge ni twieri, ni buudö ki määrge ki teek.

¹⁷ «Neennu, jø Mëdön tïïa tïïö nee öge maal bäätge, ni beege jøøa näk ba løny ki cøøgø ki man ŋeei ki gwel-bïrö, wala di nøønø ki warkey.

¹⁸ Athëëre moge, obwöc cwøw moa näk wøpe thöörge thöörö. Geni cwïnyge ba pädhi ki man 'näkge obwöre moa mar, ni yïthge ba warge ki 'näk obwöre moa therø.

¹⁹ 'Ba Babiløn, na näk mïërö mar mïëc nyeye, na näk gïr ajiem mar atöör mar jø Kaldia, otïmö kaamar Cødam ki Gømöra kanya raanynyi ya Jwøki.

²⁰ Otïmö ni bäŋ jiy yie, ni ba beet, ki mano täge ri beenhnhø maneca këël mano këët røk beenhnhe moo ööi. Ni bäŋ jø Araba mo cwödha oduŋkaare moge yie, ni bäŋ dïkwääye mo tïïc lääc paac moge nee butge piny yie.

²¹ 'Ba lääc paap obëëdö yie, ni ö uudi moe ni tïmge na kwör bëëte mo tule. Ude thuwø obëëdö ni ena kaace, ni ö adëële ni kwääkge yie kaace.

²² Odïï obëëdö ni jwöŋö kwör koor moe moa no ogeerø ni teek, ni ö orude ni jwöŋge yïth uudi moe moa døøŋŋø na mïërö. 'Ba caa mare kare cään, ni bäŋ nïne jïre këët.»