Aydheea 12 - Wëël Jwøk

¹ 'Ba dïcäŋeca ŋati man nø dïïu oköö, «Wui ï na Wuuö Jwøk, nyeŋŋï pwøa pwøø; kiper wëër marï apaanyï bääta, ni cømï cwïnya, këël na bëëdï ni ïïno wëër ki aani.

² Ka adïëri møn, Wuuö Jwøk beeye na pïëmi mara, naa bëëdö naa ŋäätha gø naa ba lwäyi. Kiper Wuuö Jwøk beeye teek mara, ni bee eni ni wø nyeŋŋe pwøa ki duut, ni tïme na pïëmi mara.»

³ Kiper manøgønø, yïthu omïnni kanyo jootu pïëm ki baŋ Wuuö Jwøk, kaawat man wø mïn yi dhaanhø ki pïï mo wø kwönni ki yi jøøro.

⁴ 'Ba dïcäŋeca uuno köö jï jiy, ni «Dwøgu met ec jï Wuuö Jwøk, ni pwøyu nyeŋŋe, ni caannu tïïe moe jï wïth juurre nee ŋäcge, ni parru wïthge ki nyeŋŋe ki man näk mo eni kare dwøŋ.»

⁵ Wärru ki dut pwøc jï Wuuö Jwøk, kiper ena tïïö ki tïïe mo nyeŋŋe di jiemø ki rege; beerra man tïm tïïe moøgø ni ŋäc ki bäät piny bäre.

⁶ Wärru ki dudi ki met ec ni döötu you tïŋ maal, u na jø Dhayan, kiper Jwø Icriel na en kur keere na en yïthakiyu dwøŋŋa eni.